2 Piɛre 1
1
Tìɛníkɛrɔ
1Hɔ̀ iè ǹpe Simɔn Piɛre lɛ iè Yiezu Kirisa tɔntɛ́ àá piè tɔnkɛrɔ ɛ́ te lepe vɛ̃hṹ lɛ ɛ́ wĩ́ ɛ́ nin lɛ́ mípe lɛ ɓɛ́lɛ ɛ́ Dɔfĩn ɛ́ lɛ́ ɛ́ mí dũmuasɛ̃̀ à Yiezu Kirisa ǹ kɛ̀a ie kepe. Ɛ́ hɔ́pe ńdɛsĩ̀nlɔ́ ɛ́ den bòo ɛ́ hie kèpe kè kùi viì. Yiezu Kirisa ɛ́ lɛ́ hɔ́pe ńdɛsĩ̀nlɔ́ sɔ kie ǹ iè hɔ̀ lɛ á ɛ́ cã̀aní. Àpe ɛ́ iè Dɔfĩn à lò ɛ́ iè kè fuenírɔ. 2Nɛ hɔ lɛ ɛ́ mí dũ Dɔfĩn àá ké Ɲunsɔ Yiezu ɛ̀ lɛ́ ɛ́ mì ɛ̀ yí lé hiì àá lé hũn-wiɛ̀ sãaní.
Mì pĩ̀iní míte ɛ̀ mì wóo dàá míte sãàní
3Yiezu Kirisa àá mí Dɔfĩn-yáamú pànkɛ́ ɛ̀ lɛ́ ɛ́ ké dũnɛ hɔ̀pe Dɔfĩn lɛ vɔn kie nɛ ke bòo ɛ̀ kań mí ɓàarɔ́ àá mí sãamu hũn. Ɛ́ kɛ̀amu, ápe Yiezu Kirisa iè pe wo lɛ́ bòo míkùi kiè ǹ lɛ dɛ̀ ɛ́ lɛ́ ɛ́ ké ɛ́ wé ké mɛkɛ̃nì hũn kɛ́ ké can dɛ̃̀ hɔ̀pe Dɔfĩn. 4Ɛ́ sí iè hɔ̀pe ɛ́ hɔ́pe Dɔfĩn ɛ́ dàa lɛ́ hɔ́ yírɛ lɛ pɔ bòo míkùi kiè ǹ, hɔ̀pe lɛ ɛ́ Hɔ́ hàarí lɛ́ mí ɲunù nɛ mí ɓén lɛ́ kiè ǹ, bòo lɛ ɛ́ wé kɛ́ mí ɓen yú hɔ́, ɛ̀ mì yí míte ɛ̀ lé hɔ́pe pɔnù bɔ̀kùahɛ̃ lɛ ɛ́ wi le dímíɲɛ́ hũn ɛ́ ɓɛ̀ nìnbirìe ɛ́ yaakɛ, ɛ̀ mì wo dàá dìń kɛ̀a hɔpe Dɔfĩn. 5Ɛ́ sí iè hɔ̀ pe, ɛ́ mí dàa wé bòo míkùi ɛ̀ hɔ̀ te dàarɔ́ lɛ sãa ɛ́ mí yòó páa mí ńdɛsĩ̀nlɔ́ lɔ̀n, ɛ̀ hɔ̀ Dɔfĩn dũnlɔ́ hɛ̀lɛ̀lɛ̀ ɛ́ mí yòó páa mí te dàarɔ́ lɛ ɛ́ sãa lɔ̀n, 6ɛ̀ hɔ̀ te ɓaàrɔ́ ɛ́ mí yòó páa hɔ́ Dɔfĩn dũnlɔ́ hɛ̀lɛ̀lɛ̀ lɔ̀n, ɛ̀ hɔ̀ kùo cánlɔ́ ɛ́ mí yòó páa hɔ́ te ɓaàrɔ́ lɔ̀n, ɛ̀ hɔ̀ ńcɛdĩ̀ń Dɔfĩn ɛ́ mí yòó páa hɔ́ kùo canlɔ́ lɔ̀n, 7ɛ̀ hɔ̀ ńdàaɓán kɛ̀a zɛ̀ɓɛ̀ bòo sí ɛ́ mí yòó páa hɔ́ ńcɛdĩ̀ń Dɔfĩn lɔ̀n, ɛ̀ lè wanminu ɛ́ mí yòó páa hɔ́ ńdàaɓán kɛ̀a ie zɛ̀ɓɛ̀ bòo sí lɔ̀n. 8Kɛ́ hɔ́pe bòo sɔ sí míkùi ɛ́ ɓen ɛ́ wi miɛ ǹ wɔ̀sɔ̀kɔ̀, ɛ̀ kɛ́ mí ɓen ɛ́ wóò wé hɔ́ fúu, ɛ́ hɔ́ ɛ́ lɛ́ ɛ́ mí tɛkɛ̀a ɛ́ fɛ́, ɛ́ mí wo ɛ́ vɛ àá híɛhɔ́ kè Ɲunsɔ Yiezu Kirisa dũnlɔ́ hũn. 9Kɛ́ nìnbírɔ lɛ ɛ́ hɔ́pe bòo sɔ sí ɛ́ mí nin ɛ́ pe lɔ́ɓán àá mui, ɛ̀ piè yìe ɛ́ wo yí loo bòo wɛ̀. À hũn ɛ́ ɓɔ́ kɛ́ piè hàarí bɔ̀koohɛ̃ ɛ́ tiɛ lɔ́ piè lɔ̀n.
10Ɛ́ sí iè hɔ̀ pe, mìpe kìe zɛ̀ɓɛ̀, ɛ́ mí dàa wookɛ pĩ̀iní míte iè hɔ̀ lɛ ɛ́ Dɔfĩn ɛ́ vɔn miɛ ɛ̀ hɔ̀ lò munɛ miɛ nɛ mi wé kɛ̀amu. Ɛ́ kɛ́ mí ɓen ɛ́ wé kɛ̀amu, ɛ́ mí yá khe hɔpe Dɔfĩn wṹn ɛ́ yá mi wɛ̀. 11Ɛ́ sí iè pe ɛ́ Dɔfĩn ɛ́ ɓén lɛ́ lé ɲunù miɛ ǹ kɛ̀amu, ɛ́ mí dàá zɔ ke Ɲunsɔ àá ké Fuenírɔ Yiezu Kirisa bɛ́záanú lɛ ɛ́ yá vé hũn.
12Ɛ́ sí iè hɔ̀pe ɛ́ ń dàa wóo nin liení miɛ fúu àá hɔ́pe bòo sɔ sí, hɛ̀rí àá hɔ́ lɛ ɛ́ mí zɛ̃̀níkɛa dũ hɔ vɔ́, ɛ̀ mì lò fɛ́sí dɛ̃̀ sãa hɔ̀ bɔ̀berà lɛ ɛ́ mí yu hũn. 13Ɛ́ ń den nɛ hɔ te mí yìe ɛ̀ ǹ wóo liení miɛ fúu pɛ̃̀hṹ míkùi hũn lɛ kɛ́ niǹ yìe ɛ́ wi, bòo lɛ ɛ́ wé ɛ̀ mì piɛní mí yìe, 14iè hɔ̀ lɛ ɛ́ ń dũ kɛ́ hũ̀nún àá bìcínbóo ɛ̀ ǹ ɓén lé lépe dímíɲɛ́ lɛ hũn, kɛ̀a bòo lɛ ɛ́ ké Ɲunsɔ Yiezu Kirisa ɛ́ dàa zɛ̃́niɛ hɔ̀ ɛ́ lɛ́ mi ǹ. 15Ɛ́ ń den nin wé bòo míkùi bòo lɛ ɛ́ wé kɛ́ ń ɓen lɔ́ lépe dímíɲɛ́ lɛ hũn ɛ́ cɔ́, ɛ̀ mì wóo liení hɔ́pe bòo sɔ bòo.
