2 Korɛnte Siè 7
7
1Ɛ́ mípe kìe nìɛ lɛ ɛ́ ń wɛ, Dɔfĩn ɛ́ lɛ́ mí ɲunù nɛ mí ɓén wé hɔ́pe bòo sɔ sí ɛ́ lɛ́ kie ǹ. Ɛ́ sí iè hɔ̀pe, ɛ́ mí dàa lɛ́ nɛ ke tiɛ kete ɛ̀ lé hɔ́ bɔ̀koohɛ̃ hũn, hɔ̀pe lɛ ɛ́ wóò liení hɔ́ tɛkɛ̀a àá lé tĩì, ɛ̀ kè cɛ ke kuò ɛ̀ kè dũń hɔ́pe Dɔfĩn sãàní, ɛ̀ kè bòo ɛ̀ dàá sĩ̀ Hɔ̀ ǹ míkùi.
Pooli tĩwiɛ̀ ɓɛ̀ Korɛnte siè bòo hũn
2Mì hán mí hũn nɛ ke yí kaǹlén mì tĩɛ̀ hũn. Ké yí wé khe àá nìnbírɔ dɔ̀, ɛ̀ ké yí tièní nìnbírɔ dɔ̀ ǹ, ɛ̀ kè lò yí khɛ̃̀ní nìnbírɔ dɔ̀ ɛ̀ fé bòo wɛ̀. 3Hɔ̀pe sí ɛ́ nín bie ɛ́ yí bòo ɛ́ nɛ mí wɔ́ khɔn wɛ̀. Mì bòo ɛ́ den hie kie ǹ cɛ̃̀un kɛ̀a bòo lɛ ɛ́ ń dàa khɛ́ hɔ́, ɛ́ bòo dɔ̀ ɛ́ wo yí dɛ̀ kie ɛ́ yá sankɛ wɛ̀. Ɛ́ ké ɓen wi le mɛkɛ̃nì hũn, ɛ̀ kè wi ɓánlɔ̀n, ɛ̀ hɛ̀rí kɛ́ hɔ́ iè hɔ̀ húmú, ɛ̀ kè pɛ́ wi ɓánlɔ̀n. 4Ń dũmuasɛ̃̀ miɛ ǹ àá bɔ̀bín, ń wóò ɓàaní niǹte ǹ mì bòo hũn. Kè tĩyaarè míkùi hũn kɛ́ niǹ tĩì ɛ́ wóò hièní, ɛ̀ kań lé tĩwiɛ̀ dɛ̀bɛhɔ́ hũn.
5Ɛ́ hɔ́ lɛ ɛ́ ké dàa pɛ̃̀hṹ ɓɛrɛ dɛ̃un hɔ̀pe Maseduanɛ pɛ̃̀hɛ̃ hũn, ɛ́ ké hɛ̀ ɛ́ yí yí ɛ̀ síɛ vũùnín bìcínbóo wɛ̀. Ké hàarí mɔn hɔ̀ lɔ̀nbuò àá mí ɲúuhɛ̃ míkùi: ɓɛ̀ nìnbirìe hàarí ɛ́ hɔ̀ fuò ɛ̀ cɛ̀ àá kie hɔ̀ vuò lɛ ɛ́ ké wi hũn, ɛ̀ kè tĩɛ̀ hũn ɛ́ ké lò hàarí zɔn ɛ́ kɛ́bí. 6Kɛ́ Dɔfĩn lɛ ɛ́ te ɓɛ nìnbirìe lɛ bàanì tɔ̀ tĩɛ̀ ɛ́ wóò hĩ̀iníkɛ ɛ́ hàarí hĩ̀iníkɛa kè tĩɛ̀ pɛ̃̀hṹ lɛ á Tiite ɛ́ dàa hàarí ɓɛrɛ kè viì. 7Ɛ́ hɔ́ yí-e Tiite ɓenlɔ́ mí dòonún ɛ́ te ke tĩɛ̀ ɛ́ hĩ̀iníkɛa, kɛ́ hɔ́ lò ɓiɛ̀ iè hɔ̀ lɛ ɛ́ mípe ɛ́ hĩ̀iníkɛa piè tĩì ɛ́ te ke tĩɛ̀ ɛ́ hĩ̀iníkɛa. À bie bòo lɛ ɛ́ niǹ pɔnù ɛ́ hɛ̀ dàa ɛ́ mì ɓé ɛ́ lɛ́ kie ǹ, à lò bĩniɛ bie mì tĩyaarè bòo àá bòo lɛ ɛ́ mí dàa can mì kuò cɛ̃̀un niǹ ɲunù ɛ̀ sɛ. Ɛ́ sí iè hɔ̀pe ɛ́ niǹ tĩwiɛ̀ ɛ́ dàa hɛ̀ wookɛa ɓàń cɛ̃̀un.
