གཉིས་པ་ཏི་མོ་ཐི། 2
2
དམ་ཚིག་ཙུང་ཁཱན་ ཡི་ཤུ་ག་དམག་མི།
1ཇ་ག་ཟ་ ཏི་མོ་ཐི་ ཁིརིས་ཡི་ཤུ་ག་ཆོ་ཁཱན་ ཐུགས་རྗེ་ག་ ནཱན་སྒྲིང་སྒྲིང་ཨ་ཉི་ཆོའི། 2འཛོམས་དཔང་དཔང་བཞག་ཨ་ཁཱན་ མང་པུ་ཐུར་ག་གུབ་ཀ་ ཇི་གི་ ན་ག་ཡེན་བི་ཁཱན་བ་ དམ་ཚིག་ཙུང་ཁཱན་ སོ་ངོ་བ་ཀ་ཡེ་ཉི་བི། ཧང་ཡ་དག་ནེ་ལ་ རོག་ཏེ་བ་ཀི་ བཱརའ་སོ་ངོ་བ་ཀ་ ཡེན་བི་ལེ་རེན་ཆེན། 3ཁིརིས་ཡི་ཤུ་ག་ ལེག་པུ་ཨ་ཉི་ཕྱག་ཞུ་ཁཱན་ དམག་མི་པུརུས་ཀིན་ཨ་ཉི་ ཇང་ཀབ་ཉི་ དཀའ་ཝ་ཅཱད༌ཅོ། 4དམག་མི་ནང་ཀ་ ལའི་ཨ་ཁཱན་དམག་མི་གི་ རོ་ཀ་དམག་དཔོན་ ཤོ་ནང་ཕེ་ལེ་མིག་པ་ ཕི་ཝ་ཨ་དེན་གེ་ རོ་ཀི་བཱརའ་ལའི་ཨ་ཉི་ ལམ་ཉེག་པེ་བི་ལུ་མཱན༌ཅ། 5ཇུག་པེ་ག་ ཟང་ཟག་པ་ཕི་ཁཱན་ སོ་ངོ་གི་ ཨོ་ཉ་ཁྲིམས་ལུགས་དང་ཏུ་ཉི་ མ་ཨ་ཝ་སག་པུ་ སེ་རབ་ཉོང་པུ་མཱན༌ཅ། 6ཐོག་ཤོ་ལེ་གང་ཀ་ གོ་རང་ དཀའ་ཝ་ཅཱད་ཉི་ ལའི་ཨ་ཁཱན་སོ་ངོ་གི་ རོ་ཀ་ཕང་ཉོང་པེ་ཁེ༌ལེ། 7ཇི་གི་ཡེག་ཁཱན་ག་ཀོར་གེ་ མིན་གོད༌ཅོ། ཉི་གཙོ་བོ་གི་ ཨོ་ཐ་བ་ ཐམས་ཅན་རང་ ཧ་གོ་ཝ་ཅོད་ཉི་གནང༌མེ།
8སེམས་ཀ་ཐའི་ གཤགས་པ་གེ་ ལོག་ཉི་བཞེངས་ཁཱན་ཤོ་ ཡི་ཤུ་ཁིརིས་གི༌ལ། ཉི་དཔོན་ད་ཝུད་ག་ མི་རྒྱུད་གེ་བྱོན་ཁཱན་བུ་ རོག་གི༌ལ། ཉི་ཨུ་ཐུ་ཤོ་ ཇི་གི་བཤད་ཁཱན་ འཐེན་ལེག་པུ་གི༌ལ། 9ཇི་གི་འཐེན་ལེག་པུ་ བཤད་པ་ཨ་དེན་གེ་ ཇང་ཁྲིམས་པ་ གི་ཝ་པུརུས་ཀིན་ཨ་ཉི་ ལྕགས་ཀེ་ཉི་ དཀའ་ཝ་ཅཱད་ཉི་ཆོ་ཝ༌ཅ། དག་པ་ཀབ་ཉི་ དཀོན་མཆོག་ག་གསུང་ཁེ་པ་ ལྕགས་ཀེ་ཉི་ ཐ་ཝ་མཱན༌ཅ། 10ཨོ་ཉི་ཨ་དེན་གེ་ སི་ཁཱན་བ་ཀི་ ཁིརིས་ཡི་ཤུ་གེ་ཨ་ཉི་ ཐར་པ་དང་ཏབ་ཐུར་ག་ མ་འགྱུར་བརྟན་པ་ག་ གཟི་བརྗིད་ཉོང་ཅེན་དག་པ་གི་ ཇང་ ཨོ་ཐ་བ་ ཐམས་ཅན་རང་ ཐེས་ཉི་ཆོན༌ཅ། 11ཨོ་ཐེན་ཡེག་པེ་ག་དེན་མེ་
