2 Piɛre 2

Bɛ̀ ɓúo kɛ̀ránliè bòo

1Ɓɛ̀ ɓúo Dɔfĩn bɔ̀háaníriè dɔ̀ ɛ́ hàarí siɛ hĩ́nà ɓɛ̀ Yizarayɛɛle nìɛ tĩ́ihṹ, ɛ́ sí ɓiɛ̀ iè hɔ̀pe ɓà ńmàa ɛ́ ɓɛ́ ɓúo kɛ̀ránliè dɔ̀ ɛ́ ɓiɛ̀ dàa ɓén síɛ hĩ́ní mípe mì tĩ́ihṹ. Ɓɛ̀ wóo ɓén kɛ̀rán ɓɛ́ nìnbirìe àá hɔ́ ɓúo bòo lɛ wóò yaakɛ ɓɛ, ɛ̀ ɓɛ̀ wóo ɓén pĩ́-ɛ Ɲunsɔ lɛ lò hàarí yɛ̀ peɓɛ̀ ɲún bòo. Ɛ́ hɔ́pe lɛ ɛ́ ɓɛ́ ɛ́ wé kɛ̀amu, ɛ́ lé miikɛ ńtèmín ɛ́ wo ɓén pɛ pɛ ɛ̀ lè ɛ́ wua ɛ́ síɛ peɓɛ̀ lɔ̀n ɛ́ yáakɛ ɓɛ. 2Ɛ́ nìnbirìe bìkuì ɛ́ wóo ɓén bè peɓɛ̀ máahṹ peɓɛ̀ ńwékɛkũǹ hũn, ɛ̀ ɓɛ̀ wóo ɓén lɛ́ ɛ́ ɓɛ́ nìnbirìe ɛ́ tòokɛ hɔ bɔ̀berà wṹn. 3Ɛ́ ɓɛ́pe ɓúo kɛ̀ránliè sɔ ńbíɲì àá bòo ɛ́ wóo ɓén lɛ́ ɛ́ ɓɛ́ ɛ́ khɛ̃̀níkɛ miɛ àá hɔ́ hɛ́cín-biehĩ́ ɛ́ dàá vúa mí bòo. Kɛ́ peɓɛ̀ lìe ɛ́ den lɔ̀ vɔ́ hàarí ɛ̀ peɓɛ̀ yàanù ɛ́ wo bĩniɛ pɛ̃̀hṹ ɛ́ yí ni wɛ̀.

