ESAY 64
64
1Doo wùu maga roɗ koore wo go day ur ti bii go nono,
ndo de kaŋ nen jar hee ɓon wo yaŋ go ti ɗúu ɓo no,
day wer jar de daɗ wo yaŋ doo ɓo.
2Ti wur maga ndo hay joŋ fẽẽre ma joŋ hẽẽne
maga naa wo wùr doo mono,
ndo cwaa le day húulì raw wo daɗge doo ɓo.
3À laa ti boŋ noga jobo wãã noga nen
ko we ga baa po ma tigriŋ go sar
bay diŋ ndo wa hay joŋ we doo kay nono
see je maga hay gor doo ɓe gà hase.
4Ndo hay caa pel je maga joŋ fen
ma ti ngel ɓen go de fruygi mono,
caa pel jar maga fer wo ɗig ti ti faage
ɓo maga wùr hay daʼ see wùr le
go ti wur ma honla ɓuy ti ɓaara mono.
Ama ɓil ɓo raw cee moge
ti wùr werga wùr hay joŋ ɓlagge.
5Wùr kol go ɓuy doo fen yeɗe nono,
day joŋre wùr ma ti ngel ɓen wo
ɓuy kol wo go doo õõbe ma de ɗag nono.
Wùr lwaɗ go ɓuy doo sug koo nono day ɓlagge
wùrn raw wo de wùr wer doo leege nono.
6Je ma ɗe ɗúu ɓo noga pũy go maga
se mo saʼ see ɓe see ɓo bay wa hase.
Sen nà werga ndo yoŋ see ɓo go ne wùri
day ndo men wùr mbo wo go leɗge tiɗ tiɗ
wer ɓlagge wùrn wo mono.
7Bà mbe mo ɓuy ndo Manwur ndo diŋ Pan wùri.
Wùr diŋ pãy, ndo diŋ je booge no wùr ɓuy
wùr diŋ joŋre maga ndo joŋn de doo ɓo.
8O Manwuri, sõõ ɓil go debaŋ ne wùr ti has tuu wa,
fer ɗig ti tum tum ti debaycõõre wùrn wa.
Ko mbo nen ɓo, wùr mbe nà diŋ jar mani ɓo no.
9Ɓi leege ɓo ma bay ɗagn kol wo go diŋ tabuli,
Siyoŋ gwaʼ go ti koɗe,
Jerusalem kol go nen coocoo.
10Tiŋ Baa wùr ma bay ɗag de woore ga pããre wùr
hay wo far ti ɓo ciŋ ɓil ɓe kol go diŋ har wùu,
fen wùr maga hay de el mo ɓuy ɓlag go.
11Pel fẽẽre sen wo mo deŋ ɓuy
ndo joŋ ge mbo yaŋ baʼ yawla Manwuri?
Ndo wãã ge mbo mopo gà so yaw noga
ndo mbuɗ gi mbo sõõre wùr wo go ni no has so yawla?
Currently Selected:
ESAY 64: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
