2 Piɛre 3

Ɲunsɔ khũ̀á ɓenlɔ́ bòo

1Kìe nìɛ lɛ ɛ́ ń wɛ, lɛ ɛ́ wo zĩ̀níkɛa iè niǹ ńɲunín vɛ̃hṹ lɛ ɛ́ nín wĩ́ ɛ́ nin lɛ́ miɛ ǹ. Ɛ́ hɔ́pe niǹ vɛ̃hɛ̃ bɔ̀nbɔ̀ ɲu míkùi hũn, ɛ́ ń den ɛ́ mì liení àá bòo lɛ ɛ́ mí dũ, bòo lɛ ɛ́ wé, ɛ̀ mì dàá wóo nùún hɔ́pe bòo sɔ bòo àá mí híɛhɔ́. 2Ń den wɛ nɛ mi wóo liɛní hɔ́ biehĩ́ lɛ ɛ́ ɓɛ́ Dɔfĩn bɔ̀háaníriè ɛ́ hàarí khɛ́ bòo, ɛ̀ mì lò wóo liení ké Ɲunsɔ lɛ iè kè Fuenírɔ ɲunù tɛmu ǹ, lèpe lɛ ɛ́ ɓɛ́pe Kirisa tɔnkɛriè ɛ́ te khɛ́ lɛ́ miɛ ǹ. 3Ɛ́ hɔ́ bòo míkùi híɛhɔ́, ɛ́ mí dũń sãàní kɛ́ hɔ́ mɛ́n-wihĩ́ hũn, ɛ̀ ɓɛ̀ nìnbirìe dɔ̀ ɛ́ ɓén síɛ hĩ́ní ɛ́ wé hɔ́ bòo lɛ pɔnù ɛ́ wóò ɓé ɓɛ́ ɛ́ ɓɛ́ ɛ́ bè máahṹ, ɛ̀ ɓɛ̀ wóo ɓén yáakɛ miɛ 4ɛ́ bie nɛ làa: «Àpe Yiezu Kirisa ɛ́ sũǹ yí lɛ́ mí ɲunù nɛ mí ɓén ɛ́ khũ̀á ɛ́ ɓen? Á wo wi àá yí? Kìe yàáɓɛ̀ ɛ́ húrunkɛ vɔ́ kɛ́ bòo míkùi ɛ́ den pɛ́wi dɛ̃̀ mí dĩ̀nlɔ́ ɛ̀ dàá vɛ mìí àá lépe dímíɲɛ́ mínlɔ́.» 5Ɛ́ ɓɛ́pe nìɛ lɛ ɛ́ bie kɛà mu ɛ́ den ninsĩniɛ àá còohĩ́ kɛ́ Dɔfĩn ɛ́ hàarí mɛ́ hɔ́ hóohũn àá lé súsũ̀nù àá mí ɲunù bienù, Hɔ̀ hàarí mɛ́ lé súsũ̀nù hɔ̀ ɲumu hũn, ɛ̀ Hɔ̀ fɛ́rɛ lè ɛ́ lɔ́ hɔ́ ɲumu ǹ. 6Ɛ́ hɔ̀ lò bĩniɛ iè hɔ̀pe ɲumu ɛ́ Dɔfĩn ɛ́ dàa hàarí yáakɛa lèpe ɓáanyíe dímíɲɛ́, pɛ̃̀hṹ lɛ ɛ́ hɔ́ hóo ɛ́ dàa hàarí ɓɛrɛ tɔ̀tɔ̀ ɛ́ fɔ́ lé sṹsùnù míkùi. 7Kɛ́ hɔ́ ɓen kɛ́ hɔ́pe zoòni hóohũn àá mí súsũ̀nù lɛ, ɛ̀ lèpe Dɔfĩn bienù dìcóoní sɔ ɛ́ te hɔ zɛ̃nkɛanin dìniɛ, ɛ́ dàa ɛ́ hɔ̀ dṹn lɛ mii ɓɛ̃́nkí cĩ̀ní hɔ́ ɛ̀ hìé. Ɛ́ hɔ́ den iè bòo lɛ ɛ́ Dɔfĩn ɛ́ bɔ̀sí ɛ́ dàa ɛ́ hɔ̀ lìe lènlɔ́ sítĩnlɔ́ ɛ̀ hìé, lɛ iè sí lɛ ɛ́ ɓɛ́ nìɛ lɛ yí bè lè Dɔfĩn wṹn ɛ́ dàa ɓén yaa ɓɛ́kùi.