8Ɛ́ ń dũ kɛ́ lépe niǹ máahṹ lɔ̀n vɛ̃hṹ lɛ ɛ́ ń wɛ̃́ ɛ́ lɛ́ miɛ ǹ ɛ́ hɛ̀ yáakɛa mì tĩɛ̀. Kɛ́ hɔ́ lò yí bòo ɛ́ ń nɛ kɛ́ ń hṹn dũ nɛ ǹ yí wĩ́ lé wɛ̀. Hɛ̀rí kɛ́ ń hṹn sãawi ɛ̀ ǹ bie nɛ kɛ́ ń hṹn dũ nɛ ǹ yí wĩ́ lé lè tĩyaarè lɛ ɛ́ lé hàarí dɔ́ miɛ hũn bòo hũn, ɛ̀ lèpe tĩyaarè sɔ ɛ́ den hàarí ɛ́ yí míi lò. 9Ɛ́ kɛ̀a sáalɛ ɛ́ ń wɛ niǹte kɛ́ hɔ́ yí hɔ́ lɛ ɛ́ ń yáakɛa mì tĩɛ̀ ɛ́ temu lɛ́ ń dàa ɛ́ wɛ niǹte, kɛ́ hɔ́ iè hɔ̀ lɛ ɛ́ mí tĩyaarè sɔ ɛ́ lɛ́ ɛ́ mí zɛ̀niɛ mì tĩɛ̀ ɛ̀ mì fùɛrɛ̀sí mí bɔ̀koohɛ̃ wénlɔ́ ǹ. Ɛ́ lépe mì tĩyaarè sɔ ɛ́ den iè dìɛ lɛ ɛ́ sãa Dɔfĩn viì. Ɛ́ kɛ̀amu, ɛ́ képe ɛ́ wo yí wé bɔ̀koohɔ́ dɔ̀ àá miɛ wɛ̀. 10Iè hɔ̀ lɛ ɛ́ lé tĩyaarè lɛ ɛ́ sãa Dɔfĩn viì, ɛ́ wóò lɛ́ à nìnbírɔ ɛ̀ zɛ̀ní mí tĩì à fùansí mí bɔ̀koohɛ̃ wénlɔ́ ǹ, à wo yí hɔ́ fuerɛ̀. Ɛ́ «kɛ́ ń hṹn dũ» ɛ́ wo bĩniɛ mí hɔ́pe sí hũn wɛ̀. Kɛ́ lé tĩyaarè lɛ ɛ́ wóò lé àá lé dímíɲɛ́ viì ɛ́ pe wóò ɓen àá hɔ́ húmú. 11Ɛ́ mí húi lé tĩyaarè lɛ ɛ́ sãa Dɔfĩn viì bòo lɛ ɛ́ lé wɔ́ àá miɛ: Mí hɛ̀ wóò wé hɔ́ bòo àá mí híɛhɔ́, ɛ̀ mì hɛ̀ wóò cɛ mì kuò ɛ̀ sɛ mi ɲunù sãàní, ɛ̀ mì tĩɛ̀ ɛ́ hɛ̀ wóò hĩ́ní hɔ́ bɔ̀koohɔ́ ǹ, ɛ̀ mì hɛ̀ wóò Zãn nɛ ɓuɔ́ ɛ̀ mì ɛ́ wé khe, ɛ̀ mì hɛ̀ ɛ́ cɛ̀ àá bɔ̀bín ɛ̀ mì khũ̀á mi mi, ɛ̀ mì hɛ̀ wóò cɛ mi kuò cɛ̃̀un, ɛ̀ mì hɛ̀ wóò nɛ a bɔ̀konwé ɲɛkɛ̃à ɛ́ fɔ́ɓán ɛ̀ hɔ̀ vɛ́. Ɛ́ mí iè pe hɛ̀ wóò zɛ̃́niɛ hɔ̀ bòo míkùi hũn kɛ́ mí zeǹ ɛ́ mí hɔ́pe bòo sɔ hũn wɛ̀.
