Epesusi 5
5
Naame mo paa pi ei rupara ora aminya
1Go einare nimimiri Gode nipumi nipuna rana komea nongo nakinu aemele Godena ao-palea rupa mongeando ao-paidapape. 2Ande Kerisome naa para pu giala ara nipu naa mana wenaalinumi nipu pa linya laya eimi Kerisome nipuna do alinau pulu ara roropo roropo lombala ainya Gode repara nipu rana ma-paluameya ala monelea rupa nimina ao-paluaeme ei pange pu ada ei komea kamame andere-ainya dapape.
3Nimiri Godena wenaalinu aemendare nimimi wena kurapu o ali akopu rungulalo pange yananumi pimi aunu pange mendame ni ni lo panda lia lia pula ara mendame go aunu pulameya wai na-ma-alepape. Akepeare mendame nena pi laluameyare nimuna reere go ei ma-apana. 4Nimina eke angele pange pamba na-pi angele dame ei pange kone na-wi, ali yango wili ma-nada angele dame ei pange ora na-lere Gode para ranae angelenu komea lala pipape. 5Nimina gole kone wimira. Ali menda o wena menda nipumi wena kurapu o ali akopu rungudiminda pange yananumi pimi aunu piliminda pange ni ni lo panda lia lia puaeme ali o wena nimumi Gode pange Keriso niipu laapona Ki Rambuao-aya Eina anda panda menda mandana ora meape-na-ya. (Ni ni lo pange panda lia lia pia aunuri payapo gode repara yainya pili ei mandana.)
6Mendame nimi na-makira ainya dapape. Nipumi ora olemole waru ande alimi le nono pula ara ora angele le nono pilia. Godena rono pangala eiri go rupa aunu pulame nipuna angele na-pangoaeme repaa repara popelea. 7Go eina nimimi gupi wenaali rapu raminyeke pa na-alepape. 8Ambala ririna nimiri rimbalo pambe para arimipare ambiare Realina wenaali aeme eina paa pi ei rupara aemeae. Go eina nimiri gurupa mo paa pi ei rupara aeme wenaali mandana ao-paidapape.
9Paa pia eimiri au menda menda pi ora epe aunu pange epe rendepona ape einu pange ora angelenu dame einu ma-epao-aya. 10Reali rana ma-pala pea aunu aisa pipape. 11Wenaalinumi pimi rupa yangi na-meape aunu na-pipape pange rimbayo pambe aunuri kama nane pame penameyao walena dapape. 12Nimuna kundiripu pimi aunuri wenaali yala ma-papeya angele kuruma lape-nae-ya. 13Go peapare au raayo monde paa pi eimi penameyao wadeandare go au raayo pi eina reere gole yanae loma penameyao wadea. 14Ale menda paa pia eimi penameyao wadeandare gore go ale paa pula popelea. Go eina reenare go angele leme lea.
Kome ali nee komea ei minyapalaoma rekapeae.
Gupilindare Kerisome naare mandana
nee repara paa pilia, lea.
15Go eina nimina ao-paleme rupa waru andalepape. Alepae kone na-wimi wenaalinu rupa na-ao-paliri ora epe kone waru rekele pu wimi wenaalinu mandana ao-paidapape. 16Ambia naarere koae koae aunu pimi naareyale nimimi epe au pape naare menda milimindare gore go naare rupara epe aunu waru pipape. 17Go einare keali mandana na-aere Realimi nimimi paliminya kone wia ei Reali repara waidapape.
18Gupuma koae ipamere nimi ma-koyaliyale koae ipa na-nere Yaakopi Sipiridimi komea nimi rambuaoma ainya dapape. 19Gupuma nimimi nimina yango menda menda rapu epe angelenu lala ara Godena angele wia dupale malinu lala ara yainya pi yaisanu pange Epe Yaakopi Sipiridimi mongeriada dupale malinu yaisanumi nimimi nimina gole go angelenu lalolo pipape. Nimina pu romba para Reali para nipuna bi ma-minyasiada ara raname komala ei sialolo pula ara go yaisanu ora lala pipape. 20Naana Reali Yesu Kerisona bina naare raayo one mone aunu pia eina naana Apa Gode para ranae dapape.
Repaayana ao-paliape ei
21Keriso wenaalinu nimimi menda mendana rolo para alolo pipape. Akepeare nimiri Kerisore andasiaoma andoaeme.
22Nimi ali pe wenanuo, ande nimina Realina rolo para aeme rupa nimina alinuna rolo para ao-paidapape.
23Akepeare Kerisome Keriso wenaalinu andere-aya rupare alimi pange nipuna wena andere-aya. Keriso nipuna golere Keriso wenaalinuna Rambami pange Keriso wenaalinuri nipuna do. 24Go einare ande Keriso wenaalinuri Kerisona rolo para aeme rupare wenanumi nimuna alinuna rolo para ao-paidimi.
25Kerisome nipuna wenaalinu repara pu alala ara nipu pa linya laya rupa alimi neeme nena wena repara pu alala pape. 26Keriso nipuna wenaali mana komoma nipuna wenaali Gode repara ala monedoame pisaya. Keriso nipumi nipuna wenaali ipame randepema nipuna epe angele walea eimi nipumi nipuna wenaali Gode repara ala monelisaya. 27Keriso nipuna wenaaliri ora epe yole wenaali pange ale menda na-ralo pange au menda na-pi pange kondo menda na-wi pange akope maida maida na-pea. Gupumare Keriso nipumi nipuna wenaali nipuna ei ainyaya go wenaali mana nipu pa linya lisaya. 28Alimi nipuna do rana komala rupa mandana nipuna were repara pu alala pilia. Ali menda apimi nipuna were pu alo aliandare gore nipumi nipuna gole rana komala. 29-30Ali mendame nipuna do para gimi ora na-komoaya. Nipuna do giada rupare nipuna gole enda alo andere-aya. Gurupa mandanare Keriso wenaalinu naare nipuna do aemandare mendaa rupa Keriso nipumi naa andere-aoma enda guaya.
31Mo Godena angele wia bukame lea.
Go einare ali mendame ara angi minyapalaoma
nipuna wena rapu raminyeke puma alipindare
niipu laapore komea au depe, lea.
32Go angeleme go lea eiri ora angele kundiripi einu penameyao walea. Go eiri neme kone wi rupare Keriso pange nipuna wenaalinu repara lea. 33Go peapare nee repara pange lea. Ali komeamere nipuna gole nipu rana komola pea rupa nipuna were repara pu alala pape. Gupuma wenamere nipuna ali andasiao andala pape.
Currently Selected:
Epesusi 5: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
