Kolɔɔsi Siè 4

1Ɛ̀ mìpe wɔhĩ́ ɲúuhɛ̃siè, mì wóo wé bɔ̀tente àá mí wɔhĩ́, ɛ̀ dàá ɓɛ́ àá hɔ́ cã̀anírɔ́. Ɛ̀ mì ɛ̀ dũń kɛ́ mípe kùusɔ ɛ́ ɓiɛ̀ dàa ɔ́ Ɲunsɔ lɛ yòó wi hɔ hóohũn.

Hɔ̀ bérɛ́ biehĩ́

2Mì vɛ àá híɛhɔ́ ɛ̀ wóo hɛ̃un Dɔfĩn, ɛ̀ mì piɛní mí yìe pehɔ̀ hũn, ɛ̀ mì wóo dé hɔ́pe Dɔfĩn bɛrikɛ. 3Ɛ̀ mì lò ɓiɛ̀ wóo hɛ̃un Dɔfĩn ɛ̀ lɛ́ kie ǹ, nɛ Hɔ hán lé wṹn ɛ̀ lɛ́ kie ǹ ɛ̀ kè buie pehɔ̀ bienù, bòo lɛ ɛ́ wé ɛ̀ ǹ wo yí-e Kirisa bòo lɛ ɛ́ hṹn tànkɔ̀niɛ ɛ̀ bie. Hɔ̀ den iè hɔ̀pe bòo hũn ɛ́ ń dàa wi le kɛ̀sí hũn. 4Ɛ́ mí wóo hɛ̃un nɛ ń dàń hɔ́ ɛ̀ wóo khɛ́ ciení kɛ̀a bòo lɛ ɛ́ ń dàa sãawi ɛ̀ ǹ wé hɔ́.

5Mì wóo dàá míte àá bɔ̀dũmunù ɓɛ̀ nìnbirìe lɛ ɛ́ yí ɓɛ́ ńdɛsĩ̀riè híɛhɔ́, ɛ̀ mì yì lè pɛ̃̀hṹ lɛ wi mi híɛhɔ́. 6Mì wóo lɛ́ nɛ mi biehĩ́ ɛ̀ wé biehĩ́ lɛ sãa fúu, ɛ̀ pehɔ̀ tũ̀nú ɛ̀ wóo wé, bòo lɛ ɛ́ wé ɛ̀ mì wóo dũń hɔ́ bòo lɛ ɛ́ mí ɛ́ mii dàá kɔ̃́ní hɔ́rɔ àá mí híɛhɔ́.

Víeníkɛlán tɛmu àá tìɛníkɛrɔ́

7Kɛ́ hɔ́ ɓen kɛ́ hɔ́ bòo lɛ ɛ́ ńpe ɛ́ te dàa kɛsí, à Tisiike lɛ iè kìe zuú lɛ ɛ́ ń wɛ, lɛ iè Ɲunsɔ tɔntɛ́ lɛ ɲún ɛ́ cã̀aní, lɛ iè kiè ńtɛ́ɓánlɔ̀n nùún ɔ̀ Ɲunsɔ tɔnlɔ́ hũn, ɛ́ ɓén khɛ́ hɔ́ míkùi ɛ́ lɛ́ miɛ ǹ. 8Ɛ́ hɔ́ den iè pe hɔ̀ bòo hũn ɛ́ ń dàa tɔrɛ à nɛ a ɓen mì viì, ɛ̀ ɓen bie hɔ bòo lɛ ɛ́ ké te dàa dɛ̃̀ ɛ̀ lɛ́ miɛ ǹ, à lò hĩ̀iníkɛ mi tĩɛ̀. 9À Oneziimu lɛ iè kìe zuú lɛ ɛ́ ké wɛ, lɛ ɲún ɛ́ cã̀aní, lɛ lò ɛ́ lé àá mípe mì viì ɛ́ bɔ̀ɓán àá ɔ́pe Tisiike. Ɛ́ ɓɛ́ ɓen ɓɛrɛ, ɛ̀ ɓɛ̀ ɓén khɛ́ hɔ́ bòo lɛ ɛ́ wé hũ̀nún míkùi ɛ́ lɛ́ miɛ ǹ.

