1 Korindi 16
16
Wenaalinumi Keriso wenaalinu rambamulameya peme ei
1Ande Godena wenaali mo Diudia andasu nane aeme repaana muni mombealima lameyande eina angele go lalonda. Neme ande Galaesia Keriso wenaali para lalo ara pipape lawande ei nimimi pange pipape. 2Sande raayosi nimina mealeme muni anamusi mendapare purupima pane siala pipape. Go eiri wala ni epala puma epa mombe pirala papeyanda laloae. 3Ni epolandare nimimi yarepe muma ma-ainya leme alinu para neme ramayonu wape puma adoa. Gupuma nimimi aleme alenu go alinumi Diurusaleme anda para ma-penayanda rapalua. 4Ni pange pola kone sulandare gore naana mendaa pelema.
Polome pula pea ei
5Masedonia andasu nane ipumare nimi aeme alena opopala epola. Gurupa epolame Masedonia andasu nane ambala pola. 6Nimi rapu alua kone sialo. Mo kupa pia naare epelea dinare nimi rapu pa alima kone sialo. Go kupa peredea dinare werepe anda menda polandare nimimi ni rapaliminya pora pialiminya kone sialo. 7Nimi rapu pa ria aoma lombai na-pulua. Ora ao-alima kone sialo. Reali nipuna rana pea ei deandare go au pulua.
8Ni Epesusi ree anda para pa alua. Go peapare ande Pendikosi naare epeleandare go anda minyapalalua. 9Go eina lawa. Go parare pora ambala lombopa wia. Gupuma Realina pupudenginu andaai napeya. Gupula peparere pora rudu da peme alinu pange waru andapupe aeme.
10Dimodi nimi aeme para epeleandare waru anda muma karu alepape. Nipumi pange neme pi rupa Realina pupudenginu waru nao-ayanda lalo.
11Gupuma nimi mendame nipu pa ale menda dia kone na-sialepape. Nimimi nipu wala ni para rapado arare raname komalo ara rapalepape. Ni pange ande Keriso amenu naa mendapareme maisambao-aema.
12Ande Keriso ame menda nipuna bi Apolosi nipumi nimi andola epenayanda neme rimbuyala pawapare nipuna konemere ambia gore ambe dia kone suaya. Go peapare werepe epape naare ana piliandare gore nimi manda andola epelea.
Werepe angele lea ei
13Nimi waru lee opoma alepape pange kone rulade eina rupara puri paloma alepape. Paala paalame na-komalepape. 14Go eina niminya pimi aunu raayo pumi raname komalo ara pipape.
15-16Ande ali menda nipuna bi Sidipenisiri nipuna wena nongo nakinu pange nimimi andeme. Go repaa nimuri mo Akaya andasu nanere ririna Keriso aeme repaa. Go repaare nimuna ranana Godena repaa rambamulame popamende. Go eina na amenuo, nimi repara go rupa kongeyalo. Gupi wenaalimi pimi einu nimimi waru andasiaoma andala pipape. Go repaa rapu pange go repaa rapu mendaa para pupudengi naleme wenaalimi pimi einu pange andomare nimumi wademe poranu raidapape.
17Sidipenisi, Podunadusi, Akaikusi, go ali repore ni para epeme. Nimi ni rapu na-aeme eina go alinumi nimina anda midame. 18Gupuma nimumi nimi rana ma-parimi rupa ni pange rana ma-pademe. Go au pimi alinuri raname komalo arare nimuna dame angele pangala pipape.
19Mo Esia andasu nane aeme Keriso wenaalimiri nimi para paidapape dame. Ande Akuila pange Pirisila repaayame pange nipuna anda para mombeaeme Keriso wenaalinumi pange paidapape dame. 20Go para aema amenumi pange nimi para paidapape angele dama. Menda menda waru kupiala pipape. 21Go pereyaluame wape pi angele komeare nina kimi wape pi ae. Niri Polome nimi para paidapape angele lalo. 22Reali para pu na-adea ali nipuri gore nipumi koaeyandanu andelea. Naana Reali epenae. 23Naana Reali nipuna pakama yarame komea eiri nimi para winya. 24Yesu Keriso para raminyekepa arare nina pumi raname komoaya ei nimi para winya ae.
Currently Selected:
1 Korindi 16: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