Ɓɛ̀lɛ hàarí mɔn ɔ̀ Kirisa ɓàarɔ́ bòo lɛ ɛ́ ɓɛ́ bie
16Hɔ̀ den yí ɓáǹyíe bòo lɛ ɛ́ képe te hɛ̀ kete ǹ ɛ́ ké hàarí bie lɛ́ miɛ ǹ, pɛ̃̀hṹ lɛ ɛ́ ké dàa bie kè Ɲunsɔ Yiezu Kirisa pànkɛ́ àá piè ɓenlɔ́ bòo àá miɛ, kɛ́ ké den ɛ́ mɔn ɔ̀ àá ké kùrú yìe, àpe àá mí ɓàarɔ́ míkùi. 17À den yú lé yèrè àá hɔ́ ɓàarɔ́ Yàá Dɔfĩn viì. Hɔ̀pe Dɔfĩn lɛ ɓàarɔ́ ɛ́ pɔ bòo míkùi ɛ́ den pɛ̃̀hṹ zɔn bie piè bòo hũn àá tɛn-bɛhɔ́ á ɲɛ́ ɛ́ nɛ làa: «Àpe lɛ ɛ́ iè nìn Zuú lɛ ɛ́ ń wɛ cɛ̃̀un, ń wɛ niǹte piè bòo hũn cɛ̃̀un.» 18Ɛ́ képe ɛ́ den hàarí ɲɛ́ lépe tɛmu sɔ kɛ́ lé yòó tɛ̀ ɛ́ lɔ́ àá hɔ́ hóo hũn, pɛ̃̀hṹ lɛ ɛ́ ké dàa hàarí wi àá ɔ́pe kè Ɲunsɔ Yiezu lè ɓúkìe lɛ ɛ́ hɔ́pe Dɔfĩn tɛmu sɔ ɛ́ hàarí tɛ̀ lɔ̀n#1.18 Vɛ kɛ̀rán Mat 17.1-8.. 19Ɛ́ kɛ̀amu, ɛ́ ké bĩniɛ wookɛa dũmuasɛ̃̀ ɓɛ̀ Dɔfĩn bɔ̀háaníriè bòo lɛ ɛ́ ɓɛ́ hàarí bie ǹ. Ɛ́ hɔ́ ɛ́ sãa ɛ̀ mì wookɛ ɲí àá peɓɛ̀ biehĩ́ sɔ viì sãàní iè hɔ̀ lɛ ɛ́ hɔ́ dɛ̃̀ kɛ̀a ie pɛ̃̀ntĩ́ní lɛ ɛ́ zɔn ɛ́ cĩ̀ hɔ̀ síbínú hũn fúu ɛ̀ hɔ̀ sí ɛ̀ vɛ tĩ, ɛ̀ lè ɲɛǹbín ńpĩ́inàwiì (lɛ iè ɔ̀ Kirisa) ɛ̀ den wo síɛ hɛ̀ ɛ̀ yòó ciení mí tĩɛ̀. 20Kɛ́ hɔ́ bòo lɛ ɛ́ mí sãawi ɛ̀ mì dũń hɔ́ bòo míkùi híɛhɔ́ ɛ́ iè hɔ̀ lɛ: hɔ̀ bòo lɛ ɛ́ ɓɛ́ Dɔfĩn bɔ̀háaníriè ɛ́ hàarí bie lɛ ɛ́ wɛ̃́ wi le Dɔfĩn bienù vɛ̃hṹ hũn ɛ́ yí nìnbírɔ́ bɔ̀dũmunù bòo wɛ̀. 21Iè hɔ̀ lɛ ɛ́ Dɔfĩn bɔ̀háaníriè biehĩ́ ɛ́ yí lé àá nìnbírɔ bɔ̀dũmunù viì ɛ́ yí mi wɛ̀. Kɛ́ lé Mɛkɛ̃n-Sãanu ɛ́ te ɓɛ nìnbiriè dɔ̀ híɛhɔ́ ɛ́ hàarí dú, ɛ́ ɓɛ́ dàa hàarí háaniɛ hɔ̀pe Dɔfĩn bòo ɛ́ lɛ́ ɓɛ́ nìnbirìe ǹ.
Currently Selected:
2 Piɛre 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
