1 Korɛnte Siè 14
14
Mɛkɛ̃n-Sãanu hɛ̃mù bòo dàarɔ́ ɓɛ̀ ńdɛsĩ̀riè ńkóoɓánlɔ̀nɓɛ̀ hũn
1Mì cɛ mi kuò ɛ̀ mì cɛ̀ lè wanminu. Ɛ̀ mì lɛ́ nɛ le Mɛkɛ̃n-Sãanu hɛ̃mù bòo pɔnù ɛ̀ kań miɛ ǹ, kɛ́ Dɔfĩn bòo háanírɔ́ pɔnù iè pe ɛ́ mí lɛ́ nɛ hɔ wookɛ kań miɛ ǹ ɛ̀ pɔní hɔ́ lɛ kɛ́. 2À nìnbírɔ lɛ ɛ́ hɔ̀ níi bɔ̀ɓuà ɛ̀ bie ɛ́ yá bie àá nìnbirìe, kɛ́ hɔ́ iè Dɔfĩn á dàa ɛ́ bie. Ɛ́ nìnbírɔ ɛ́ wo yí dũ hɔpe bòo lɛ á ɛ́ bie ɲún wɛ̀. Kɛ́ Mɛkɛ̃n-Sãanu ɛ́ temu wóò lɛ́ à bie hɔ bɔ̀berà lɛ tànkɔ̀niɛ. 3Kɛ́ álɛ ɛ́ wóo háaní hɔ́ Dɔfĩn bòo ɛ̀ lɛ́ ɓɛ́ nìnbirìe ǹ, ɛ́ pe iè ɓɛ̀pe nìnbirìe á dàa ɛ́ bie, ɛ̀ dàá lɛ́ ɛ̀ ɓɛ̀ vɛ àá híɛhɔ́ hɔ̀ ńdɛsĩ̀nlɔ́ hũn, ɛ̀ lɛ́ hɔ́ bérɛ́ ɓà ǹ ɛ̀ dàá hĩ̀iníkɛ peɓɛ̀ tĩɛ̀. 4Àlɛ ɛ́ bie àá níi bɔ̀ɓuà iè piè te mí dòonún á ɛ́ sĩiní, kɛ́ álɛ ɛ́ wóò háaní Dɔfĩn bòo ɛ̀ lɛ́ ɓɛ́ nìnbirìe ɛ́ pe iè Dɔfĩn zũnù nìɛ ɓɛ́kùi á ɛ́ sĩiní.
5Ń den hṹn wɛ nɛ mipe mìkùi ɛ́ wóò bie hɔ níi bɔ̀ɓuà, kɛ́ ń den ɛ́ wɛ pɔ nɛ mi wóo háaní Dɔfĩn bòo ɛ̀ lɛ́ ɓɛ́ nìnbirìe ǹ. Àlɛ ɛ́ wóò háaní Dɔfĩn bòo ɛ̀ lɛ́ ɓɛ́ nìnbirìe ǹ ɛ́ pɔ́ álɛ ɛ́ wóò bie hɔ níi bɔ̀ɓuà, kɛ́ yí bòo ápe lɛ ɛ́ hɔ̀ níi bɔ̀ɓuà ɛ̀ bie ɛ́ khũ̀a tɛ̃́niɛ hɔ̀, bòo lɛ ɛ́ wé ɛ̀ hɔ̀ sĩiní Dɔfĩn zũnù nìɛ ɓɛ́kùi.
