1 Timote 1
1
Tìɛníkɛrɔ́
1Hɔ̀ iè ǹpe Pooli lɛ ɛ́ hɔ́ fuenírɔ Dɔfĩn àá ɔ́ Yiezu Kirisa lɛ iè kè tĩì bènlén ɛ́ lerɛ nɛ ń wi-é pe Yiezu Kirisa tɔnkɛrɔ ɛ́ te lepe vɛ̃hṹ sɔ lɛ ɛ́ wĩ́, 2ɛ́ nin lɛ́ kɔ́pe Timote ǹ, kɔ̀pe lɛ ɛ́ iè niǹ yɛ̀nù hɛ̀lɛ̀lɛ̀ hɔ̀ ńdɛsĩ̀nlɔ́ hũn. Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá kɔ, ɛ̀ ɓɛ̀ mi kɔ miinɛ̀, ɛ̀ ɓɛ̀ lɛ́ hũn-wiɛ̀ kɔ ǹ.
Pɛ kɔte àá ɓɛ́ ɓúo kɛ̀ránliè kɛ̀ránlɔ́
3Kɛ̀a bòo lɛ ɛ́ ń dàa zɔn vaá-vɛ hɔ Maseduanɛ ɛ́ ń bie hɔ̀ ɛ́ lɛ́ kɔ ǹ, ɛ́ kɔ́ kansí hɔ́ Efɛɛzi hũn, ɛ̀ ɓɛ̀pe nìɛ lɛ ɛ́ wóò kɛ̀rán ɓɛ́ nìnbirìe àá hɔ́ bòo lɛ́ yí be, ɛ́ kɔ́ bie lɛ́ nin sãàní nɛ ɓɛ bí wóo wé hɔ́ wɛ̀. 4Bie lɛ́ ɓà ǹ nɛ ɓɛ fùansí hɔ́ ɓáǹyíe bòo lɛ ɛ́ ɓɛ́ nìnbirìe te hɛ̀ bierɔ́ ǹ àá ɓá zĩkĩ́nɓɛ̀ nɛnkɛ̃̀nù sí tóo tóo bòo bierɔ́ ǹ. Hɔ̀pe sí ɛ́ temu wóò ɓen àá hɔ́ kankán ńwũ̀anín, kɛ́ hɔ́ den yáà lɛ́ ɛ̀ Dɔfĩn tɔnlɔ́ lɛ ɛ́ wóò tɛ́ àá hɔ́ ńdɛsĩ̀nlɔ́ ɛ̀ vɛ àá híɛhɔ́ wɛ̀. 5Ɛ́ lépe ɲunù bienù sɔ lɛ iè bòo ɛ́ ń den nɛ le lɛ́ ɛ̀ ɓɛ̀ ńdɛsĩ̀riè ɛ̀ dàá lé wanminu ɓán hũn, lèpe wanminu lɛ ɛ́ wóò zɔ lé lé tĩì lɛ ɛ́ ce hũn, àá lé hũn nùnlé lɛ sãa hũn àá hɔ́ ńdɛsĩ̀nlɔ́ tente hũn. 6Ɛ́ ɓɛ́ nìnbirìe dɔ̀ ɛ́ den làa ɛ́ lɔ́ lépe wṹn sɔ sí lɔ̀n ɛ́ khie van vĩ́iniɛ ɓɛte hɔ̀ ńwũ̀anín lɛ ɲún mí hũn. 7Ɓɛ̀ lò den ɛ́ cɛ̀ ɛ̀ ɓɛ̀ wé Moyiize làndɛ́ kɛ̀ránliè, hɔ́rɔsí kɛ́ hɔ́pe bòo lɛ ɛ́ ɓɛ́ wóò bie àá hɔ́pe lɛ ɛ́ ɓɛ́ wóò nɛ hɔ bɔn ɛ́ ɓɛ́ lò ɛ́ yí dũ ɲún wɛ̀.
8Ké lò wo dũ kɛ́ á Moyiize làndɛ́ ɛ́ sãa lɛ kɛ́ ɓɛ́ nìnbìrìe ɛ́ dàa ɓen pehɔ̀ bòo lɛ ɛ́ hɔ́ bie ɛ̀ wé àá mí híɛhɔ́. 9Ɛ́ mí dũń kɛ́ hɔ́pe làndɛ́ sɔ ɛ́ yí bìsí ɓɛ́ nìnbirìe lɛ ɛ́ cã̀aní bòo hũn, kɛ́ hɔ́ bɔ̀sí ɓɛ́ bɔ̀konwériè àá ɓɛ́ nìɛ lɛ ɲɛkɛ̃̀a dɛ̃un bòo hũn, ɓɛ̀ mɛnkɛ̃nɲiì ɓàasiè àá ɓɛ́ bɔ̀lànwériè bòo hũn, ɓɛ̀ nìɛ lɛ ɛ́ yá Dɔfĩn àá hɔ́ bòo lɛ bòo sɛ̃̀ Hɔ̀ ǹ mɛ̀ndɛ̃ bòo hũn, ɓɛ̀ nìɛ lɛ ɛ́ wóò ɓé ɓá nínɓɛ́ àá ɓá yàáɓɛ́ bòo hũn, ɓɛ̀ nìɓériè bòo hũn, 10ɓɛ̀ ńdaaníkɛɓánkũǹ nìɛ àá ɓɛ́ báa lɛ wóò daaní ɓán bòo hũn, ɓɛ̀ wɔhĩ́ yìɛníriè àá ɓɛ́ ɓɔ́ɓúukɛriè àá ɓɛ́lɛ ɛ́ wóò ɓúukɛ ɓɛ nìnbirìe ɲihĩ́ɛ bòo hũn, hɔ̀pe làndɛ́ ɛ́ lò den bɔ̀sí ɓɛ́ nìɛ lɛ te dàarɔ́ ɛ́ yí ɓáa ɓán àá hɔ kɛ̀ránlɔ́ lɛ ɛ́ cã̀aní bòo hũn. 11Hɔ̀pe kɛ̀ránlɔ́ sɔ lɛ ɛ́ wi le Bentĩnnù hũn, lèpe lɛ ɛ́ Dɔfĩn bɛhɔ́ bɔ̀tente ɓàasɔ ɛ́ dɔ́ niǹ núnú hũn.
