Rɔmu Siè 14

Mì bí wóo lè mì ńkɔhĩ́ lìe wɛ̀

1Mì wóo dàá ɔ́ nìnbírɔ lɛ ńdɛsĩ̀nlɔ́ zɛ́wi sãaní, ɛ̀ mì bí wóo wũ̀aní-ɛ piè bòo lɛ á wóò nùún nɛ mí fɔ́ɓán ɛ̀ mí wóò wé bòo hũn wɛ̀.

2Ɛ́ mí húi lò! Àdɔ̀ wóo nɛ mí dɛ̀ bòo míkùi ɛ́ dí, àdɔ̀ lɛ ńdɛsĩ̀nlɔ́ zɛ́wi ɛ́ ɓiɛ̀ wóo nɛ hɔ iè bɔ̀vɛ̀riè mí dòonún ɛ́ mí dɛ̀ ɛ́ dí. 3Á nìnbírɔ lɛ wóò dí hɔ́ bòo míkùi ɛ́ yí fɔ́ɓán à wóo ɲìí ɔ́lɛ ɛ́ yáà dí hɔ́ bòo míkùi, àlɛ ɛ́ yáà dí hɔ́ bòo míkùi ɛ́ ɓiɛ̀ yí fɔ́ɓán à wóo bie nɛ alɛ wóò dí hɔ́ bòo míkùi ɛ́ wé khe wɛ̀; iè hɔ̀ lɛ ɛ́ Dɔfĩn ɛ́ lò ɓiɛ̀ tɛ̀ à bòo. 4Ɛ́ kɔ́pe iè wie ɛ́ kɔ́ dàa nɛ àdɔ̀ tɔntɛ́ ɛ́ wé khe? Kɛ́ á dɛ̃̀ sãa mí tɔnlɔ́ hũn tàá kɛ́ á yí dìń sãàní, ɛ̀ hɔ̀ iè piè ɲúnsɔ ɛ́ hɔ́ cɛrɛkɛa. Kɛ́ á lò ɓén dìń sãàní, iè hɔ̀ lɛ ɛ́ Ɲunsɔ ɛ́ dàa hɔ pànkɛ́ lɛ dɛ̀ ɛ́ lɛ́ á dìń sãàní.

5Àdɔ̀ viì ɛ̀ hɔ̀ wihĩ́ dɔ̀ ɛ́ bòo hie pɔ hɔdɔ̀, ɛ̀ ɓɛ̀dɔ̀ viì ɛ̀ hɔ̀ wihĩ́ míkùi ɛ́ màamán. Ɛ́ hɔ́rɔn nìnbírɔ ɛ́ fɔ́ɓán à wóo dɛsĩ̀ mí bòo lɛ á ɛ́ lieníkɛ mí tĩì hũn. 6Álɛ ɛ́ wóò bè hɔ̀ wihĩ́ dɔ̀ bòo ɛ̀ hièní ɛ́ wóò wé hɔ́ ɛ̀ dàá ɓàaní Ɲunsɔ ǹ; àlɛ ɛ́ wóò dí hɔ́ bòo míkùi ɛ́ wóò dí hɔ́ ɛ̀ dàá ɓàaní Ɲunsɔ ǹ, iè hɔ̀ lɛ á wóò dé Dɔfĩn bɛrikɛ hɔ̀ díe lɛ á yú bòo hũn. Àlɛ ɛ́ yáà dí bòo míkùi ɛ́ iè Ɲunsɔ yèrè ɓàanírɔ́ bòo hũn á dàa yáà dí hɔ́ wɛ̀; ápe lò ɓiɛ̀ ɛ́ wóò dé Dɔfĩn bɛrikɛ. 7Iè hɔ̀ lɛ ɛ́ hɛ̀rí nìnbírɔ kè tĩ́ihṹ lɛ ɛ́ wóò kań lé mɛkɛ̃nì hũn mí kùrú bòo hũn ɛ́ mí, àlɛ ɛ́ wóò hí mí kùrú bòo hũn ɛ́ mínɛ wɛ̀. 8Kɛ́ ké ɓen wi le mɛkɛ̃nì hũn, ɛ̀ kè wi le mɛkɛ̃nì hũn kè Ɲunsɔ bòo hũn, ɛ̀ kè ɓen húrun, ɛ̀ hɔ̀ iè kè Ɲunsɔ bòo hũn ɛ́ ké dàa húrun. Ɛ́ kɛ̀amu, kɛ́ ké wi le mɛkɛ̃nì hũn tàá kɛ́ ké húrun, ɛ̀ kè bòo ɛ́ sɛ̃̀ à Ɲunsɔ ǹ. 9Iè hɔ̀ lɛ á Kirisa ɛ́ húrun à vìé lɔ́, bòo lɛ ɛ́ wé à dàá wé ɓɛ́ nìhiè àá ɓɛ́ lɛ yìe wi Ɲunsɔ. 10Ɛ́ kɔ́pe, hɔ̀ iè ńɓùo ɛ́ kɔ́ dàa nɛ mì zuú ɛ́ wé khe? Hɔ ńɓùo ɛ́ dàa ɛ́ mì zuú ɛ̀ ɲìí? Kèpe kè kùi ɛ́ ɓén zɔn dɔ̀ ɛ́ vɛ́ dìń Dɔfĩn híɛhɔ́, ɛ́ Hɔ́ ɛ́ lè kè lìe. 11Iè hɔ̀ lɛ ɛ́ Hɔ́ wɛ̃́ lé Dɔfĩn bienù vɛ̃hṹ hũn nɛ hɔ́pe Dɔfĩn ɛ́ bie ɛ́ nɛ làa:

Ǹpe Ɲunsɔ lɛ yìe wi ɛ́ bie ɛ́ nɛ làa:

Nìnbirìe ɓɛ́kùi ɛ́ ɓén síɛ hèkɛsí ɓɛ́ nunkɛ́yìe lɔ̀n niǹ híɛhɔ́,

Ɛ̀ nìnbirìe ɓɛ́kùi ɛ́ ɓén lɛ́ ɓàarɔ́ mi ǹ.

12Ɛ́ kɛ̀amu, kèpe àá ké nì-cóohɛ̃ ɛ́ hɔ́rɔ ɛ́ ɓén munkɛ mí bòo lɛ á wɔ́ Dɔfĩn híɛhɔ́.

Bí wé mì ńkɔnù kuenírɔ́ wɛ̀

13Ɛ́ kɛ̀amu, ɛ́ mí bí bĩní nɛ ke wóò lè ɓán lìe, kɛ́ mí muń mí tĩɛ̀ hũn nɛ mí yá wé bòo dɔ̀ lɛ ɛ́ lɛ́ ɛ́ mì zuú dɔ̀ ɛ̀ kenkení ɛ̀ kùén wɛ̀. 14Ń dũmuasɛ̃̀, ɛ̀ kè Ɲunsɔ Yiezu ɛ́ lɛ́ ɛ́ ń dũ sãa sãa kɛ́ bòo dɔ̀ lɛ ɛ́ lɔn míte ǹ ɛ́ mí wɛ̀. Ɛ́ kɛ́ ádɔ̀ ɛ́ líi à nɛ bòo dɔ̀ ɛ́ lɔ̀n, hɔ́rɔsí ɛ̀ hɔ̀ lɔn ɓàasɔ viì. 15Kɛ́ hɔ́ bòo lɛ ɛ́ kɔ́ wóò dí ɛ́ ɓen wóò lɛ́ lé tĩyaarè mì zuú ǹ, hɔ́rɔsí ɛ̀ kɔ̀ bĩniɛ yá vɛ lé wanminu hũn wɛ̀. Ɛ́ kɔ́ bí lɛ́ à nìnbírɔ lɛ á Kirisa ɛ́ húrun yènsénín ɛ̀ vĩ́, kɔ̀pe kɔ̀ díe lɛ ɛ́ kɔ́ wóò dí bòo hũn wɛ̀. 16Ɛ́ mí lɛ́ nɛ hɔ bòo lɛ sãa mìpe mì viì, ɛ̀ wé bòo lɛ ɛ́ mii lɛ́ ɛ̀ ɓɛ̀dɔ̀ ɛ̀ yaa mi yèrè wɛ̀. 17Iè hɔ̀ lɛ ɛ́ Dɔfĩn bɛ́záanú ɛ́ yí díe àá mí ɲunlɔ́ bòo, kɛ́ hɔ́ iè hɔ̀ cã̀anírɔ́ àá lé hũn-wiɛ̀ àá lé tĩwiɛ̀ lɛ ɛ́ lé Mɛkɛ̃n-Sãanu ɛ́ te wóò lɛ́. 18À nìnbírɔ lɛ ɛ́ wóò tɛ́ á Kirisa tɔnlɔ́ kɛ̀a hɔ́pe sí ɛ́ bòo ɛ́ wóò tĩìní Dɔfin ǹ ɛ̀ ɓɛ̀ nìnbirìe ɛ́ lò wóò tɛ̀ piè bòo.