12Ɛ́ kɛ́ ń ɓen ɛ́ wɛ̃́ lépe vɛ̃hṹ sɔ ɛ́ lɛ́ miɛ ǹ, ɛ̀ hɔ̀ hàarí yí-e lɛ ɛ́ wɔ́ hɔ́ bɔ̀koohɔ́ bòo hũn, ɛ̀ hɔ̀ lò hàarí yí-e pe lɛ ɛ́ ɓɛ́ wɔ́ àá hɔ́ bɔ̀koohɔ́ bòo hũn wɛ̀. Kɛ́ hɔ́ den iè bòo ɛ́ ń hàarí wɛ ɛ́ nín zɛ̃́ní lɛ́ miɛ ǹ sãàní kɛ́ mí hɛ̀ can mì kuò cɛ̃̀un kè bòo hũn Dɔfĩn híɛhɔ́. 13Ɛ́ sí iè hɔ̀pe lɛ ɛ́ te ke tĩɛ̀ ɛ́ hièniɛ.
Kɛ́ lé yí lò yí tĩhiè mí dòonún ɛ́ ké yú wɛ̀. Kɛ́ ké den wóokɛa wɛniɛ kète cɛ̃̀un à Tiite tĩwiɛ̀ lɛ á hàarí ɓɛrɛ yú mí viì bòo hũn, àá bòo lɛ ɛ́ mípe míkùi ɛ́ dàa hàarí hièniɛ piè tĩì. 14Ń hàarí ɓàaniɛ niǹte ǹ fĩ́i à Tiite híɛhɔ́ mìpe mì bòo hũn, ɛ́ ń mɔn kɛ́ mí yí dé lùwiè mi ǹ wɛ̀. Ɛ́ kɛ̀a bòo lɛ ɛ́ ké dàa ɛ́ wóò munkɛ hɔ bɔ̀berà ɛ̀ lɛ́ miɛ fúu, ɛ́ kɛ̀amu, ɛ́ mí yèn-tente bòo lɛ ɛ́ ké bie ɛ́ lɛ́ á Tiite ǹ ɛ́ ɓiɛ̀ ɲunù van tú. 15À ɓen síɛ lieniɛ bòo lɛ ɛ́ mípe mìkùi ɛ́ dàa hàarí tɛ̀ ɲɛ́ piè bòo, àá bòo lɛ ɛ́ mí dàa hàarí síɛniɛ mìte ɛ́ dàa perɛ à ǹ sãàniɛ ɛ̀ mì mɛ̀ndɛ̃a ɔ̀, ɛ̀ piè wanminu lɛ á dàa àá miɛ ɛ̀ bĩní wóokɛ ɓàaní ɓàarɔ́. 16Ɛ́ ń hɛ̀ wɛ niǹte iè hɔ̀ lɛ ɛ́ ń dɛ̀ niǹ tĩì ɛ́ bè mì lɔ̀n pɛ̃̀hṹ míkùi hũn.
Currently Selected:
2 Korɛnte Siè 7: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