4Ɛ́ mí húi lò, Dɔfĩn ɛ́ den hàarí ɛ́ yí fùansí ɓɛ́ mɛlɛkɛɓɛ lɛ hàarí wɔ́ hɔ́ bɔ̀koohɔ́ ǹ wɛ̀, kɛ́ Hɔ́ den ɓaakɛa ɓɛ̀ ɛ́ súukɛa koo lè kṹun dɛ̀bɛhɔ́ hũn, ɛ́ ɓɛ́ wo ɛ́ can dɛ̃̀ yán àá hɔ́ zɔ̀kɔ̀zɔ́kɔ́ɓɛ̀ hɔ̀ síbínú hũn ɛ́ dàa ɛ́ hɔ̀ lìe lènlɔ́ ɛ̀ hìé. 5Ɛ̀ Dɔfĩn ɛ́ lò bĩniɛ hàarí yí fùansí lé dímíɲɛ́ dɛ̀khĩ́i ǹ wɛ̀, kɛ́ Hɔ́ den hàarí lɛ́ ɛ́ hɔ́ hóo ɛ́ tɔ̀ tɔ̀ ɛ́ hɔ́ ɲumu ɛ́ fɔ́ lépe dímíɲɛ́ sɔ míkùi, lèpe lɛ ɛ́ hàarí tú àá ɓɛ́ nìnbirìe lɛ hàarí ɛ́ yí bè hɔ̀pe Dɔfĩn wṹn. Kɛ́ Hɔ́ den hàarí wɔ́ Nowe mí dòonún ɛ́ Hɔ́ fueniɛ nin, àpe lɛ hàarí ɛ́ bie àá ɓɛ́ nìnbiriè nɛ ɓɛ wóo wé hɔ́ bɔ̀tente. ɛ̀ Hɔ̀ lò bĩniɛ fueniɛ nìɛ hùuɲu dɔ̀ ɛ́ páa ɔ̀pe Nowe lɔ̀n. 6Ɛ́ Dɔfĩn ɛ́ lò bĩniɛ hàarí lɔ̀ hɔ̀ lóoniɛ lɛ ɛ́ ɓɛ́ hàarí nɛ Sodɔɔmu àá Komɔɔre lìe ɛ́ vɛ ɲɛkɛ̃̀a. Ɛ́ Hɔ́ wo hàarí cĩ̀niɛ hɔ̀pe lóoniɛ sɔ àá hɔ́ dṹn ɛ́ hɔ́ wɔ́ sãani míkùi. Dɔfĩn ɛ́ den wɔ́ hɔ́pe sí ɛ́ dàa ɛ́ hɔ̀ bòo lɛ ɓén wé ɓɛ́pe nìɛ lɛ ɛ́ yí bè hɔ̀pe Dɔfĩn wṹn ɓɛ́kùi ɛ̀ zɛ̃́ní kɛ̀amu. 7Kɛ́ Dɔfĩn ɛ́ den hàarí fueniɛ ɔ̀ Lɔɔti lɛ hàarí iè nìnbírɔ lɛ ɛ́ cã̀aní. Àpe Lɔɔti ɛ́ den hàarí wóò kɛ́bí hɔ́pe lóoniɛ sɔ nìɛ ńwékɛkũǹ bòo hũn. 8Àpe lɛ iè ɔ̀ nìcã̀anírɔ ɛ́ hàarí wi ɓɛpe bɔ̀konwériè tĩ́ihṹ, ɛ́ sítĩnlɔ́ míkùi hũn á hàarí wóò mi hɔpe bɔ̀làahɛ̃ lɛ ɛ́ ɓɛ́ ɛ́ wé, à lò ɲí hɔ́ ben-làahɛ̃ lɛ ɛ́ ɓɛ́ ɛ́ khɛ́. Á den hàarí wóò kɛbí cɛ̃̀un iè hɔ̀ lɛ ápe ɛ́ iè nìcã̀anírɔ. 9Ɛ́ kɛ̀amu, ɛ́ Ɲunsɔ ɛ́ den dũ bòo lɛ á mii wé ɛ̀ dàá fuení ɓɛ́ nìɛ lɛ ɛ́ bɔ̀ piè wṹn ɛ̀ líení hɔ̀ hàanírɔ́ hũn, à lò dũ bòo lɛ á mii wé ɛ̀ dàá bìsí ɓɛ́ bɔ̀konwériè ɛ̀ dàá hìé hɔ́ lìe lènlɔ́ sí, ɛ̀ dàá vɛ́ peɓɛ̀ ɲɛkɛ̃̀a. 10Ɓɛ̀ nìɛ dɔ̀ wi yán ɛ́ wóò wé ɓɛ́ kùrú bòo lɛ ɛ́ ɓɛ́ wɛ ɛ̀ ɓɛ̀ bè máahṹ, hɔ̀pe lɛ lò iè bòo lɛ ɛ́ wóo liení ɓɛ́, ɛ̀ ɓɛ̀ lò yìe ɛ́ yáà tí Dɔfĩn ɲunù tɛmu wɛ̀. Ɛ́ Dɔfĩn ɛ́ ɓén wóokɛ ɛ́ vɛ́ ɓɛ́ ɲɛkɛ̃̀a cɛ̃̀un ɛ́ pɔní.

