ཀ་ལཱས་སི། 4
4
1ནའི་སྦྱིན་བདག་བ་ཀི་བུ་ རང་རང་ས་ གཡོག་པ་བ་ཀ་ ཁྲིམས་ཐྲང་ཉི་ ལེག་པུ་ཨ་ལེ་ཁེ༌ལེ། ཞིང་ཁམས་ག་ ན་ཧ་བུ་ སྦྱིན་བདག་ཅ་ཨ་ཉི་ སེམས་ཀ་ཐའི༎
སྨོན་ལམ་ཏབ་ཅོ།
2སྨོན་ལམ་ཏབ་ཉི་རང་ཆོའི། ཉི་ན་ཤི་ དཀོན་མཆོག་ག་ བཀའ་དྲིན་བསམ་ཉི་ སྨོན་ལམ་ཏབ་ཅ་ཨ་ཉི་ རིག་པ་སྒྲིམ་ཉི་ཆོའི། 3ཉི་ཁིརིས་ག་གུམ་ནང་ཆཱས་ག་ཀོར་གེ་ གསུང་བཤད་པེ་ག་དེན་གེ་ དཀོན་མཆོག་གི་ ཨ་ཧ་ཀོ་ཕེག་ཉི་གནང་ཆེན་དག་ཉི་ ན་ཤི་ ཨ་ཧ་དེན་གེ་བུ་ སྨོན་ལམ་ཏབ་ཅོ། ཨོ་ཐ་གསུང་ག་ཡོར་ཀེ་ ཇང་བཙོན་ག་ཁེ་ཝ༌ཅ། 4ཉི་ཇི་གི་གསུང་བཤད་པ་ཀབ་ཉི་ དང་སང་ཀིན་ཨ་ཉི་ བཤད་པེ་ཁེ་ཝ༌ཅ། དང་སང་ཀིན་ཨ་ཉི་རང་ བཤད་པེ་རེ་ཆེན་དག་ཉི་ སྨོན་ལམ་ཏབ་ཅོ། 5ཕིས་ཀ་སོ་ངོ་བ་ཀབ་ཉི་ ན་ཤི་ཉོང་ཁཱན་ གོ་སྐབས་ཐུར་རང་ བ་ཏོང་མ་ཕི་ལཱན་ སེ་ཏྲ་ཨ་ཉི་ཆོའི། 6ན་ཧ་ཆཱས་ཁེ་པ་ ཧ་ལ་ཨ་ནེ་བུ་ ཇམ་པུ་དང་ ཨིན་ཆ་ད་བུ་ ཅུད་ཅཱན་ཨོ་ཕེ་ཁེ༌ལེ། ཨོ་ཐེན་ཨ་ཉི་ ན་ཤི་སོ་ངོ་ཐམས་ཅན་ག་ཏཱན་ ལན་ཕྲིག་ཕྲིག་ཨ་ཉི་ བི་ལེ་ག་སེ་ལེ་ཁེ༌ལེ༎
པ་ཝལ་ག་ཆཱས་མཇུག་དུས།
7ཏུ་ཁི་ཀཱས་གི་ ཇ་ག་ཀོར་གེ་ ན་ཧ་ཡེག༌པེ། རོག་ཤོ་ ཕང་ཁཱན་ཀོ་ཏ་དང་ དམ་ཚིག་ཙུང་ཉི་ ཕྱག་ཞུ་ཁཱན་ ཉི་གཙོ་བོ་ག་མཚན་ག་ ཨའི་ཀབ་ཉི་ཏབ་ཐུར་ག་ ལའི་ཨ་ཁཱན་ སོ་ངོ་ཐུར་གི༌ལ། 8རོག་ན་ཧ་བཱརང་ཀ་ཏཱན་ ཀུན་ཏི་ལེ་དེན་ཐ་ཤོ་ ཙོ་ཙོ་རང་ ཨའི་ཧང་ཏེན་ཅ་གི་ལ་སྨོ་ ན་ཤི་སེན་ཆེན། ཉི་རོ་ཀི་ ན་ཧ་སེམས་གསོ་ཨན་ཆེན་ དག་པ་གི་གི༌ལ། 9ཉི་ནའི་ཏེན་ག་སོ་ངོ་ཐུར་ དམ་ཚིག་ཙུང་ཁཱན་དང་ ཨ་ཤི་ཕང་ཁཱན་ཀོ་ཏ་ ཨོ་ནེ་སི་མཱས་བུ་ ཇི་གི་ན་ཧ་བཱརང་ཀ་ ཀུན་ཏིན༌ཅ། ཐ་ག་ ཧང་ཇུང་མ་གི་ལ་སྨོ་ ཨོ་ཉ་ཀོར་གེ་ རོག་ཉིག་ཙིང་གི་ ན་ཧ་ཡེག༌པེ།
