ESAY 66
66
Goŋge Baa ma de el no
1Manwur wãã ga : Ngel ma ciŋ diŋ paale waŋ ɓi no,
tamsir diŋ ngel kaŋ ɓaale ɓi no.
Sen diŋ tiŋ mayse ga nday kãã yaŋ ma booge ɓe
noga ngel ma hon ga joŋ ge yaŋ
diŋ ngel iggi ɓi mo so la?
2Fẽẽre sen wo mo ɓuy ndi hay joŋ ra de doo ɓi day saara
kal naa nen go deŋ ɓuy. Kay diŋ jag Manwuri.
Mokay diŋ fen maga ndi kaŋ ge nen ti sen mono :
Je ma de gayre maga fer ti see ɓe gesiŋ day daɗ doo wããre ɓin mono.
3À sii jag de day, à raw ii jobo lay!
À sii jag de sam day à pog keneg go ne way lay!
À wo hã hãge day à ʼwar gaduuru lay
À wo roɗ fen fõõre paga à goŋ nà sõõre wo!
Jar sen wo mo deŋ ɓuy hoo wo nà diŋ faage ɓaara
maga ɓil ɓaara da sen wo mono day see ɓaara go
fehfeh ti joŋre ɓaara ma horge see jarn wo no.
4Ndi de see ɓi, á coo ge yaŋ jag ɓi maga ndi mo srog wer
ɓaara wo nen dage ɓaara sen ni lay day ndi á ge yaŋ de
fen daŋ jiili ɓaara go ne hara ti lay.
Sen nà wer maga ndi hay ɗe ɗúu,
jobo boŋ yiŋ jag gà ndi hay wãã wããre,
saara la dayge coʼ sug gà.
Á raw wo joŋge diŋ fen maga
bay de el nen ɓi wa, joŋ wo ɓil go fehfeh ti
fen maga bay de cõõre jag ɓi wa mono.
Kiida ma blam taw no
5Coʼ we sug wããre Manwuri nday maga
nday daɗ doo wããre ɓen mono.
Mokay nà diŋ fen maga hẽẽre ɓay maga caa wo
hee de ɓay day tob wo nday go wer ɗúu ɓi wãɗn wo mono :
Daga Manwur mo kaŋ nen wùr ti togoɗge ɓe no,
day wùr ko fruygi ɓayn ɗa so!
Ama sõõre wùu gi ti nà diŋ ne hara.
6Ngarge jag po kal le go ɓi leege no,
gẽẽge po kal le go ɓil tiŋ Baa no,
á nà diŋ gẽẽge Manwur maga de poɗ jar hee ɓen wo mono.
7De maga ɓil leʼ Siyoŋ gà ɗa se biŋ go tuu, de maga
ɓiln leʼn cege gà ɗa se raw biŋ wel go tuu.
8Wose hay laa re ma kayn we ti boŋ la?
Wose hay ko fen ma de maŋ se kayn we ti boŋ la?
Sir po laa yaŋ mbe go nen wurpo boŋ yawla?
Á biŋ mbe wer jar po yaŋ wo go nen wùr
po boŋ tuu yawla? Ɓiln leʼ Siyoŋ no kay se biŋ weere ɓen wo go tuu.
9Je maga ngar ɓil wãy go ga mbargan
mo kal go wa nà diŋ ndi mbi yawla? Manwur wãã nono.
Ndi maga ndi joŋ ga jar mo biŋ go day ndi maŋ jag
jobo go ga á mo biŋ le go wa yawla?
Baa ɓon wãã nono.
10Joŋ we fruygi de Jerusalem so,
á mo hay diŋ fruygi ma ɓil ɓay no,
nday ɓuy maga nday dan mono. Joŋ we ɓil
go fehfeh de ɓe nday ɓuy maga nday de lawge ti ɓe mono.
11Sen mo nà nen maga nday mo jo pãã day
nday mo wùu go ti jag pãã ɓe maga jãã nen jar mono,
nen maga nday mo ko cõõre fẽẽre woore maga a le
wer togoɗge ɓe ma debaŋ debaŋ mono.
12Werga, Manwur wãã ga :
Ko we ga ndi maŋ ge jam yaŋ le ne
hẽn ti doo maarog ma de pããge nono,
ndi maŋ ge togoɗge mani jar dehãyn
wo yaŋ le ne hẽn ti doo pyew maga dug go nono.