Ɛ́ ɓɛ́pe ɓúo kɛ̀ránliè sɔ ɛ́ den tú àá yèncànlè, ɛ̀ ɓɛ̀ lò ɲɛkɛ̃̀a dɛ̃un. Ɓɛ̀ yáà mɛ̀ndɛ̃ hɔ hóohũn pànkɛ́a lɛ ɛ́ hɔ́ ɓàarɔ́ ɛ́ wi nin, kɛ́ ɓɛ́ den ɛ́ wóò tòokɛ hɔ tòokɛrɔ́. 11Hɔrɔsí kɛ́ ɓɛ́pe mɛlɛkɛɓɛ lɛ lò pànkɛ́ wi cɛ̃̀un ɛ́ pɔ ɓɛpe ɓúo kɛ̀ránliè sɔ ɛ́ den yáà tɛ̀ ɛ̀ tòokɛ hɔpe hóohũn pánkɛ́a sɔ Ɲunsɔ híɛhɔ́ wɛ̀. 12Kɛ́ ɓɛ́pe nìɛ sɔ sí ɛ́ den wóò wé kɛ̀a ie ɓɛ bìlaàsiè lɛ ɛ́ hũn vànminù mí, lɛ ɛ́ fɔ́ɓán àá ńɓaakɛ ɓé mí dòonún iè hɔ̀ lɛ ɛ́ ɓɛ́ wóò tòokɛ hɔ bòo lɛ ɛ́ ɓɛ́ yí dũ wɛ̀. Ɛ́ ɓɛ́ iè pe ɛ́ ɓiɛ̀ ɓén hí kɛ̀a ie ɓɛpe bìlaàsiè bòo sí. 13Ɛ́ peɓɛ̀ bɔ̀koohɛ̃ lɛ ɛ́ ɓɛ́ wɔ́ míkùi ɛ́ kiè ɛ́ ɓén wĩ́ àá ɓɛ́. Ɓɛ̀ wóo wɛní ɓɛ́te ɛ̀ wé hɔ́ bɔ̀làahɛ̃ lɛ pɔnù ɛ́ ɓɛ̀ ɓé lé wúsɔndáabíi hũn. Ɛ̀ ɓɛ̀ ɓen wi ɓánlɔ̀n àá miɛ hɔ̀ sɛ́hĩ́ díe dínlén, ɛ̀ ɓɛ̀ wé hɔ́ yìrà bòo àá hɔ́ lùwiè bòo, ɛ̀ ɓɛ̀ wóò khɛ̃̀níkɛ miɛ, ɛ̀ ɓɛ̀ lò den pɛ́wi wɛní ɓɛ́te cɛ̃̀un. 14Peɓɛ̀ yìe húirɔ́ ɛ́ tú àá hɔ́ ńféɓán, ɛ̀ ɓɛ̀ yáà ɲì àá hɔ́ bɔ̀koohɛ̃ wénlɔ́ wɛ̀. Ɓɛ̀ wóò yí ɓɛ́ nìnbirìe lɛ ńdɛsĩ̀nlɔ́ pànkɛ́ mí ɛ̀ khɛ̃̀níkɛ yí nin. Yírɛ́ cànlɔ́ mí dòonún ɛ́ temu tú peɓɛ̀ tĩɛ̀. Ɛ́ ɓɛ́ den iè nìɛ lɛ ɛ́ dánkɛ́niɛ. 15Ɓɛ̀ làa lɔ́ lé wṹn lɛ ɛ́ cã̀aní lɔ̀n ɛ́ khie van vṹnun. Ɛ́ ɓɛ́ iè pe wo khie van bɔ̀ à Bosɔɔre zuú Balaamu wṹn lɛ á hàarí bɔ̀, àpe Balaamu ɛ́ den hàarí wɛniɛ hɔ̀ màa lɛ ɛ́ ɓɛ́ hàarí nɛ a fé à ɓiɛ̀ wé hɔ́ bɔ̀koohɔ́. 16Kɛ́ Dɔfĩn ɛ́ den hàarí fun àá ɔ́ piè bɔ̀koohɔ́ lɛ á hàarí wɔ́ bòo hũn. Ɛ́ ńnɛ̀kɛ̃nɓi-hṹnu dɔ̀, àá bòo lɛ ɛ́ ńnɛkɛ̃nɓiì lò yá bie míkùi, ɛ́ den hàarí zɔn bie àá ɔ́pe bɔ̀háanírɔ sɔ kɛ̀a ie nìnbírɔ́ bòo sí, ɛ́ dàa sun ɔ̀ á yí dàń mí khiehĩ́ bòo lɛ á hṹn mii wé ɛ́ yí wé wɛ̀.

