Rɔmu Siè 16
16
Tìɛníkɛrɔ́ àá bérɛ́ àá zen ɲininlɔ́
1Kìe hãá Febe lɛ iè hɔ̀ Sankere lóo Dɔfĩn zũnù bòo yìe lenlɔ dɔ̀ ɛ́ vaá-ɓen mì viì. Ɛ́ ń nɛ mi pen ɔ̀ ǹ sãàní. 2Mì pen ɔ̀ ǹ kɛ̀a bòo lɛ ɛ́ ɓɛ́ ńdɛsĩ̀riè ɛ́ dàa wóò pen ɓán kè Ɲunsɔ yèrè lɔ̀n, ɛ̀ mì sĩiní-ɛ àá bòo míkùi lɛ á mɛ̀kóo ɛ́ dɛ̀ ɛ́ kań nin mì viì. Iè hɔ̀ lɛ á sĩiniɛ nìnbirìe bìkuì, ɛ̀ ǹpe kùusɔ á sĩiniɛ cɛ̃̀un.
3Mì tìɛníkɛ a Pirisiile àá ɔ́ Akilaasi ǹ, ɓɛ̀pe lɛ ɛ́ páaníɛ ɛ́ ɔ̀ Yiezu Kirisa tɔnlɔ́ ɛ̀ tɛ́ àá mi. 4Ɓɛ̀ hṹn ɓɛ ɛ̀ vĩ́iní ɓɛ́ mɛkɛ̃nì ǹpe niǹ mɛkɛ̃nì fuenírɔ bòo hũn. Ɛ́ nín peɓɛ̀ bɛrikɛ ɛ̀ dé. Kɛ́ hɔ́ yí ńpe niǹ dòonún ɛ́ te peɓɛ̀ bɛrikɛ ɛ́ dé wɛ̀. Ɓɛ̀pe ńdɛsĩ̀riè lɛ yí ɓɛ́ Zuifuɓɛ ɓɛ́kùi ɛ́ lò ɓiɛ̀ ɛ́ peɓɛ̀ bɛrikɛ ɛ̀ dé. 5Ɛ̀ mì lò tìɛníkɛ ɓɛpe ńdɛsĩ̀riè lɛ wóo vɛ kóo ɓánlɔ̀n ɓà yíe.
Ɛ̀ mì tìɛníkɛ kìe biɛ̀ Epayinɛɛti ǹ, àpe ɛ́ temu wɔ́ á hán nìnbírɔ lɛ ɛ́ dũmuasɛ̃̀ à Kirisa ǹ hɔ̀ Azii pɛ̃̀hɛ̃ hũn#16.5 Hɔ̀ Azii pɛ̃̀hɛ̃ lɛ ɛ́ ɓɛ́ bòo ɛ̀ bie hũ̀nún ɛ́ wi hɔ zoòní cɛ̃̀mɛ̀nɛ́ lɛ ɛ́ ɓɛ́ wóò nɛ Turiki hũn..
6Ɛ̀ mì tìɛníkɛ a Maari ǹ, à tɛ́ hɔ́ tɔnlɔ́ ɛ́ lɔ́n ɛ́ bɔn cɛ̃̀un kè bòo hũn.
7Ɛ̀ mì tìɛníkɛ a Andoronikiise àá ɔ́ Zuniasi ǹ; ɓɛ̀ iè kìe nìɛ dɔ̀, ɛ̀ ɓɛ̀ hàarí páaníɛ zɔn lè kɛ̀sí àá mi; ɓɛ̀ iè Yiezu Kirisa tɔnkɛriè lɛ ɲúuhɛ̃ lìkɛ cɛ̃̀un. Ɓɛ̀pe ɛ́ yɛ̀rɛ́ dũmuasɛ̃̀ à Kirisa ǹ ɛ́ cɔ́ mi.
8Ɛ̀ mì tìɛníkɛ a Anpiliyatiise lɛ iè kìe biɛ̀ à Kirisa hũn.
9Ɛ̀ mì tìɛníkɛ a Uribɛ̃n lɛ páaníɛ ɛ́ tɛ́ àá kie à Kirisa tɔnlɔ́ hũn àá kìe biɛ̀ Sitakiise ǹ.
