Rom 13

Árijeŋgin keeemo ku t'éŋguur i

1Huruw fe awarawar kajamu ti keeemo ku t'éŋguur i. Atambatun unoono taŋ áyinie fu kawunu an sembe, abe akina asiiŋane fu keeemo ku t'éŋguur i. 2Náami an af'ateñeko keeemo ku t'éŋguur i, ateñekaa yooŋ b'Atambatun asiiŋane bu, abe kiŋki káhin iyu, boko kajoonanee. 3An af'aŋ'áhin meejake, awarut kákoleyi keeemo ku t'éŋguur i. Bare af'áhin meejakut, toko t'awariin fu kákoleyi. Afut'á̱maŋi kákoleyi an eeemo t'éŋguur i, á̱hin meejake, abe n'aŋ'asokoroori. 4Ábuki aŋ'áhin burok b'Atambatun asaano bu kaanuku éeyokunani. Bare af'aŋ'á̱hin meejakut, á̱koleyio! Ábuki sembe site kaniju ku t'an ásuf júm s'abaje su, bíjaiit káfiiten: aŋ'arok bija t'Atambatun éewufoor kaanuku Atambatun ayiŋatayiŋat t'an éehine u meejakut. 5Iŋ'ite ho aamo fu ariwarawar kájeŋgin keeemo ku t'éŋguur i. Iŋ'íteiit kaanuku man áriyinooni kateyi kúnuur ku barebare, bare yooŋ aŋarkeyi naane ti sihel site s'úne bijakajak.

6Iŋ'ite ho yooŋ h'af'arijaam búhal bu. Ábuki kiŋki karok t'éŋguur i, boko eroka bakate Atambatun kéehabaneina tu burok booniin. 7Aribatikan huruw-ruw fe doon d'áriyekio du: arijaam búhal bu an ariware u bo kajaamu, arijaam yooŋ júuti i an ariware u yo kajaamu. Árijeŋgin k'ariware ku kájeŋgin, abe n'arijam ti k'ariware ku kajamu#13.7 A̱juk yooŋ Májiye 22.21; Mark 12.17; Luk 20.25..

Úmaŋioori

8Atum'áriyekioori doon fe, kane arko taŋ kámaŋioori ku. An af'ámaŋi bakaaku, ájeŋginajeŋgin *Eluwa yite Moyis áhabanein. 9Múniyo b'Eluwa i esoke bu eene: «Atum'a̱ŋot n'an ariseñeit, atum'a̱yool an, atum'á̱kuwat, atum'a̱mero doon dite an», eluwa efeeneŋ yende taŋ ékumbaloole fu so ni saasu sireyi fe, yeeemo i: «Á̱maŋi áwiyi húŋgowulan naane á̱maŋie i hikawi#13.9 A̱juk Kafakan ku 20.13-17; Buluwa bu 5.17-21; Esaraha i 19.18..» 10An af'ámaŋi áwiyo húŋgowulan, áhinuto meejakut. Náami an af'ámaŋi áwiyo húŋgowulan, an ondu ájeŋginajeŋgin Eluwa i áhabanein.

Arifare bija ti bíbatikeina bite bu Kiris

11Náami arinoŋk ajakee, ábuki árimoomi ti kiin kunak t'úemo fee: tireeŋa toko, áriniyo. Hunak h'Atambatun aja hu kafakan úne huloha. Iŋkut hikamb naane kóŋkeyin úne ti káyilen ku toko-toko ti *Kiris. 12Huhuk hu hibaaŋaa, memee n'iŋi tifiit. Náami úfiiten kinij ku kiŋki kíhinee t'ébaani i, núusik bujuŋko b'úja bu ne bo hitiik hu ti meejaaŋe mu. 13Únoŋk ajakee naane aa anoŋkee mijiniŋga raŋgaw. Úwas buñoofo beehahe bu, n'éwusan i; úwas huŋotu hu ni bakan k'úseñeit ku, nu bufurukato bu; úwas síheñjeŋoor su, ni bíhiñanoor bu. 14Arisolo Anahaan u Yesu Kiris, abe atum'aŋk'ariwas wúfaŋi woonuun weejakut wu weetiŋguun ti meejakut mu.

Currently Selected:

Rom 13: cwt

Highlight

Compare

Copy