17Ɛ́ ɓɛ́pe ɓúo kɛ̀ránliè sɔ ɛ́ den dɛ̃̀ kɛ̀a ie ɲumu kɛ̃nù lɛ ɛ́ ɲumu mí hũn, ɛ̀ ɓɛ̀ lò dɛ̃̀ kɛ̀a ie hɔ dũndùó lɛ ɛ́ lé pinpi-bɛhɔ́ ɛ́ súuní ɛ́ dàa cɔ́. Ɛ́ Dɔfĩn ɛ́ den sɛ́sɛ́a peɓɛ̀ kanlén hɔ̀ miikɛ síbínú lɛ cíɓɔ́ hũn ɛ́ dàa ɛ́ ɓɛ̀ hìé. 18Ɓɛ̀ wóò bie hɔ miikɛ yencànlé biehĩ́ lɛ ɲún dɔ̀ ɛ́ lò mí wɛ̀. Ɛ̀ ɓɛ̀ wóò mìí hɔ́ bòo lɛ pɔnù ɛ́ ɓɛ̀ ɓé, lɛ lò iè miikɛ lùwiè bòo, ɛ̀ dàá khɛ̃̀níkɛ ɓɛ́lɛ ɛ́ yú ɓɛ́te sáalɛ ɛ́ lɔ́ ɓɛ́pe nìɛ lɛ vṹnun tĩ́ihṹ. 19Ɓɛ̀ wóò bie lɛ́ ɓàn nɛ ɓɛ ɓén teń ɓɛ́te, hɔ́rɔsí kɛ́ ɓɛ́pe kùusɔ ɛ́ lò den iè ɓɛ̀ wɔhĩ́ ɓɛ́ bɔ̀koohɛ̃ lɛ te ɓɛ mii yaakɛ núnú hũn iè hɔ̀ lɛ ɛ́ hɔ́rɔ ńnìnbírɔ ɛ́ den iè wɔnù hɔ̀ bòo lɛ ɛ́ pànkɛ́ ɛ́ pɔ a núnú hũn. 20Ɛ́ kɛ́ nìnbirìe dɔ̀ ɛ́ ɓɛrɛ dũnɛ kè Ɲunsɔ àá ké Fuenírɔ Yiezu Kirisa, ɛ́ wo yú ɓɛ́te ɛ́ lɔ́ lé dímíɲɛ́ bòo lɛ ɛ́ wóò yáakɛa nìnbírɔ núnú hũn, kɛ́ ɓɛ́ bĩniɛ ɛ́ khũ̀á van zɔn hɔ̀pe bòo sɔ wénlɔ́ hũn, ɛ́ hɔ́ wo ɛ́ yú hɔ́ pànkɛ́ peɓɛ̀ lɔ̀n, ɛ́ peɓɛ̀ bòo lɛ ɛ́ ɓɛ́ te dàa wi ɛ́ bĩní wookɛ ɛ́ kɛ̃́nkɛ̃́nlɔ́ ɛ́ pɔní hɔ́ hán bòo. 21Ɛ́ kɛ́ ɓàasiè sɔ ɛ́ yɛ̀rɛ́ hṹn yí dũń lépe wṹn lɛ ɛ́ cã̀ní, ɛ̀ hɔ̀ bòo ɛ́ hṹn tṹ peɓɛ̀ viì, ɛ́ pɔ hɔ lɛ ɛ́ ɓɛ́ dũnɛ lè ɛ̀ ɓɛ̀ den khie khũ̀á ɛ̀ ɓɛ̀ kɛ́ Dɔfĩn ɲunù tɛmu lɛ ɛ́ Hɔ́ lɛ́ ɓà ǹ. 22Ɛ́ hɔ́pe bòo lɛ ɛ́ wɔ́ ɓà ǹ iè pe wo ɛ́ zɛ̃́ní kɛ́ lépe wĩ̀i lɛ ɛ́ ɓɛ́ wóo wĩ̀ ɛ́ den bɔn. Ɓɛ̀ wóò wĩ̀ lè wĩ̀i sɔ nɛ a bɔnù ɛ́ khũ̀a van ɛ́ hɔ̀ bòo lɛ á sɛ̃́ ɛ̀ dí, tàá ie ɓɛ ńtóo ɔ́ nɛ̀nbùɛnì vé lòo, à bĩniɛ khũ̀a van zɔn lúsí hɔ́ ntaanín hũn.

Currently Selected:

2 Piɛre 2: bwj

Highlight

Copy

Compare