ཨའི་རོག་ཀབ་ཉི་ ཤིན་ཐཱན་ཨ་ནེ་ལ་ ཨའི་རོག་ཀབ་ཉི་རང་ ཆོ་ལེ་གི༌ལ། 12ཨ་ཤི་ཐེས་པེ་རེ་ནེ་ལ་ ཨ་ཤི་ རོག་ཀབ་ཉི་ དབང་པེ་ཉོང༌པེ། ཉི་ཨ་ཤི་ རོག་གུམ་མ་ཡེ་ལ་དག་ཉི་ ཡེག་ནེ་ལ་ རོ་ཀི་བུ་ ཨའི་གུམ་མ་ཡེ་ལ་ཨ་ཉི་ གསུངས༌མེ། 13ཨ་ཤི་ དམ་ཚིག་མ་ཙུང་ནེ་བུ་ རོ་ཀི་དམ་ཚིག་ཙུང་གནང༌ཅ། ཧང་ཡ་དག་ནེ་ལ་ རོ་ཀི་ རོག་རྫུས་མ་ཅོད་པེ་མར༌བ༎
ལའི་ཨ་ལེ་ཆོག་ཁཱན་ལའི༌པ།
14དཀོན་མཆོག་ག་ སྐུན་མདུན་ག་ཡོང་ཨ་ཉི་ རོག་ཏེ་བ་ཀ་གསུང་ག་ཀོར་གེ་ རྩོད་པ་མ་ཕི་ཨ་ཉི་ཡེག༌ཅོ། ཧང་ཡ་དག་ནེ་ལ་ རྩོད་པ་ཕི་ལ་ཀབ་ཉི་ ལེག་པུ་ཨ་ལེ་མང་གི་ཝ་ ཉཱན་ཁཱན་སོ་ངོ་བ་ཀ་ནོད༌ཅ། 15དཀོན་མཆོག་ག་ ཐུགས་ཀ་ཚུད་ཉི་ ངི་ནང་ཁུ་ལེ་ མ་ཁེ་ལེ་དེན་གེ་ གནམ་མེད་ས་མེད་ ཙ་དྲེག་ཉི་ལའི་ཨའི། ཉི་དེན་པ་ག་ཀོར་གེ་ གསུང་ཕྲིག་ཕྲིག་ཨན་ ཡེ་ཉི་བི། 16མ་ཙང་མ་ཆཱས་དང་ ཇུང་ཁུངས་མ་ཁཱན་ རྩོད་པ་གེ་ ཇང་ཀིན་ཨན་ཆོའི། ཨོ་ཉེ་གི་ སོ་ངོ་བ་ དཀོན་མཆོག་གེ་ ལམ་རིང་མུ་ཅོད༌ཅ། 17ཨུ་ཉུ་ད་བུ་ཆཱས་ཤོ་ དྲག་པེ་མ་ན་ཁཱན་ སོ་ཕུ་ད་བུ་གི༌ལ། ཧུ་མེ་ནི་ཡཱས་དང་ ཕི་ལེ་ཏཱས་ ཨོ་ཉ་ག་དཔེ་གི༌ལ། 18རོག་ཉིག་ཙིང་གི་ དེན་པ་ལམ་ཁེ་པ་ ཐུབ་ཐཱན་ཐཱན་ གི་ཚེ་གེ་ཤ་ སོ་ངོ་བ་ལོག་ཉི་རང་ གསོན་པོ་ཨ་ཉི་ཝུ་ཝ་དག་ཡེག་ཉི་ དད་པ་ཨ་ཁཱན་ཚེ་བང་ག་ དད་པ་ཅོན་མེ་རིག༌ལ། 19དག་པ་ཀབ་ཉི་ དཀོན་མཆོག་ག་ རྨང་སྒྲིང་སྒྲིང་ཨ་ཉི་རང༌ཅ། ཨོ་ཉ་ག་ ཨོ་ཐེན་འབྲི་བ་ཅ་ རོ་ཀ་སོ་ངོ་བ་ གཙོ་བོ་གི་གུམ་ཡེན༌ཅ།#2:19 ཁ་ཇང་ག་དཔེ་ཆ་ 16:5 ཉི་རོག་ཏེ་བ་ གཙོ་བོ་ག་གི་ལ་ཨ་ཉི་ ཡེག་ཁཱན་བ་ཀི་ ལའི་ངན་པ་ཨ་ལེ་ག་ ཐུབ་ཐ་ལེ་ཁེ་ལེ་ཨ༌ཉི།
