SAKARI 12
12
Cirgi ti Jerusalem go wo de budgi ɓe go
1Wããre põõre maga Manwur wãã ti Israyele.
Wããre ma jag Manwur maga blar ngel ma ciŋ wo go,
day tõõ glog tamsir lay,
kneʼ nenterse je tabay wo ne hẽn ɓil ni lay mono.
2Koɗa, diŋ ga ndi de see ɓi ndi kol Jerusalem yaŋ doo wehãn yii maga go de baage sõõge ɓil ɓin ma maʼ mbar nen ti wer jar maga wo ti jeŋ ɓe ni mo degarra ɓuy no.
Ama ma Judan mono,
sen joŋ ge diŋ de maga à cir gi ti Jerusalem go mono.
3Ti wur sen mono,
ndi kol ge Jerusalem yaŋ diŋ húulì ma de põõre maga maŋ ge de gaali doo wer jar ma ti jeŋ ɓen wo ni kara mo ɓuy no.
Jar maga maŋn ge wo mo ɓuy daʼ ge wo wããge ma de hãã debaŋ
Day wer sir ma ti tamsir wo ɓuy tay ge wo ti ɓe yaŋ.
4Ti wur sen mono,
Kay diŋ jag Manwuri.
Ndi maʼ ge nen ti piiri ɓaaran wo yaŋ go ɓuy,
Day jar yaɗ ragen caa ge wo hẽẽne yaŋ go debaŋ,
Ama day nen ɓi joŋ ge yaŋ go de bulgi
Ti tiŋ mani Juda no,
Day ndi rãã ge nen piiri ma wer jarn wo yaŋ go ɓuy.
5Waŋre ma Judan wãã ge wo yaŋ de ɓil ɓaara ga :
Jar ma ɓi leege Jerusalem wo diŋ egre naa no,
Wer Manwur Pantway, Baa ɓaara no.
6Ti wursen mono, ndi joŋ ge waŋre ma
Judan wo yaŋ doo swee maga wùu
De ngalge ti holaŋ ɓe koo ngil nono,
Noga doo wùu de doʼge
Jag dol kay day à heen yoo ɓaare coore ble
Maga go de tayge kaʼ nono.
Á re ge wo wer jar ma ti jeŋ wo ni yaŋ go
Ti ɓaŋ war ɓaara lay, ti ɓaŋ gùr ɓaara lay,
Day Jerusalem joŋ ge mbe yaŋ
Ti ngel ɓen Jerusalem ni ɗa.
7Manwur yãã ge mburyug ma Judan ge wo go ɗa,
Nen maga sagge ma ti tiŋ mani Dafid no,
Sagge ma jar ma Jerusalemn wo
Mo ur go ciŋ ti Juda wa.
8Ti wursen mono,
Manwur koɗ ge jar Jerusalem wo yaŋ.
Hayga maapo boŋ maʼ ɓaale we yoo ɓaara no,
Á joŋ ge ti wursen doo Dafid nono.
Day tiŋ mani Dafidn joŋ ge yaŋ doo Baa nono,
Doo je peele Manwur pel ɓaara nono.
Roo húulì go ti ngeln wo ɓuy
9Ti wursen mono,
Ndi kiɗ gi faage ma ɓlag wer sir wo yaŋ go ɓuy,
Maga nduu gi wo dur Jerusalem mono.
10Doo kay no mono, ndi dus gi nenterse
Ɓil de el wo de nenterse ma joŋ kamkam yaŋ le
Ti tiŋ mani Dafidn wo de jar Jerusalem wo,
Day á ngiɗ gi wo nen yaŋ le see ɓi,
Je maga á hay tuur ne wo go mono,
Á ra ge wo húulí ɓe yaŋ
Doo maga à raa húulí wel deboŋ nono.
Á ra ge wo yaŋ ti ɓe de hãã debaŋ,
Rage wo yaŋ ti ɓe de hãã debaŋ doo jag wel nono.
11Ti wursen mono,
Roo húulí ma Jerusalem joŋ yaŋ kluu debaŋ
Doo roo húulí ma Hadadrimmon nono
Ti log ma Megiddo no.
12Sirn joŋ ge yaŋ nen roo húulí,
Moobe ma honla ɓuy go sare :
Moobe tiŋ mani Dafidn go sare,
Day naare wo go sar lay.
Moobe tiŋ mani Natan go sare,
Day naare wo go sar lay.
13Moobe tiŋ mani Lefin go sare,
Day naare wo go sar lay
Moobe mani Semey go sare,
Day naare wo go sar lay.
14Moobe ma lan wo ɓuy
Moobe ma honla ɓuy go sare,
Day naare wo go sare.
Currently Selected:
SAKARI 12: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
