1 Desalonaika 4

Gode rana ma-pape aunu

1Amenuo, ambiare pereyada arare nimimi Gode raname komariada ara ala peme rupare naame ambala walamande. Go walama rupa gole ara peme. Gupuma ambiare nimi kongeyala ara nimimi Reali Yesu nipuna bina nimimi monde au mendane einu ora waru andapu pu aliminyaya nimi konge dama.

2Ande Reali Yesu nipuna bina naame nimi para mana angele loaema einu kone wimiae. 3Godeme nimi para nipuna kone pea aunuri gupae. Nimimi yaakopi wenaali arare wename ali pake nala au pange alimi wena pake nala aunu na-pi aliminya kone wia. 4Alinu nimi nimina wenanu rapu ora pea rupa ao-paidapape. 5Ande Gode na-ande kama nane aeme wenaalimi pimi rupa koae au pawe kone suma wee na-pambalepape. 6Go einare ali mendame nipuna Keriso ame para rekepuleke laoma koae au menda na-pape. Go angelere nimi para kingi waru pula ara lama eiri gupae. Gupi au pi wenaaliri Realimi koae yangi adea, lama. 7Naare wena pake no pange ali pake no pumanaya Godeme na-yarepe meapare yaakopi aunu pumanaya mea. 8Godeme nimi para nipuna Epe Yaakopi Sipiridi guaya. Go einare ali apimi go walalo angele gialiandare gore su ali menda repara gipia pi na-dapare Gode gole giada ara piae.

9Nimina Keriso yangonu pumi yarame komola peme eina neme wape menda na-piae. Gore akepeanda. Go au pula peme eiri Godeme nimi para ambala walea.

10Mo Masedonia andasu nane aeme Keriso amenu para ambala go au peme. Go eina amenuo, go auri waru pualepape, loma nimi kongeyala ara dama. 11Gupuma ambiare kuma pi rupa ao-paidapape pange nimina enda ipanuri nimina gole andere-alepape. Gupuma mendame pia aunu o dame angelenu repara mawako puma na-pamualepape. Ambalande naame nimi para walama ei kone sialepape. 12Gupualimindare angele na-mi wenaalimi andala ara nimi para epe kone wilimiae. Gupuma pange menda ali rilao na-ae nimina gole nimi andere-alepape.

Yesu Keriso wala ipuma naa epa ma-rekala pea ei

13Naana amenuo, naame nimimi go komaleme wenaalinumi peme au nimimi kone sialiminyayanda damae. Go eiri werepe pula pea au kone na-wi wenaalimi pimi rupa yarame na-kome aliminyayanda damae. 14Naana kone ruladema eiri gurupa. Yesu nipuri komoma gole wala rekisaya. Go einare kone gupa sialema. Yesu para kone ruloma ara komeme wenaaliri Godeme Yesu rapu karu epelea.

15Gore Realimi walea ei nimi para la gidama. Reali wala lekeya epola pea naarenare naa pa aema wenaaliri mo ande ambala ririna komeme wenaali ma-wanduaoma na-pelema. 16Duma wi epa loma ara go pa go pa lo ambala dea. Ririna eindiolo ambala nipuna pendo ambala koma milima. Gupumare Gode nipuna buu kenange lu pilia pange ande Reali Yesu Keriso Epeni nane aoma epelea. Ande Godena angele pangopale komamende wenaali ambala endoaya ei meapale rekeleme. 17Gupumare naa go naarena pa alima wenaali naare ma-mombeaomare so koaa para nimu rapu mendaa para ara so yaa para Reali mandalima. Gupumare naare Reali nipu rapu naare raayo ao-alima.

18Go einare menda menda repara go angelenu lomare menda mendana pu rombanu ma-epealepape.

Currently Selected:

1 Desalonaika 4: POLENT23

Highlight

Copy

Compare