1 Dimodi 1
1
1Niri Polo, Realimi nipuna aposolo ali anoya ni ma ma-aripa. Yesu Keriso Gode nipumi naa rambameala ara rapaya aliri ambia naame nipu andolame maisamba aema. 2Go eina Dimodi neere Keriso repara kone rulada aunuri neme nee mongeriaripunde einare neere nina ora naki mandanayandare go ramayo nee para wape pu rapadondae. Gode naana Apame pange Yesu Keriso naana Reali nipumi pakama yarame komala ei pange kuma pi ei nee repara ginyae.
Naame pereke pereke angelenu na-pangaminya
3Ni ambala ririna mo Masedonia nane polameya ara nee para la giawande angelere ambia pange wala apo la gialondae. Neere go Epesusi anda para pa ara mo pa alinu mendame mo Keriso alinu para pereke pereke angelenu mongeriapana neeme rudu waru lalapape. 4Nimuna kasuanuna binu ma-minyasiaya einuri nimumi ora gianyalape, akepeandare gupi angelenumiri nimuna kone ma ma-marao-aya. Go eimiri nimumi Gode para kone rulala peme eiri waru ana na-pea. 5Go peapare ambia neme nee para go la gialo Godena rombo wi angelere nimumi radimindare gore nimuna lopunu pange yaako puma nimu kuma pi rupa aoma Yesu Keriso repara ora kone rulalimi. Go aunu raayo pilimindare nimuna yangonu para pumi yarame komala au andaai waru ando pilimi. 6Go einare wenaali mendapareme go ora epe endoaya angelenu giaoma mo ree na-wi pakama loaeme angelenu lari pamu-aeme eimi nimuna kone maroma keyari pamu-aeme. 7Gupuma nimuri Godena rudule angele walape eina aluame rapoaemepare go angelenuna reenuri nimu waru na-andeme. 8Go Rudule Angelenu Godeme meamona kone wia rupanda milimandare gore go angele go epeleanda.
9Go peapare go Rudule Angelenuri naana ei dia. Go angelenuri Gode giaoma yanda runguluma aeme alinu pange ara anginu rapu yanda luaeme alinu pange ali luma ma-koma-ao-ae alinuna ei komea. 10Gupuma mendaa angelere wena pange ali pake naleme repaa pange Sodomo anda para puaisimiya aunu puaeme repaa pange yayapi dame repaanuna ei. 11Go ora epe angelere Godeme neme walanoya ni repara gea ei. Go angelemere Godere ora ririna Gode pange raname komala einuna ree loma naa la gea.
Godeme Polo nipu yarame komisaya eina ranae lisaya ei
12Naana Reali Yesu Kerisome ni para puri andaai gumare nipuna pupudengi neme mandana nalua kone sumare ni misaya. Gupumare ambia nipumi ni go pupudengina ma ma-aya. Go einare ambia neme Gode nipu para ranae angele ora waru laloe. 13Ora laloe, ambala ririna neme Godena bina pisale pisale kondaoma ero waru lawa. Gupula ara Gode rapu yanda waru liawa. Gupuma neme Gode para pamba na-pi aunu waru pala pawa. Gupuma neme Gode nipu para kone na-rulae ara go aunu pala pawa. Go eimiri neme Godena aunu waru na-ande ara pala pawaya.
14Gupuma Realimi ni yara ora andaai komoma ni pu ada ei pange kone rulada ei gea. Go einuri Yesu Keriso rapu arare nana ei. 15Go eina Yesu Keriso go suna kolopema ipisaya eiri naa koae aunu puarima wenaalinu naa rambamulame ipisaya. Go angelere ora ei. Go einare wenaali raayome pangoma kone rulainya. Koae aunu puaeme alinuna ririna aliri ni gonda. 16Go peapare Godeme ni yarame waru komisaya. Go au pisaya eiri naare rendaa rendaa pemapare Godeme naa repara kuma kuma puma aya ei wenaalimi andenaya Yesu Kerisome ni manda meaya. Gupuma go rendaa rendaa pi wenaali pange manda endoaya ei milimi loma waleya. 17Nipuri ora naare raayo Kini ali ao-aya. Nipuri ora na-komelea, pange wenaalinumi lee anga para na-andeleme. Nipu komeare ora Gode. Bi andaai wia ei pange wele kongapu waru pi ei naare raayona nipu para pa sualia.
Dimodi puri paloma yanda runguli alinu rapu yanda waru pina loma lea ei
18Nina naki Dimodi, ande Godena angele ambalande nee para la giamande angele ambia wala kone sialoe. Gupuma neme nee pupudengi nola pele eina go angele la gialo. Godena angele waru pangoma nipuna yanda painya go angele waru siamba ape. 19Go yanda pulamere kone waru rulaomare ora epe aunu pape. Menda para repaamere go ora epe aunu repara kou walala pame repaare nimuna kone rulala pisimiya einu kolisaya. 20Aimenasi para Alekasandasi laapore go au puaepe ali laapo Sadanina ki para ma-maripu. Go pawa eiri nipumi Godena bi wala ero na-lala pinyayanda pawae.
Currently Selected:
1 Dimodi 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