6Ɛ́ mí síɛ húi lò, mìpe kìe zɛ̀ɓɛ̀: kɛ́ ńpe ɛ́ hṹn ɓɛrɛ mì viì ɛ́ ɓɛrɛ wɔ́ níi bɔ̀ɓuà ɛ́ nín bie àá miɛ, ɛ̀ ǹ pɛ̃́ ɛ́ yá Dɔfĩn bòo lɛ ɛ́ Hɔ́ zɛ̃́niɛ lɛ́ mì ǹ ɛ̀ bie lɛ́ miɛ ǹ, ǹ ɛ̀ yá bɔ̀dũmunù biehĩ́ tàá Dɔfĩn bòo háanírɔ́ biehĩ́ ɛ̀ bie àá miɛ, tàá ɛ̀ ǹ lò yá mì kɛ̀rán àá bòo dɔ̀, hɔ́rɔsí ɛ̀ ǹ sũǹ ɛ́ mì sĩiní? 7Ɛ́ sí iè pe ɛ́ hɔ́ ɓiɛ̀ dɛ̃̀ kɛ̀amu àá hɔ́ yɔrɔ́ tĩ̀ɛ dɔ̀ lɛ ie le ńwínú àá lé cɛ̃́hṹ lɛ lò iè bòo lɛ yìe mí wɛ̀. Ɛ́ ɓɛ́ den ɓen ɛ́ hɔ̀ ɓɛ́, kɛ́ dúrɔ tɛmu ɛ́ hṹn yáà kań mí dòonún, ɛ́ kɔ́ wo ɓén wiɛwiɛlɔ́ ɛ́ dàá dũń lépe ńwínú tɛmu àá lépe cɛ̃́hṹ tɛmu ɛ́ lékɛ ɓán? 8Ɛ̀ kɛ́ lé bũì lɛ te hɔ hĩɛ̀ tánlɔ́ bòo ɛ́ wóò buie ɛ́ ɓen yá hɔ̀pe hĩɛ̀ yèrè ɛ̀ ve wìée, ɛ́ wieni ɛ́ temu ɓén sɛ́sɛ́ míte hɔ̀pe hĩɛ̀ tánlɔ́ yènsénín? 9Ɛ́ kɛ̀amu, kɛ́ mípe ɛ́ ɓiɛ̀ wɔ́ níi lɛ ɛ́ nìnbirìe ɛ́ yá ɲí ɛ́ mí dàa ɛ́ mì bòo ɛ̀ bie, ɛ́ hɔ́pe lɛ ɛ́ mí ɛ́ bie ɛ́ wo ɲún ɛ́ dũń kɛwiɛ? Hɔ́rɔsí ɛ̀ mì iè bìe lɛ ɛ́ bie kũ̀n. 10Hɔ̀ níiɓɛ̀ ɛ́ buò lè dímíɲɛ́ hũn, kɛ́ níi dɔ̀ lɛ kɛ́ lɛ biehĩ́ ɛ́ yí dàa ɲún ɛ́ mí wɛ̀. 11Kɛ́ ńpe ɛ́ yáà níi lɛ ɛ̀ ɲí, hɔ́rɔsí àpe lɛ hɔ̀ níi sɔ ɛ̀ bie ɛ́ iè nɛ̀hũnù ǹpe niǹ viì, ɛ̀ ǹpe ɛ́ lò ɓiɛ̀ iè nɛ̀hũnù piè viì. 12Ɛ́ sí iè pe ɛ́ hɔ́ ɓiɛ̀ dɛ̃̀ kɛ̀amu mìpe mì viì. Ɛ́ hɔ lɛ ɛ́ mí ɛ́ lè Mɛkɛ̃n-Sãanu hɛ̃mù bòo ɛ̀ cɛ̀ àá mí tĩɛ̀ míkùi, ɛ́ hɔ́pe hɛ̃mù bòo lɛ ɛ́ mii lɛ́ ɛ̀ Dɔfĩn zũnù nìɛ ɓɛ́kùi ɛ̀ vɛ àá híɛhɔ́ iè pe ɛ́ mí de pɛ mi híɛhɔ́ cɛ̀ cɛ̃̀un, ɛ̀ mì yí hɔ́ wɔ̀sɔ̀kɔ̀.
13Ɛ́ sí iè hɔ̀ pe, álɛ ɛ́ bie àá hɔ́ níi bɔ̀ɓuà ɛ́ dàa sãawi à hɛ̃un Dɔfĩn nɛ Hɔ lɛ́ pehɔ̀ tɛ̃́nírɔ́ pànkɛ́ ɔ̀ ǹ. 14Iè hɔ̀ lɛ ɛ́ ń ɓen ɛ́ Dɔfĩn ɛ̀ hɛ̃nnin àá níi dɛ̀ɓuɛ̀, ɛ̀ niǹ mɛkɛ̃nì ɛ́ pe wo ɛ́ hɛ̃un, kɛ́ niǹ bɔ̀dũmumù ɛ́ pe dɛ̃̀ kã́amáà. 15Ɛ́ ńɓúò iè pe ɛ́ ń wo fɔ́ɓán ɛ̀ ǹ wé? Ń wóo nin hɛ̃un Dɔfĩn àá niǹ mɛkɛ̃nì, kɛ́ ń lò wóo nin bĩní hɛ̃un Hɔ̀ ǹ àá niǹ bɔ̀dũmunù. Ń wóo nin dɛ ńlíɛkɔ́ àá niǹ mɛkɛ̃nì ɛ̀ dàá ɓàaní Dɔfĩn kɛ́ ń lò wóo nin bĩní dɛ ńlíɛkɔ́ àá niǹ bɔ̀dũmunù ɛ̀ dàá ɓàaní Hɔ̀ ǹ. 16Kɛ́ kɔ́ ɓen ɛ́ Dɔfĩn bɛrikɛ ɛ̀ dé àá kɔ́ mɛkɛ̃nì mí dòonún, ápe ńdɛsĩ̀rɔ lɛ kɛsí ɓɛ́ nìzã̀amáa hũn lɛ yí dũ bòo dɔ̀ hũn, ɛ́ wo wiɛ dàa dɛ̀ ɛ́ zɔ́ tɛ̀ ɛ́ bie nɛ «Amiina» kɔ̀ bɛrikɛ lɛ ɛ́ kɔ́ ɛ́ dé bòo hũn? À wo yí dũ hɔ bòo lɛ ɛ́ kɔ́ ɛ́ bie lò! 17Ɛ́ hɔ́pe wo bɔn kɛ́ kɔ́ Dɔfĩn bɛrikɛ dénlɔ́ sɔ ɛ́ pe wo sãa cɛ̃̀un, kɛ́ hɔ́ den yá mì ńkɔnù sí ɛ̀ sĩiní wɛ̀.