À her ge pãã yaŋ ne nday jage,
à hlag ge nday yaŋ yoo,
day à ɓod ge nday yaŋ ti mankũũni jãɗ nene.
13Ndi jãã ge nen ɓay yaŋ doo jobo
maga man ɓe jãã nen ɓe nono day
nday joŋ ge yaŋ de teŋ nen ɓi leege Jerusalem.
14Nday kon ge yaŋ day ɓil ɓay joŋ ge yaŋ go de fruygi,
hm ɓay fer ge yaŋ daʼ egre doo fíi nono.
Manwur kaŋ ge nen weere jõõre ɓen wo yaŋ go
ti doo ɓe ma de egre no,
day naa ge nen sõõge ɓil ɓen yaŋ go ti jar hee ɓen wo.
15Ko we, Manwur le de age!
Á a le nen wùu day pus durgi ɓen
wo doo degurleege nono.
Á a ma bag jag bagge põõ ɓe ma de
hããn go, ma kaŋ re ne jar ti de wùu ma doɗ jar no.
16Manwur cag re ɓen wo nà diŋ de wùu,
á joŋ bon jar téebeere wo ɓuy nà diŋ de moslam.
Jar maga Manwur taw ge ra go wo ngaɓa.
17Jar maga caa wo see ɓaara go de ɓlagge
day fãã wo see ɓaara go ma woge wer
koore ma cor sõõren wo,
sraʼ wo wer kããra yirɗid ma woge see je maga
wo de hayle wer koore sen wo ni mono,
jar maga re wo này gaduuru,
re wo fẽẽre ma horge seen wo de klumri wo mono,
jar sen wo ɓuy taw ge wo go.
Kay diŋ jag Manwuri.
Tayge ma kluu no
18Ndi, ndi yaŋ mbi de ko joŋre ɓaaran wo de ɗiggi ɓaaran wo.
Wur go de age ma tay wer jar wo le ɓuy,
ma tay wer jag ma honla wo le ɓuy.
Á a ge wo yaŋ day saara ko ge togoɗge ɓin yaŋ.
19Ndi joŋ fen kaŋ nen jar dehãy wo ti mopo yaŋ ti yoo
ɓaara, day ndi lag ge jar ɓi maga gwaʼ ge wo yaŋ wo see
wer jar wo, wo Tarsisi, wo Pul wo de Lud jar jwag waan wo
wo Tubal wo de Yafan,
wo ti kaali ma hãã hãã maga hay laa wo
wããre ɓi ti boŋ gà hase day ko wo
togoɗge ɓin ti boŋ gà lay mono.
Á wo ge wo yaŋ sii wããre ti
togoɗge ɓin yoo jar dehãy wo.
20Á fer ge wo hẽẽre ɓay maga wo wo go
yoo jar dehãy wo mo ɓuy wo yaŋ le ɓuy
doo fen hãge ne Manwur nono.
Á fer ge wo yaŋ le de ɓaara ti piiri wo,
ti pus durgi wo de pus durgi ma de saɗ õõbe wo ti,
ti gerhẽẽre wayla wo de manyoŋyoŋ wo.
Á ge wo de ɓaara ti húulì ɓi ma bay ɗagn ɓi leege
Jerusalem doo fen hãge maga jar ni Israyel a wo de ɓe
hãge ɓil hãn maga go de korge ɓil tiŋ mani Manwurn nono.
Wããn diŋ Manwuri.
21Ndi horge ge jar siɗ jag wo de jar Lefid wo yaŋ yoo
ɓaara lay. Wããn diŋ Manwuri.
22Doo maga ngel ma ciŋ ma defayn wo de tamsir ma defay
maga ndi de ma joŋ rage joŋ ge wo yaŋ tum pel ɓi lag mono,
wer mani ɓayn wo de ɗúu ɓay joŋ ge wo yaŋ tum lay.
Kay diŋ jag Manwuri.
23Ti kolge few ciŋ wo daʼ few ma tigriŋ,
ti wur Saba wo daʼ wur Saba ma tigriŋ
wosela ɓuy a ge yaŋ leʼ monɗra pel
ɓi. Wããn diŋ Manwuri.
24Day de maga à laa go mono,
à ko ge húulí jar maga
hay wo hee de ɓi yaŋ wo go deŋ
werga cogcõõre ɓaara huɗ
gi wo gà lay, wùu ɓaara huu gi
go gà lay day saara horge
ge see yaŋ go ne wosela ɓuy.
Currently Selected:
ESAY 66: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