10Ɛ̀ mì tìɛníkɛ a Apelɛɛsi ǹ lɛ ɛ́ zɛ̃́niɛ àá mí bɔ̀werà kɛ́ á dũmuasɛ̃̀ à Kirisa ǹ àá bɔ̀bín; ɛ̀ mì tìɛníkɛ a Arisitobiile zũnù nìɛ ǹ.
11Ɛ̀ mì tìɛníkɛ a Herodiyɔn lɛ iè kìe zũnù nùún dɔ̀; ɛ̀ mì tìɛníkɛ a Nasiise zũnù nìɛ ǹ, ɓɛ̀pe lɛ ɛ́ dũmuasɛ̃̀ à Ɲunsɔ́ ǹ.
12Ɛ̀ mì tìɛníkɛ a Tirifɛɛnɛ àá ɔ́ Tirifɔɔsi ǹ, ɓɛ̀pe hã́a lɛ ɛ́ ɔ̀ Ɲunsɔ tɔnlɔ́ ɛ̀ tɛ́ cɛ̃̀un.
Ɛ̀ mì tìɛníkɛ kè ɓàa Pɛrɛsiide ǹ, àpe lɛ ɛ́ tɛ́ á Ɲunsɔ tɔnlɔ́ ɛ́ lɔ̀n bɔn cɛ̃̀un.
13Ɛ̀ mì tìɛníkɛ a Rufiise ǹ, àpe lɛ á Ɲunsɔ ɛ́ munɛ ɛ́ wɔ́ àá mí tɔntɛ́, ɛ̀ mì lò tìɛníkɛ ɓà nín lɛ lò ɓiɛ̀ tan iè ǹpe kìe nín.
14Ɛ̀ mì tìɛníkɛ a Asɛnkirite ǹ àá ɔ́ Filezɔn àá ɔ́ Hɛrɛmɛɛsi àá ɔ́ Patorobaasi àá ɔ́ Hɛrɛmaasi àá ɓɛ́ kìe zɛ̀ɓɛ̀ lɛ ɛ́ wi yán àá ɓɛ́.
15Ɛ̀ mì tìɛníkɛ a Filolɔɔki ǹ àá ɔ́ Zulii àá ɔ́ Neree àá ɓá hãá, àá ɔ́ Olɛnpaasi àá ɓɛ́ ńdɛsĩ̀riè lɛ ɛ́ wi yán àá ɓɛ́ ɓɛ́kùi.
16Mì fòoníkɛ ɓán sãa sãa àá wanminu. À Kirisa ńdɛsĩ̀rìe ńkóoɓánlɔ̀n nìɛ ɓɛ́kùi ɛ́ mì tìɛníkɛnin.
17Kìe zɛ̀ɓɛ̀, nín mì hɛ̃nnin nɛ mí pɛ mite bòo àá ɓɛ́ nìnbirìe lɛ wóò dé hɔ́ ńsankɛà ɓɛ̀ ńdɛsĩ̀rìe tĩ́ihṹ. Ɓàasiè ɛ́ wóò vĩ́iní ɓɛ́ ńdɛsĩ̀riè àá ɓɛ́ biehĩ́, iè hɔ̀ lɛ ɛ́ ɓɛ́ den yáà tɛ̀ hɔ̀ kɛ̀ránlɔ́ lɛ ɛ́ mí yú bòo wɛ̀. Ɛ́ mí wóo nɛ mi viì ɛ̀ niìní àá ɓɛ́. 18Ɓɛ̀pe nìnbirìe sí ɓà ńmàa ɛ́ yí ké Ɲunsɔ Kirisa tɔnlɔ́ ɛ́ ɓɛ́ ɛ́ tɛ́ wɛ̀. Kɛ́ hɔ́ iè peɓɛ̀ vùkùo tɔnlɔ́ ɛ́ ɓɛ́ ɛ́ tɛ́. Ɓɛ̀ wóò fĩiní ɓɛ nìnbirìe lɛ ɲɛùn yí be hɔ ńdɛsĩ̀nlɔ́ hũn àá ɓɛ́ bentĩɛ̀ àá ɓɛ́ nìkhɛ̃̀níkɛà biehĩ́.