18Nín Dɔfĩn bɛrikɛ ɛ̀ dé iè hɔ̀ lɛ ɛ́ ńpe ɛ́ wóò khɛ́ àá níi bɔ̀ɓuà ɛ́ pɔ́ miɛ mìkùi. 19Kɛ́ ń den ɓen wi Dɔfĩn zũnù hũn, ɛ̀ ǹ wɛ ɛ́ wóò bie biehĩ́ hùanú lɛ ɛ́ nìnbirìe ɛ́ ɲí, bòo lɛ ɛ́ wé ɛ̀ hɔ̀ lɛ́ bérɛ́ ɓɛ̀lɛ ǹ, ɛ́ bòo tṹ biehĩ́ muasíe pírú lɛ ɛ́ nin bie àá níi bɔ̀ɓuà lɛ ɛ́ nìnbírɔ dɔ̀ ɛ́ yá ɲí wɛ̀.
20Kìe zɛ̀ɓɛ̀, mì bí wóo vɛ̀ mì hũn kɛ̀a bòo ɛ́ mí ie zĩncãahɛ̃ wɛ̀. Hɔ̀ ɓen iè hɔ̀ bɔ̀koohɔ́ wénlɔ́, ɛ̀ mìpe wo wóo wé míte kɛ̀a zĩncãahɛ̃, kɛ́ hɔ́ kɛ́ hɔ́ hũn vànminù, ɛ̀ mì wóo wé míte kɛ̀a nìnbirìe lɛ ɛ́ dɛ̃un vɔ́. 21Ɛ́ Ɲunsɔ ɛ́ bie mí làndɛ́ vɛ̃hṹ hũn ɛ́ nɛ làa:
«Ɓɛ̀ iè nìnbirìe lɛ ɓà níi ɛ́ wi mí dòonún,
Ɓɛ̀ iè nìnbí-ɓuà ɲihĩ́ɛ ɛ́ ń ɓén mìí ɛ̀ dàá bie àá ɓɛ́pe nìɛ lɛ,
Kɛ́ ɓɛ́ lò den pɛ́wi yá ɓén ɲí niǹ bòo wɛ̀.»
22Ɛ́ kɛ̀amu, ɛ́ hɔ́ níi bɔ̀ɓuà bierɔ́ ɛ́ iè bɔ̀zɛ̃́níriè ɓɛ̀pe nìɛ lɛ ɛ́ yí dɛsĩ̀ Dɔfĩn viì, kɛ́ hɔ́ yí bɔ̀zɛ̃́níriè ɓɛ̀ ńdɛsĩ̀rìe viì wɛ̀. Ɛ̀ Dɔfĩn bòo háanírɔ biehĩ́ ɛ́ ɓiɛ̀ iè bɔ̀zɛ̃́níriè ɓɛ̀ ńdɛsĩ̀riè viì, kɛ́ hɔ́ ɓiɛ̀ yí bɔ̀zɛ̃́níriè ɓɛlɛ yí dɛsĩ̀ Dɔfĩn viì wɛ̀.