Pooli Dɔfĩn bɛrikɛ dénlɔ́
12Nín kè Ɲunsɔ Yiezu Kirisa bɛrikɛ ɛ̀ dé, àpe ɛ́ te hɔ pànkɛ́ ɛ́ lɛ́ mi ǹ. À nɛ ń iè nìnbírɔ lɛ ɛ́ dɛ̀ ɛ́ dɛsĩ̀nin á dàa mɔ̀ mi nɛ n tɛ́ mí tɔnlɔ́. 13Hɔ́rɔsí kɛ́ hṹn àá híɛhɔ́ ɛ̀ ǹ lò hṹn wóò yáa piè yèrè, ɛ̀ ǹ tòokɛ a, ɛ̀ ǹ vɛ́ piè máahṹ nìɛ ɲɛkɛ̃̀a, ɛ̀ ǹ hṹn iè mɛkɛ̃nɲiì ɓàasɔ. Kɛ́ Dɔfĩn ɛ́ den mɔn niǹ miinɛ̀. Ń den hàarí iè wìe lɛ ɛ́ yí dũ bòo lɛ ɛ́ nín wé iè hɔ̀ lɛ ɛ́ ń hàarí yí dɛsĩ̀-ɛ̀ pe Kirisa ǹ wɛ̀. 14Ɛ́ ké Ɲunsɔ ɛ́ wɔ́ mí hiì dɛ̀bɛhɔ́ àá mi. À lɛ́ hɔ́ ńdɛsĩ̀nlɔ́ àá lé wanminu lɛ wi Yiezu Kirisa ǹ mi ǹ. 15Ɛ́ lɛ iè lè benbíi lɛ ɛ́ ɓɛ́ nìnbirìe ɓɛ́kùi ɛ́ sãawi ɛ̀ ɓɛ̀ tɛ̀ bòo: Yiezu Kirisa ɛ́ ɓɛrɛ lè dímíɲɛ́ hũn ɛ́ mii ɓen fuení ɓɛ́ bɔ̀konwériè ǹ. Ɛ́ ńpe ɛ́ temu iè ɓɛ̀pe bɔ̀konwériè ɓɛ́kùi hándí. 16Kɛ́ Dɔfĩn ɛ́ den mɔn niǹ miinɛ̀ ɛ́ Hɔ́ dàa lɛ́ ápe Yiezu Kirisa ɛ́ dàa hɛ̃̀ mí hũn àá ńpe lɛ iè ɓɛ̀ bɔ̀konwériè hándí. Ɛ́ hɔ́pe sí ɛ́ wo iè bɔ̀zɛ̃́níriè ɓɛ̀ nìnbirìe lɛ ɛ́ ɓén yìrí hĩ́ní dɛsĩ̀-ɛ̀ ǹ viì, ɓɛ̀pe lɛ ɛ́ ɓén yí lé mɛkɛ̃nì lɛ yá vé. 17Nɛ le yèrè àá hɔ́ ɓàarɔ́ bòo ɛ̀ sĩ̀-ɛ̀ Bɛ́zuú lɛ yá vé, á lò yá hí, à lò yáà mi àá yìe ǹ. Àpe mí dòonún ɛ́ temu iè Dɔfĩn! Amiina.
18Ɛ́ kɔ́pe niǹ yɛ̀nù Timote, sí iè lè ɲunù bienù lɛ ɛ́ nín lɛ́ kɔ̀ ǹ kɛ̀a bòo lɛ ɛ́ ɓɛ́ Dɔfĩn bɔ̀háaníriè ɛ́ dàa hàarí khɛ́ hɔ́ kɔ̀ bòo hũn, lɛ nɛ kɔ sɛ hɔ sɛrɔ́ lɛ ɛ́ sãa, 19kɛ́ kɔ́ dàa hɔ ńdɛsĩ̀nlɔ́ àá lé hũn nùnlé lɛ sãa. Ɓɛ̀dɔ̀ ɛ́ den pɛ̃́ nɛ ɓɛ́ yá ɲí ɓɛ́ hũn nùnlé lɛ sãa bòo, ɛ́ peɓɛ̀ ńdɛsĩ̀nlɔ́ ɛ́ ɓiɛ̀ van ɲumu. 20À Himenee àá ɔ́ Alɛkisandere ɛ́ den iè ɓɛ̀pe nìɛ sɔ sí dɔ̀. Ɛ́ ń den dɔ́ ɓɛ́ à Sitũanɛ núnú hũn bòo lɛ ɛ́ wé ɛ̀ ɓɛ̀ dàá ken hɔ̀ ǹ ɛ̀ dũń ɛ̀ ɓɛ̀ wo bí bĩní tòo Dɔfĩn wɛ̀.
Currently Selected:
1 Timote 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