8Kɛ́ bɔ̀cóoní dɔ̀ lɛ ɛ́ mí yí sãawi ɛ̀ mì hũn ɛ̀ ɓén nin ɛ́ iè hɔ̀ lɛ, mìpe kìe nìɛ lɛ ɛ́ ń wɛ: Ɲunsɔ viì ɛ́ wi-cóoni ɛ́ kɛ́ kɛ̀a lɔ́líe khĩɛ́-pírú ɛ̀ lɔ́líe khĩɛ́-pírú ɛ́ kɛ́ kɛ̀a wi-cóoni. 9Ɛ́ Ɲunsɔ ɛ́ yí wìe lɛ ɛ́ wóò míi ɛ̀ dàa wé hɔ́ bòo lɛ á lɛ́ mí ɲunù nɛ mii wé, kɛ̀a bòo lɛ ɛ́ ɓɛ́pe dɔ̀ ɛ́ dàa wóò lieníkɛ hɔ wɛ̀. Kɛ́ á den wóò hĩ̀ mí hũn àá miɛ, iè hɔ̀ lɛ á yí wɛ nɛ hɛ̀rí nìnbí-cóoní dɔ̀ ɛ̀ vĩ́, kɛ́ á den wɛ nɛ nìnbirìe ɓɛ́kùi ɛ̀ yí khũ̀á ɓɛ́ bɔ̀koohɛ̃ wénlɔ́ máahṹ.

10Kɛ́ á Ɲunsɔ sí ɛ́ den ɓén ɓen yòokɛ mi lɔ̀n kɛ̀a ie kɛ̃̀míi bòo sí. Ɛ́ pehɔ̀ zɔǹ, ɛ̀ lè tɛn-sũmúi dɔ̀ ɛ́ ɓén tɛ̀, ɛ́ hɔ́ hóohũn bòo míkùi ɛ́ hɔ́ dṹn ɛ́ wo ɓén cĩ̀ní ɛ́ yáakɛ, ɛ́ hɔ́pe hóohũn ɛ́ wo ɛ́ vĩ́i lé yán hĩ́ɔn, ɛ̀ lè súsũ̀nù àá hɔ́pe bòo lɛ ɛ́ wi pelè lɔ̀n míkùi ɛ́ ɓén vĩ́ ɛ́ lé yán. 11Ɛ́ hɔ́ lɛ ɛ́ hɔ́ bòo míkùi ɛ́ wo ɓén vĩ́i ɛ́ lé yán kɛ̀amu, ɛ́ mí wo dũń hɔ́ bòo lɛ ɛ́ mí sãawi ɛ̀ mì wé. Mì lɛ́ nɛ mite míkùi ɛ̀ bòo sɛ̃̀ Dɔfĩn, ɛ̀ mì wo cɛ dìń hɔ́pe Dɔfĩn sãàní, 12ɛ̀ dàa hìé lépe Dɔfĩn sí sɔ, ɛ̀ mì wé bòo míkùi nɛ le ɓen dɛ̃ fùa fùa. Ɛ́ lépe sí sɔ zɔǹ, ɛ̀ hɔ̀ dṹn ɛ́ ɓén cĩ̀ní hɔ́ hóohũn ɛ́ yáakɛ, ɛ̀ hɔ̀pe bòo lɛ ɛ́ yòó wi hɔ hóohũn ɛ́ zɔ́ hɛ̃un hɔ̀ dṹn pɔnù hũn. 13Kɛ́ Dɔfĩn ɛ́ den lɛ́ mí ɲunù nɛ mí ɓén mí hóohũn dɛ̀fĩì àá súsũ̀nù dɛ̀fĩì lɛ ɛ́ hɔ́ bɔ̀tente ɛ́ ɓén kań hũn. Ɛ́ sí den iè hɔ̀pe bòo lɛ ɛ́ ké ɛ́ hìé.