23Ɛ́ mí húi lò: kɛ́ mípe Dɔfĩn zũnù nìɛ mìkùi ɛ́ van koo ɓánlɔ̀n ɛ́ Dɔfĩn ɛ̀ ɓàanínin, ɛ̀ mìpe mìkùi ɛ́ wo wɔ́ níi bɔ̀ɓuà ɛ́ mí ɛ́ bie, kɛ́ nìnbí-ɓuà dɔ̀ lɛ ɛ́ yí dũ bòo dɔ̀ hũn tàá nìɛ dɔ̀ lɛ ɛ́ yí ɓɛ́ ńdɛsĩ̀riè ɛ́ ɓɛrɛ zɔn mì tĩ́ihṹ, ɛ́ ɓɛ́ yá bie nɛ mí ɛ́ khíekɛ? 24Kɛ́ mípe míkùi ɛ́ den wɔ́ Dɔfĩn bòo háanírɔ́ biehĩ́ ɛ́ mí ɛ́ bie, kɛ́ nìnbírɔ dɔ̀ lɛ ɛ́ yí ńdɛsĩ̀rɔ tàá nìnbírɔ dɔ̀ lɛ ɛ́ yí dũ bòo dɔ̀ hũn ɛ́ ɓɛrɛ zɔn mì tĩ́ihṹ, ɛ́ hɔ́pe bòo lɛ ɛ́ mí bie ɛ́ lɛ́ á ɛ́ dũń kɛ́ ápe ɛ́ iè bɔ̀konwé. Hɔ́rɔsí ɛ̀ hɔ̀ bòo lɛ ɛ́ mípe mìkùi ɛ́ bie ɛ́ te piè liè ɛ́ lè. 25Ɛ́ hɔ́ bòo lɛ ɛ́ tànkɔ̀niɛ wi piè tĩì hũn ɛ́ wo ɛ́ khań ɛ́ lé hɔ́ yíe, á wo ɛ́ kùeń síɛ ɓúnsí lé sṹsùnù à ɛ́ ɓàaní Dɔfĩn kɛ́ á bie nɛ làa:«Dɔfĩn pe hɛ̀ wo wi mi tĩ́ihṹ àá bɔ̀bín.»
Bòo lɛ ɛ́ mí sãawi ɛ̀ mì wóo wé mí ńkóoɓánlɔ̀nɓɛ̀ hũn
26Kìe zɛ̀ɓɛ̀, ɛ́ ńɓúò iè pe ɛ́ mí sãawi ɛ̀ mì wóo wé? Mí ɓen koo ɓánlɔ̀n ɛ́ mii ɓàaní Dɔfĩn, ɛ̀ mì tĩ́ihṹ ádɔ̀ ɛ́ dɛ̀ ńlíɛkɔ́ ɛ́ dɛ, àdɔ̀ ɛ́ dɛ̀ ɓɛ̀ nìnbirìe ɛ́ kɛ̀rán, àdɔ̀ ɛ́ dɛ̀ bòo lɛ ɛ́ Dɔfĩn zɛ̃́niɛ lɛ́ à ǹ ɛ́ bie ɛ́ lɛ́ ɓɛ́ nìnbirìe ǹ, àdɔ̀ ɛ́ dɛ̀ ɛ́ bie àá níi bɔ̀ɓuà, àdɔ̀ ɛ́ dɛ̀ hɔ̀pe bòo lɛ ɛ́ bie àá níi bɔ̀ɓuà ɛ́ tɛ̃́ní. Hɔ̀pe sí míkùi ɛ́ sãawi ɛ̀ hɔ̀ lɛ́ ɛ̀ lè Dɔfĩn zũnù ńkóoɓánlɔ̀n nìɛ ɛ̀ vɛ àá híɛhɔ́. 27Ɛ́ ɓɛ́dɔ̀ ɛ́ ɓen ɛ́ cɛ̀ ɛ̀ ɓɛ̀ bie níi bɔ̀ɓuà, ɛ̀ nìɛ ɓɛ̀ ɲu tàá nìɛ ɓɛ̀ tĩ ɛ̀ bie hɔ, kɛ́ ɓɛ́ lò den biekɛ ɛ̀ ɓɛ̀ lɛ́kɛ ɓán. Kɛ́ pehɔ̀ máahṹ, àdɔ̀ ɛ̀ tɛ̃́ní hɔ́pe lɛ ɛ́ ɓɛ́ bie. 28Kɛ́ nìnbírɔ lɛ ɛ́ mii tɛ̃́ní hɔ́ ɛ́ mí, ɛ̀ ɓàasiè ɛ̀ hĩì hɔ̀pe ńkóoɓánlɔ̀n hũn, ɛ̀ hɔ́rɔ ɛ́ wóo bie mí tĩì hũn àá Dɔfĩn. 