10À Arisitaake lɛ páaniɛ wi le kɛ̀sí hũn àá mi ɛ́ mì tìɛníkɛnin. À Marike lɛ iè ɔ̀ Baranabaasi ɓà núrɔ ɛ́ te mí zuú ɛ́ lò ɓiɛ̀ ɛ́ mí tìɛníkɛnin. Mí lò wo yú hɔ́ bérɛ́ àpe Marike bòo hũn nɛ kɛ́ á ɓen ɓɛrɛ mì viì, ɛ̀ mì pen ɔ̀ ǹ sãàní. 11À Yiezu lɛ ɛ́ ɓɛ́ wóò ve nɛ Zusitiise ɛ́ lò ɓiɛ̀ ɛ́ mì tìɛníkɛnin. Ɓɛ̀pe nìɛ ɓɛ̀ tĩ sí ɓɛ́ dòonún ɛ́ temu iè ɓɛ̀ Zuifuɓɛ lɛ iè ɓɛ̀ ńdɛsĩ̀riè lɛ ɛ́ hɔ̀ Dɔfĩn bɛ́záanú tɔnlɔ́ ɛ̀ tɛ́ àá mi. Ɓɛ̀ ɛ́ hĩ̀iniɛ niǹ tĩì hɔ̀ tɔnlɔ́ hũn cɛ̃̀un. 12À Epafaraase lɛ lò ɓiɛ̀ iè mì nìnbírɔ dɔ̀ ɛ́ mì tìɛníkɛnin. Àpe lɛ iè Yiezu Kirisa tɔntɛ́, á yáà tɛ àá Dɔfĩn hɛ̃nnɛ mì bòo hũn, bòo lɛ ɛ́ wé ɛ̀ mì fɛ́sí dìń sãàní, ɛ̀ wé ɓɛ́ nìnbirìe lɛ dɛ̃un vɔ́ hɔ́ Dɔfĩn bòo hũn, lɛ tɛ̀ ɛ́ ɓɛ wóo wé hɔ́pe Dɔfĩn tĩì bòo hɔ̀ bòo míkùi hũn. 13Ɛ́ ń dɛ̀ hɔ̀ bòo lɛ ɛ́ ń mɔn kɛ́ á ɛ́ wé ɛ́ bie nɛ á wóo tiɛní míte cɛ̃̀un mìpe mì bòo hũn, àá hɔ̀ Laodiise nìɛ bòo hũn, àá hɔ́ Hierapoliise nìɛ bòo hũn. 14À kiè pàá Liike lɛ iè ɔ̀ dɔkɔtɔrɔ àá ɔ́ Demaasi ɛ́ mì tìɛnikɛnin.

15Mì tìɛníkɛ ɓɛ kìe zɛ̀ɓɛ̀ lɛ wi hɔ Laodiise hũn, ɛ̀ mì lò tìɛníkɛ á Nɛmufa ǹ àá ɓɛ́ ńdɛsĩ̀rìe lɛ wóò vɛ kóo ɓánlɔ̀n piè yíe. 16Mí ɓen kɛ̀rɛa lèpe vɛ̃hṹ sɔ lɛ vɔ́, ɛ̀ mì lɛ́ nɛ ɓɛ Laodiise Dɔfĩn zũnù nìɛ ɛ̀ ɓiɛ̀ yí lé ɛ̀ kɛ̀rán, ɛ̀ mìpe ɛ̀ ɓiɛ̀ kɛ̀rán lé vɛ̃hṹ lɛ ɛ́ mii vɛ lé àá peɓɛ̀ viì. 17Mì bie lɛ́ á Arisiipe ǹ nɛ a ɓɛ́ɓɛ́ hɔ́ tɔnlɔ́ lɛ á Ɲunsɔ ɛ́ dɔ́ piè núnú hũn ɛ̀ tɛ́ sãàní ɛ̀ tíiní ɲunù.

18Ǹpe Pooli niǹte ǹ ɛ́ te hɔpe tìɛníkɛrɔ́ lɛ ɛ́ síɛ ɛ́ wĩ́ àá niǹ kùrú núnú. Mì wóo liení nìn bòo, ǹpe lɛ ɛ́ wi le kɛ̀sí hũn. Nɛ Dɔfĩn hiì ɛ̀ kań àá miɛ.

Currently Selected:

Kolɔɔsi Siè 4: bwj

Highlight

Copy

Compare