10ཉི་ཇང་ཀབ་ཉི་བཙོན་ག་ཆོ་ཁཱན་ ཨ་རིས་ཏར་ཁཱས་གི་ ན་ཧ་ཏཱན་ སྐུ་གཟུགས་བཟང་པོ་དག་ཉི་ཞུ་ན། ཉི་བར་ན་བཱས་ག་ ཀོ་ཏ་ཁེ་ཁཱན་ མར་ཀུས་གི་བུ་ ན་ཧ་སྐུ་གཟུགས་བཟང་པོ་ཨ་ཉི་ཞུ་ན། (མར་ཀུས་ན་ཧ་བཱརང་ཀ་ ཨོ་ཕ་ད་བུ་ཨ་ནེ་ལ་ རོ་ཀ་ཁབ་ཟང་ཨའི་ན་དག་ཉི་ ན་ཧ་ཏཱན་ཡེག་པ༌ཅ།) 11ཡུས་ཏཱས་དག་ཉི་ར་ཁཱན་ ཡོ་ཧུ་ཤུ་གི་བུ་ ན་ཧ་སྐུ་གཟུགས་བཟང་པོ་དག་ཉི་ཞུ་ན། ཡ་ཧུ་དི་པ་ དད་པ་ཨ་ཁཱན་བ་ཀ་པོང་ཀེ་ རོག་ཏེ་སམ་ཤ་ ཇང་ཀབ་ཉི་ དཀོན་མཆོག་ག་ རྒྱལ་སྲིད་ག་དེན་གེ་ ལའི་ཨ་ཁཱན་གི༌ལ། ཉི་རོག་ཏེ་སམ་གི་ ཇ་ག་མང་པུ་ཐུར་ རུམ་པ༌ཅ། 12ཁིརིས་ཡི་ཤུ་ག་ ཕྱག་ཞུ་ཁཱན་ ནའི་ཏེན་ག་སོ་ངོ་ ཨི་པ་ཕཱརས་གི་ ན་ཧ་སྐུ་གཟུགས་བཟང་པོ་དག་ཉི་ཞུ་ན། ན་ཧ་བ་ཕུག་ཉི་ སྒྲིང་སྒྲིང་རིན་ཆེན་ ཉི་དཀོན་མཆོག་ག་ ཐུགས་བཞེད་ཁེ་པ་ ཏེན་ཏེན་ཨ་ཉི་ སེ་ཁཱན་རིན་ཆེན་དག་ཉི་ རོ་ཀི་ན་ཧ་དེན་གེ་ གནམ་མེད་ས་མེད་ བརྩོན་འགྲུས་ཀེ་ཉི་ སྨོན་ལམ་ཏབ༌ཅ། 13རོ་ཀི་ནའི་ ཉི་ལའུ་དི་ཀི་ཡ་དང་ ཧི་ར་པོ་ལིས་ག་ཆོ་ཁཱན་ སོ་ངོ་བ་ཀ་དེན་གེ་ གནམ་མེད་ས་མེད་ དཀའ་ཝ་ཅཱད་ཉི་ ལའི་ཨན་ཅ་དག་ཉི་ ཇང་ཇང་ཏེན་གི་ འཛོམས་དཔང་ཨ་ལེ་རེ༌བེ། 14ཐམས་ཅན་གི་ཕང་ཁཱན་ དྲུང་འཚོ་ལུ་ཀ་དང་ དྲེ་མཱས་གི་བུ་ ན་ཧ་སྐུ་གཟུགས་བཟང་པོ་དག་ཉི་ཞུ་ན། 15ལའུ་དི་ཀི་ཡ་ག་ཆོ་ཁཱན་ དད་པ་ཨ་ཁཱན་བ་ཀི་དང་ ནུམ་ཕཱས་ ཉི་རོ་ཀ་ཕའི་ག་ཛོམ་ཁཱན་ ཆོས་ཚོགས་ག་ཏཱན་ ཇི་གི་སྐུ་གཟུགས་བཟང་པོ་དག་ཉི་ ཞུ་ན་དག་ཉི་ཡེག་ཅོ།
16ན་ཤི་ལྷག་ཉི་ཆུམ་དེན་གེ་ ཨོ་ཐ་ཡི་གུ་ཁེ་པ་ ལའུ་དི་ཀི་ཡ་ག་ ཆོས་ཚོགས་ག་དེན་གེ་ ལྷག་ཉི་བི། ཉི་རོག་ཏེ་བ་ཀི་ ཀུན་ཏི་ཁཱན་ཡི་གུ་བུ་ ན་ཤི་ལྷག་ཅོ།
17ཉི་ཨར་ཁིབ་པཱས་ག་ཏཱན་ ནཱན་གི་ཉོང་ཁཱན་ གཙོ་བོ་ག་ལའི་ འགྲུབ་ཕ་ཨ་ཉི་རང་ ཨའི་ན་དག་ཉི་ཡེག་ཅོ།
18པ་ཝལ་ ཇང་ཏེན་ག་ ག་དང་གི་འབྲི་ཉི་ སྐུ་གཟུགས་བཟང་པོ་དག་ཉི་ཞུན༌ཅ། ཇ་ག་ཀེ་ཁཱན་ལྕགས་ ཡིད་ཀ་མ་མི། དཀོན་མཆོག་ག་ཐུགས་རྗེ་ ན་ཧ་བ་ཀབ་ཉི་ བཞུགས་གནང་ཆེན༎
Currently Selected:
ཀ་ལཱས་སི། 4: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