29Ɛ̀ ɓɛ̀ ɓen kɛ́ ɓɛ́lɛ ɛ́ wóò háaní Dɔfĩn bòo ɛ̀ lɛ́ ɓɛ́ nìnbirìe ǹ, ɛ̀ mì nɛ nìɛ ɓɛ̀ ɲu tàá nìɛ ɓɛ̀ tĩ ɛ̀ bie, ɛ̀ ɓɛ̀lɛ kɛ́ ɛ̀ nii hɔpe lɛ ɛ́ ɓɛ́ ɛ́ bie húi nɛ hɔ bɔn. 30Kɛ́ ádɔ̀ ɛ́ dàa bòo dɔ̀ lɛ ɛ́ Dɔfĩn zɛ̃́niɛ lɛ́ à ǹ ɛ́ mii háaní lɛ́ ɓɛ́ nìnbirìe ǹ, àpe lɛ ɛ́ hṹn bie ɛ̀ hĩì. 31Mìpe mìkùi ɛ́ dɛ̀ Dɔfĩn bòo háanírɔ́ biehĩ́ ɛ́ wóo biekɛ ɛ̀ mì ɛ́ lɛ́kɛ ɓán, bòo lɛ ɛ́ wé ɛ̀ mìpe mìkùi ɛ̀ yí hɔ́ bérɛ́ àá hɔ́ tĩ-hĩ̀iníkɛà. 32Dɔfĩn bɔ̀háaníriè ɛ́ dɛ̀ ɓɛ́te ɛ́ wóò ɓaà. 33Iè hɔ̀ lɛ ɛ́ Dɔfĩn ɛ́ yí ńwékɛkũǹ Dɔfĩn kɛ́ Hɔ́ iè hũn-wiɛ̀ Dɔfĩn.
Ɛ́ kɛ̀a bòo lɛ ɛ́ hɔ́ dàa wóò wé hɔ́ Dɔfĩn zĩhĩ́ɛ míkùi hũn, 34ɓɛ̀ hã́a ɛ́ sãawi ɛ̀ ɓɛ̀ wóo hĩì hɔ̀ mì ńkóoɓánlɔ̀nɓɛ̀ hũn. Ɲunù ɛ́ yí lɛ́ ɓà ǹ nɛ ɓɛ wóo bie wɛ̀. Ɓɛ̀ sãawi ɛ̀ ɓɛ̀ wóo síɛní ɓɛ́te ǹ ɛ̀ ɲí ɲínlɔ́ kɛ̀a bòo lɛ ɛ́ hɔ́ làndɛ́ ɛ́ dàa bie hɔ̀. 35Kɛ́ ɓɛ́ ɛ́ cɛ̀ nɛ ɓɛ́ dũń bòo dɔ̀ ɛ̀ ciiní, ɛ̀ ɓɛ̀ dìe ɓá báa ǹ ɓá yíe. Iè hɔ̀ lɛ ɛ́ hɔ́ yí te mí yìe ɛ̀ hṹnu ɛ́ wóo bie hɔ ńkóoɓánlɔ̀n hũn wɛ̀.
36Ɛ́ mí iè bìe ɛ́ lieníkɛ ɛ̀ mì nɛ le Dɔfĩn bienù ɛ́ lɔ́ àá mípe mì viì? Yée kɛ́ mí tĩì ɛ̀ mì nɛ hɔ iè mìpe mì dòonún ɛ́ lé ɓɛrɛ dɛ̃un? 37Kɛ́ nìnbírɔ dɔ̀ ɛ́ lieníkɛ à nɛ mípe ɛ́ iè Dɔfĩn bɔ̀háanírɔ tàá ie Mɛkɛ̃n-Sãanu ɛ́ temí híɛhɔ́ ɛ́ dú, ɛ̀ ɓàasɔ ɛ́ sãawi à dũń kɛ́ hɔ́pe bòo lɛ ɛ́ nín wĩ́ ɛ̀ lɛ́ miɛ ǹ ɛ́ iè Ɲunsɔ ɲunù tɛmu. 38Kɛ́ ɓàasɔ ɛ́ yí tɛ̀ dũń hɔ́, ɛ̀ Dɔfĩn ɛ́ ɓiɛ̀ yí dũ ɓàasɔ wɛ̀.
39Ɛ́ kɛ̀amu, mìpe kìe zɛ̀ɓɛ̀, Dɔfĩn bòo háanírɔ́ biehĩ́ iè pe ɛ́ mí wóo cɛ̀, ɛ̀ mì lò bí wóo si ɓɛdɔ̀ nɛ ɓɛ bí bie níi bɔ̀ɓuà wɛ̀. 40Kɛ́ hɔ́ bòo míkùi ɛ́ sãawi ɛ̀ hɔ̀ wóo wé àá mí híɛhɔ́ kɛ́ ńwékɛkũǹ ɛ̀ bí kań yán wɛ̀.
Currently Selected:
1 Korɛnte Siè 14: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