20ཕའི་ཆི་ལུ་ག་ནང་ཀ་ ཐབ་ཆ་ཚེ་བང་ གསེར་དང་དངུལ་གི་ ཅོད་པ་ཨུན༌ཅ། ཉི་ཚེ་བང་ ཤིང་དང་ས་གི་ ཅོད་པ་ཨུན༌ཅ། ཚེ་བང་ཤོ་ ལའི་ཆི་ལུ་ག་དེན་གེ་གི༌ལ། ཉི་ཚེ་བང་ཤོ་ ལའི་ཟེ་མུ་ག་དེན་གེ་གི༌ལ། 21ཉི་ཨི་བི་གི་ ཙང་མ་ཅོད་པ་ཐུར་ རོག་ཁེ་པ་ ལའི་ཆི་ལུ་ག་ ཐབ་ཆ་རི༌ལེ། ཉི་རོག་ དམ་པ་རི་ཉི་ ཕའི་ག་སྦྱིན་བདག་ག་དེན་གེ་ ལའི་ན་ཝ་རིན༌ཅ། ཉི་ལའི་ལེག་པུ་ ཐམས་ཅན་རང་ ཨ་ལེ་ག་ཅོག་པ་རི༌ལེ།
22ཡོན་མ་ག་འདོད་ཆགས་སྤང་ཤོ། ཉི་སེམས་ཙང་མ་ཨ་ཉི་ གཙོ་བོ་ག་མཚན་ག་ ཞུ་ཁཱན་བ་ཀབ་ཉི་ ཏབ་ཐུར་ག་ དྲང་པུ་དང་ སྙིང་རྗེ་ ཉི་དད་པ་དང་ སྐྱིད་པུ་ ཅོད་པེ་མིག་པ་ཕི། 23ཇི་གི་ ཨོམ་ཆང་རང་ཡེག་ཅ་ དེན་ཐ་དང་ ཇུང་ཁུངས་ཧང་རང་མ་ཁཱན་ ཆཱས་ག་ཀོར་གེ་ རྩོད་པ་མ་ཕི། ཧང་ཡ་དག་ནེ་ལ་ ཨོ་ཉེ་གི་ ཁོ་ལོང་ཤ་ ཨ་ལེ་རིག༌ཅ། 24གཙོ་བོ་ག་གཡོག་པ་གི་ ཁོ་ལོང་ཨ་ལེ་མང་གི་ཝ་ ལག་ཏང་ ཐམས་ཅན་ག་ བྱམས་པར་ཀེ་ཉི་ བཟོད་པར་སྒོམ་ཉི་ ལེག་པུ་ཨ་ཉི་ ཡེན་བི་ལེ་ཁེ༌ལེ། 25དེན་པ་ག་དགྲ་ཨ་ཁཱན་བ་ཀ་ བཅོ་ཁ་ཨ་ལ་ཀབ་ཉི་ ཉམ་ཆུང་ཨ་ཉི་ ཡེན་བི་ལེ་ཁེ༌ལེ། དཀོན་མཆོག་གི་ རོག་ཏེ་བ་ཀ་ སྡིག་པ་གེ་ལོག་པེ་ག་ གོ་སྐབས་གནང་ཉི་ རོག་ཏེ་བ་ཀི་ དེན་པ་ཁེ་པ་ སེ་ཝ་ད་བུ་ཏེ་ཨ་དུ། 26ཉི་རོག་ཏེ་བ་དྲཱན་མ་ཏག་ཉི་ བདུད་ག་ཁ་ཤོང་གེ་ གཱན་ཐར་བ་ད་བུ་ཏེ་ཨ་དུ། ཧང་ཡ་དག་ནེ་ལ་ རོག་ཏེ་བ་བདུད་ཀི་ཙུང་ཐཱན་ རོ་ཀ་འཆར་གཞི་ཁེ་པ་ ཨ་ལེ་བི་ཉི་ ཐ་ཝ་ཅ༎
Currently Selected:
གཉིས་པ་ཏི་མོ་ཐི། 2: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