14Ɛ́ sí iè hɔ̀ pe, mìpe kìe nìɛ lɛ ɛ́ ń wɛ, ɛ́ ké wo ɓen wi yán ɛ́ lè sí sɔ ɛ̀ hìé, ɛ̀ mì pĩ̀iní míte ɛ̀ mì wé nìnbirìe lɛ ɛ́ ce, lɛ ɛ́ ńwékhemù dɔ̀ ɛ́ mí nin Dɔfĩn híɛhɔ́, ɛ̀ mì kań lé hũn-wiɛ̀ hũn àá hɔ́pe Dɔfĩn. 15Ɛ́ mí dũń kɛ́ á Ɲunsɔ bòo lɛ á dàa hɛ̃̀ mí hũn iè bòo á nɛ mi yí fuen. Àpe kìe zuú Pooli lɛ ɛ́ ké wɛ ɛ́ lò wɛ̃́ hɔ́ ɛ́ lɛ́ miɛ ǹ àá hɔ́ bɔ̀dũmunù lɛ ɛ́ Dɔfĩn ɛ́ lɛ́-à n. 16Ɛ́ sí iè pe á wóò wĩ́ kɛ̀amu mí vɛ̃hɛ̃ míkùi hũn, lɛ kɛ́ á dàa ɓen ɛ́ hɔ̀pe bòo sɔ bòo ɛ̀ bie. Piè vɛ̃hɛ̃ sɔ hũn, ɛ́ hɔ́ bòo lɛ á wɛ̃́ hɔ́ dáahĩ́ dɔ̀ ɛ́ hɛ̀ ɲún dũńlɔ́ lɔ̀nbiè wi. Ɛ́ ɓɛ́ nìnbirìe dɔ̀ lɛ ɛ́ yí kɛ̀rán hɔ́ Dɔfĩn bòo, ɛ̀ ɓɛ̀ lò yí fɛ́sí dìń sãaní, ɛ́ wóò khíi bĩníkɛ hɔ́pe biehĩ́ lɛ ɛ́ wɛ̃́ ɲún, kɛ̀a bòo lɛ ɛ́ ɓɛ́ dàa wóò wé hɔ́ àá lé Dɔfĩn bienù vɛ̃hṹ dáahĩ́ dɔ̀. Ɛ́ ɓɛ́ iè pe wo bɔ̀ ɓɛ́ yaanù wṹn kɛ̀amu.

17Kɛ́ mípe kìe nìɛ lɛ ɛ́ ń wɛ, ɛ́ ké iè pe wo ɲɛ̀ mì zeǹ lɔ̀n vɔ́ kɛ̀amu. Ɛ́ mí wo pɛ mite bòo, bòo lɛ ɛ́ wé ɛ̀ mì bí fùansí míte ǹ ɛ̀ ɓɛ̀pe nìɛ sɔ́ sí pɛ̃́ hɔ́ Dɔfĩn bòo ɛ̀ fĩiní miɛ ɛ̀ mì wo khíi làá lé lépe wṹn lɛ ɛ́ mí fɛ́sí dɛ̃̀ sãa lɔ̀n wɛ̀. 18Kɛ́ mí den vɛ àá híɛhɔ́ ɛ̀ bè kè Ɲunsɔ Yiezu Kirisa lɛ iè kè Fuenírɔ máahṹ, bòo lɛ ɛ́ wé á wookɛ wé mí hiì àá miɛ, ɛ̀ mì bĩní wookɛ dũń ɔ́ sãaní. Nɛ piè yèrè ɛ̀ ɓàaní kɛ̀a sáalɛ, àá fúu pɛ̃̀hṹ lɛ ɛ́ yá vé hũn! Amiina.

Currently Selected:

2 Piɛre 3: bwj

Highlight

Copy

Compare