ESAY 7
7
Esay wo see waŋ Akase
1Ti kal mani Akas je ni Yotam, je ni Osiyas waŋ Judan mono, Retsin waŋ Siri raw wo hooge de Peka je ni Remaliyahu waŋ Israyeln ma leʼ Jerusalem durgi, ama saara kãã ma leʼge ɓe gà. 2À raw age fer wããre ne tiŋ mani Dafid ti re sen ga : Jar Siri yaŋ wo go de kaŋge ti sir Efrayim. Jiili Akas wo de jar sir ɓen leʼ wo mbar rage doo koore ma yooway maga fid doo leege no mono. 3Mo so no Manwur raw riŋ Esay ga : Kal go caa pel Akase, nday de wel ɓo Seyar-Yakub wo ti waale blam bii maga a le ti gloŋ ma nen ciŋn wo ti faage maga leʼ wo ɓil pay mani jar bag law õõben wo mono.
4Ndo day wiin ge ga :
Coɓ mbo, joŋ hẽẽne mopo wa.
Jiili ɓo mo caa bii go doo
Gerdem hããre se ɓog ma ɗur cug jagn wo mo wa,
Doo sõõge ɓil mani Retsin wo de jar Sirin wo wa lay,
Doo bagge põõ mani je ni Remaliyahun wa lay.
5Wer maga jar Siri wo le de ɗig ɓlagge ti ɓo, wo de tay
Doo bagge põõ jag de jar Efrayim wo de je ni Remaliyahu no day wãɗ wo ga :
6Naa hoo wo leʼ sir Juda ni naa caa ge hẽẽne Jerusalem yaŋ go,
Naa kaŋ cee ne hẽn ti hãã nen maga á mo hã see
Ɓe go ne naa day ni naa kaŋ je ni Tabeel ti ɓe waŋ ɓaara mono,
7Waŋkluu, Manwur wãã so ga :
Re sen joŋ ge gà
A ɓoʼ ge jag go gà.
8Werga Damas diŋ ti sir Siri day Retsiŋ diŋ ti Damas lay.
Kiŋgi gwaʼ doo hiiraʼ ti dwee, à ndreɗ ge Efrayim
Go, se joŋ ge diŋ sir jar po taʼ gà so hase.
9Ɓi leege Samari diŋ ti Efrayim
Day je ni Remaliyahun diŋ ti Samari lay.
Hayga nday lag we ngiŋ ti hãge ɓil ɓayn gà no,
Nday kãã ge ma lagge de egre pel ɓaara gà.
Biŋgi Emmanuwel no
10Manwur raw wãã wããre ne Akas tigriŋ day riŋn ga : 11Wii mbo fen ma kaŋ nen ga Manwur de kayge wer ɓo doo Manwuri, Baa ɓo no. Wiin mbo doo ga ɓil da nono, gesiŋ la noga nen ngel ma ciŋ. 12Akas raw ferge gana : Ndi wii gi mopo gà hase, ndi lam Manwur gà. 13Esay day so ga :
Laa we so nday jar ni Dafid no!
Nday ko nen ɓay nà ga gayge maga nday gay jar téebeere wo
Mo nà bay diŋ mopo wa,
Nday yaʼ nà gayge diŋ Baa ɓin lay so yawla?
14Diŋ wersen so Waŋkluu de see ɓe tuu
Joŋ ge fen kaŋ nen ɓay yaŋ ne nday.
Ko we, maytigli yaŋ de maŋ ɓili,
A biŋ gi wel yaŋ day se kaŋ ge ɗúu yaŋ ne hẽn ga Emanuwele.
15Wel sen re ge noo-pãã wo yaŋ de noo-yõõre
Hãã wo go ti wur maga se ko tob fen ma de ɓlaggen go,
Day maŋ diŋ mo ma de eln mono.
16Ane taŋgu maga mbargan ko tob mo ma de ɓlaggen go,
Day maŋ diŋ mo ma de eln mono,
Sir mani waŋre ma ɓog maga caa wo hẽẽne ɓo go
Gwaʼ ge wo yaŋ go ɓil koɗe.
17Manwur a ge yaŋ de naw po wo ne nday ti
De jar sir ɓon wo de tiŋ mani pan ɓo no, diŋ waŋ Asiri.
Te naw sen hay joŋ ti boŋ gà
Hãã le ti wur maga Efrayim maŋ ɓil go see Juda mono.
Jar Asiri ɓug gi wo sirn go
18Wo ge dayge ti wur sen mono, Manwur ʼwaa ge flew yaŋ
Le ne kwãyre ma ti ɓrewge bii Nil ma Ejipten wo
De yõõre maga wo le ɓil sir Asiri mono.
19Á a ge wo yaŋ le day lag ge wo yaŋ go ɓuy ɓil log ma kuɗumn wo,
Go ɓil rum húulìn wo, go yoo gusuŋ-gusuŋ wo ɓuy,
Go ɓil ngel koɗ horogn wo ɓuy lay.
20Ti wur sen mono, Waŋkluu cẽẽ ge ti Juda yaŋ go
De mocẽẽti maga se yããn le yããge mono,
Hãã cegaɗ maarog ma de pããgen wo go,
Á cẽẽn ge diŋ de waŋ Asiri.
Á cẽẽ ge riŋ ma tin go de fuy ma pel no,
Horog ge piŋ ma jag jarn go lay.
21Ti wur sen ni mono, wosela ɓuy gẽẽ ge,
Day tigli yaŋ boŋ de fǐiri de ɓaale ɓaara ɓoge.
22Pãã joŋ ge debaŋ kol go nen maga
À re diŋ noo-pãã,
Werga je maga gwaʼ ge ɓil sir ni re ge
Diŋ noo-pãã wo de noo-yõõre.
23Ti wur sen ni mono, ngel po ɓuy maga
À daʼge koore tlalum de peɗge ni ndar ga yee go solay boo ndar lay mono,
À men ge ɗewseŋ wo de hõõre wo go kaŋ cee ne hara ti.
24À laa ge wo ni de waa wo de toŋwaa doo werga sirn ɓuy
yãã ge go de ɗewseŋ wo de hõõre wo.
25Ti húulìn wo ɓuy maga à jeɗ ra de soŋ mono, jobo kal
ge wo ni gà so has doo hẽẽne ɗewseŋ wo de hõõren wo. Á
laa ge deeren wo wo go ni de sããren wo.
Currently Selected:
ESAY 7: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