19Ɛ̀ mìpe ɛ́ ɓɛ́ nìnbirìe ɓɛ́kùi ɛ́ dũ bòo kɛ́ mí ɛ́ ɔ̀ Ɲunsɔ bòo ɛ̀ ɲí. Ɛ́ ń wɛ niǹte mì bòo hũn, kɛ́ ń den ɛ́ cɛ̀ nɛ mi wé bɔ̀dũmunù ɓàasiè hɔ̀ bɔ̀tente wénlɔ́ hũn, kɛ́ mí den wóo làá ɛ̀ mì kɛ́ hɔ́ bɔ̀koohɔ́. 20Dɔfĩn lɛ ɛ́ te le hũn-wiɛ̀ ɛ́ wóò lɛ́ ɛ́ ɓén fɛ̀cɛ́kɛa Sitũanɛ mì laà hũn hũ̀nún àá bìcínbóo.
Nɛ ke Ɲunsɔ Yiezu hìi ɛ̀ wé àá miɛ. 21Timote, àpe lɛ ɛ́ tɛ́ àá mí ɛ́ mì tìɛníkɛnin. À Likiise àá ɔ́ Zazɔn àá ɔ́ Sosipatɛɛre lɛ iè kìe nìɛ dɔ̀ ɛ́ lò ɓiɛ̀ ɛ́ mì tìɛníkɛnin. 22Ɛ́ ńpe Tɛrɛtiisi lɛ ɛ́ te hɔ́pe bòo lɛ á Pooli ɛ́ bie ɛ́ wĩ́ kóo lepe vɛ̃hṹ sɔ lɛ hũn ɛ́ mì tìɛníkɛnin kè Ɲunsɔ yèrè lɔ̀n.
23À Kayiise lɛ iè ǹpe Pooli làarɔ ɛ́ mì tìɛníkɛnin. Hɔ̀ iè piè yíe ɛ́ ɓɛ́ ńdɛsĩ̀rìe ɛ́ wóò kóo ɓánlɔ̀n hũn. Erasite, àpe lɛ iè hɔ̀pe lóo mɛ̀bìsíkɛ ɛ́ mì tìɛníkɛnin; à kìe zuú Karitiisi ɛ́ lò ɓiɛ̀ ɛ́ mì tìɛníkɛnin. [24Nɛ ke Ɲunsɔ Yiezu Kirisa hiì ɛ̀ wé àá mípe mìkùi, Amiina.]
Dɔfĩn ɓàaníninlɔ́
25Mì lɛ́ nɛ ke ɓàaní Dɔfĩn! Hɔ̀ dàa pànkɛ́ lɛ ɛ́ lɛ́ ɛ́ mí ńdɛsĩ̀nlɔ́ ɛ́ fɛ́sí dìń sãàní ɛ́ ɓáaníɓán àá lé Bentĩnu lɛ ɛ́ nín buie, lèpe Bentĩnu lɛ ɛ́ ɔ̀ Yiezu Kirisa bòo ɛ̀ bie. Dɔfĩn ɛ́ khie àá lépe Bentĩnu sɔ ɛ́ dàa zɛ̃́niɛ mí bòo lɛ hṹn tànkɔniɛ hɛ̀rí hàarí. 26Kɛ́ kɛ̀a sáalɛ, ɛ́ hɔ́ bòo lɛ ɛ́ Dɔfĩn bɔ̀háaníriè wɛ̃́ ɛ́ lɛ́ ɛ́ hɔ́ den wo lóo hɔ ńpiemu hũn, kɛ̀a bòo lɛ ɛ́ hɔ́pe Dɔfĩn lɛ yáa vé ɛ́ dàa nɛ hɔ wé, bòo lɛ ɛ́ wé ɛ̀ lè sṹsùnù nìnbirìe ɓɛ́kùi ɛ̀ ɲí lé bienù sɔ, ɛ̀ ɓɛ̀ dɛsĩ̀, ɛ̀ ɓɛ̀ dàá tɛ̀ hɔ̀pe Dɔfĩn bòo.
27Nɛ hɔ bɔ̀dũmunù ɓàasɔ Dɔfĩn mí dòonún yèrè ɛ̀ ɓàaní pɛ̃̀hṹ lɛ yá vé hũn, Yiezu Kirisa yèrè lɔ̀n, Amiina!
Currently Selected:
Rɔmu Siè 16: bwj
Highlight
Share
Compare
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