19Ɛ́ mí lɛ́ nɛ ke cɛ̀ hɔ̀ bòo lɛ ɛ́ wóò lɛ́ lé hũn-wiɛ̀, àá hɔ́lɛ ɛ́ wóò lɛ́ ɛ̀ kèpe kè kuì vɛ àá híɛhɔ́ hɔ̀ ńdɛsĩ̀nlɔ́ hũn. 20Ɛ́ hɔ́ dínlɔ́ bòo hũn, ɛ́ kɔ́ bí yáakɛ Dɔfĩn tɔnlɔ́ wɛ̀. Hɔ̀pe wo bɔn kɛ́ hɔ́ díe míkùi ɛ́ dɛ̀ wóo dí, kɛ́ hɔ́ yí sãa ɛ̀ kɔ̀ dí bòo dɔ̀ lɛ dɛ̀ ɛ́ lɛ́ ɛ́ mì ńkɔnù ɛ́ wé bɔ̀koohɔ́ wɛ̀. 21Hɔ̀ lɛ sãa, iè hɔ̀ lɛ ɛ̀ mí bí lɛ̀ hɔ̀ taà, ɛ̀ mì lò bí ɲu hɔ ɲɛmù, ɛ̀ mì bí wé hɔ́ bòo dɔ̀ lɛ dɛ̀ ɛ́ lɛ́ ɛ́ mì ńkɔnù dɔ̀ ɛ́ wé hɔ́ bɔ̀koohɔ́ wɛ̀. 22Ɛ́ kɔ́ kùrú bòo lɛ ɛ́ kɔ́ dũmuasɛ̃̀ nin hɔ̀pe bòo sí nín bie hũn, ɛ́ kɔ́ ɓɛ́ɓɛ́nin kɔ̀ tĩì hũn Dɔfĩn híɛhɔ́. À nìnbírɔ lɛ tĩì ɛ́ yáà yaa hɔ̀ bòo lɛ á munɛ ɛ́ mii wé hũn ɛ́ ɲún tĩ. 23Kɛ́ á nìnbírɔ lɛ ɛ́ hɔ̀ díe dɔ̀ ɛ̀ dí kɛ́ á ɛ́ nùún nɛ mí hṹn yí fɔ́ɓán ɛ̀ mí dí hɔ́, à ɛ́ wé khe, iè hɔ̀ lɛ ɛ́ hɔ́ bòo lɛ á ɛ́ wé ɛ́ yí ɓáaɓán àá hɔ́ ńdɛsĩ̀nlɔ́ wɛ̀. Ɛ̀ hɔ̀ bòo lɛ ɛ́ nìnbírɔ ɛ́ wóo wé míkùi kɛ́ hɔ́ yí ɓáaɓán àá hɔ́ ńdɛsĩ̀nlɔ́ ɛ́ iè bɔ̀koohɔ́.

Currently Selected:

Rɔmu Siè 14: bwj

Highlight

Compare

Copy