Pilipai 1
1
1Go ramayore Dimodi pange ni Polo saame wape pipa. Saare Yesu Kerisona pupudengi naepa ali laapo. Go ramayore Keriso kalu alinu pange Keriso wenaali rambamuaeme wenaali pange Pilipai anda para aeme Keriso wenaali repara rapadepa. 2Gode naana Apame pange Yesu Keriso naana Reali niipu laapome kuma pi ei pange yarame komea ei ginya.
Polome Gode repara ranae angele lea ei
3Neme nimi kone siala pulu arare naare raayosi Gode repara ranae kama loayo. 4Naare raayosi nimi raayona yainya pao-ayo dinare raname komalo ara pao-ayo. 5Akepeare ande neme ambala Godena angele nimi repara kinipu epa laripu dina ni rambameari ipuma ambia pange go au pa peme eina lalo. 6Go einare go au ora pilia kone sialo. Gode go nimina rupara epe pupudengi nande alimi pupudengi pa nari puma mo Yesu Keriso nipuna wala epola pea naarena peredea. 7E ae. Neme naare raayosi nimi kone nina pu para suayo. Neme nimi kone sua go au pi eiri ora au pi. Godeme nimina rupara pange nina rupara ora epepe aunu pea. Go pi auri ande Godena angele ni pa ara puri paloma laripu dina pange ambia ni dipula pirano pange go au pia. 8Neme go lalo eiri ora angele Godena lee rona ara lalo. Yesu Keriso nipumi nimi pu gea rupa neme pange nimi go au pi.
9Neme yainya pulu arare gupi loayo. Nimina menda repara pu aloaeme eiri andaya eiri pena loayo. Go au pulu ara pange nimina Godena aunu andeme eina pange pope eina pange ora epe konenu sialiminyaya yainya pao-ayo. 10Go au pi auri ora epepe aunu rali pua mealiminyayanda. Go au puma alimindare monde Yesu epelea dinare ora yaako pupape wenaali aliminyayanda. 11Gupuma ora rendepona au Yesu Kerisome komea ma-epao-aya eimi nimi ma-rumbiainya. Go au pilimi eimi Godena bi minyasiainya.
Polome ande Epe Angele rambamulame dipula pirisaya ei
12Nina amenuo, nimimi kone sialiminyayanda go angele lalo. Ni repara pande eiri ande Godena angele menda menda repara waru walamonoyanda pande.
13Go pea eiri ande kini ali Sisa nipuna anda surombo aeme alinu raayome pange mendane repaa raayome pange ni dipula pi eiri ande Yesu Kerisona pupudengi nao-ae aliyanda pi lo kone wimi.
14Ni dipula anda para pi eimiri monde Keriso amenu ora andapumi kone rularimi. Nimumi paalame na-kome ande Godena angele puri paloma ara loaeme.
15Orae, mendane repaamere ni rapu yanda lialo ara nimuna bi minyasialuameyanda ande Godena angele lao-aeme. Mendane repaare ora epe kone rapu ara waloaeme. 16Go epe kone wimi repaamere ni pu geme. Niri ande Godena angelena yanda lianoyanda ni go dipula ma-epaya. 17Go peapare mo mendane repaamere Yesuna angele ora rupa na-lae nipuna binu minyasialuame waloaeme. Nimumi go au peme eiri ni dipula pirano rendaa gulame peme.
18Go aunu pinyayapare gole ni kone menda na-sialo. Epe kone sia ara walalimi o koae kone sia ara walaliminda pange Yesuna angele walademe eina komea ni raname waru komoayo. 19Akepeare nimimi yainya pao-aeme eina pange ande Epe Yaakopi Sipiridina purimi ni manda kama nane epola. 20Nina ora wee pambao-ayo eiri ora nina Godeme neme punuyanda gea pupudengi ora na-ma-lopalua kone sialo. Go peapare naare raayosi ni ora puri pamboma alua. Go au pi auri nina do riame ni komano pange pa ara pange Yesuna bi minyasialuameyanda lalo. Ni ora puri waru pambe auri ambia go dipula piri ora waru padoa.
21Endoaya eiri alea. Na-kome pa aluandare gore Yesuna pupudengi pa nairi pola. Ni komolanda pangere epepe alenu waru andapu andola. 22Go peapare pa airi polandare gore epe pupudenginu pa na-airi pola. Go peapare pa ara pangere gore ni go porana pono o mongo porana pono lo angele lape ni marea. 23Niri naare mendanare komoma Yesu rapu ala puawe kone suayo. Go au puluare ora epelea. Koro mendamere ambe na-komano lape kone suayo. 24Go peapare ora ririna alere gurupa. Ni na-kome pa aluandare gore nimi rambameape aunu waru pulua kone sialo. 25Go au pape eina ni kone waru wi. Ni pa aoma nimi rapu ao-paluma nimina kone rulame ei puri ma-palaoma rana ma-palua. Go aunuri ni ambala kone wi. 26Go einare ni nimi rapu wala aminya epola dinare nimi raname komola peme eina ree andapu wia. Go au pi auri nimi Yesu Keriso rapu runaoma ari pelemenda go au pilia.
Pilipai Keriso wenaalimiri Polo rapu raloma ara kenda rilina
27Ambiare ora ririna angelere gurupa. Nimina ao-padimi rupa pange neleme endanu pange deme angelenu raayo ande Yesuna epe angeleme dea rupa komea aoma paidapape. Nimi wala andola epola o wala na-andola epolanda pangere ale menda dia. Nimi raayo komea kone suma kendapi einu raayo komea para riala pipape. Go komea kandana wia auri mo Godena angele rondona go au pipape. 28Nimina yanda runguli alinu paalame na-komalepape. Nimimi paalame na-komelemendare gore nimumi nimi lu rambuape-na-yana kone wilimi. Nimimi nimu lu rambualimi. Akepeare Godeme nimimi go au paliminyayanda nimi puri gilia. 29Godeme nimi repara epe au pulu arare nimimi Yesuna rupara pupudengi naliminya lea. Nipu repara kone rulala peme eina komea na-pea. Go ei komea diayapare nipu rondona rendaa ora naliminya lea. 30Ambalande liawande yandanuri andamende. Ambia pange neme yanda pa lialo einu pange pangaleme. Go einare ni rapu raminyeke puma aomare mo naana yanda runguli alinu rapu yanda liaminya.
Currently Selected:
Pilipai 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
