ESAY 62
62
Baa fer ge yaŋ ooge ti Jerusalem
1Ndi fer ge go baʼ gà nà wer Siyoŋ,
ndi hay ge eŋ gà nà diŋ wer Jerusalem.
Daga keɗed ɓen mo naa nen go doo waa
ma de jag toŋn ɗa, pẽẽge ɓen mo naa
nen go doo wùu ma de doʼge
ti dol de yããge no ɗa lay.
2De sen ge mo so no,
jar dehãy ko ge wo keɗed ɓon yaŋ
day waŋre koge wo togoɗge ɓon yaŋ.
À ɗe ge ndo yaŋ de ɗúu ma defay maga
Manwur kaŋn ge ne ndo de jag ɓe mono.
3Ndo joŋ ge yaŋ diŋ tilgi
ma sagge doo Manwuri,
diŋ gawraŋ ma ti waŋre
wo ɓi coo doo Baa ɓo no.
4À ɗe ge ndo ga wãy maga
á hay menn go gà so hase.
À ɗe ge sir ɓon ga ma de
ɓlaggen gà so hase.
Ama à ɗe ge ndo yaŋ ga :
Á de cõõre jag ɓi.
À ɗen ge yaŋ ga wãy war no werga
ɓil Manwur go feh ti ɓo day
sir ɓon daʼ ge war yaŋ.
5Doo maga wel ma jõõ kol go
diŋ war may tigli nono,
weere ɓon kol ge wo doo werpiiri ɓo wo nono.
Doo maga may ma de yããge gon fruy
ɓil je ma de yããge ɓen nono,
ndo fruy gi ɓil Baa ɓon yaŋ go lay.
6Jerusalem, ndi go de lag jar
gor ngel wo ciŋ ti kor ɓon wo.
Á bay wo maga saara fer go baʼ
de ceg noga de suŋ wa so hase.
Nday maga nday de ɗig ti
Manwur tum ti Jerusalem mono,
iggi ɓay bay wa hase!
7Menn we iggi wa hase say á mo fer
go ʼwũy Jerusalem ti ngel ɓe day
mo koln go diŋ fen maga à keen ti tamsir la ɗa.
8Manwur hay hãʼ go de egre ɓe no,
de doo ɓe ma de egren ga :
Ndi hã ge coore ble ɓon go
ma rege ne jar hee ɓon wo gà so hase.
Jar ni waaren jo ge wo yii ɓo ma defay
maga ndo daʼn de joŋre ɓo go gà so hase.
9Jar maga hay lag wo coore ble ɓaaran ciŋ reen ge
wo yaŋ day joŋ ge wo suseʼ yaŋ ne Manwuri.
Jar maga hay hãã wo tlalum jo ge wo yii
yaŋ ti feele ma ti ngel ɓi ma bay ɗag no.
10Lag we le go, lag we le go jag tiŋ!
ʼWũy we faage go ne jar no!
Ɓoʼ we, ɓoʼ we faage, far we húulìn wo go!
Maŋ we drapo go ciŋ ti wer jarn wo!
11Manwur yaŋ le.
Á de riŋ jag sir tawge wo go ɓuy de re ma kay ga :
Wii we may ma Siyoŋ ga :
Ko je yãã ndon le de age,
ko ga á age de poɗge ɓen doo,
leʼge joŋre ɓen wo de seege pel ɓe.
12À ɗe ge ra yaŋ ga jar maga wo go ti nene,
jar maga Manwur fer le coo rage mono
day ma ɓo à ɗe ge ndo ga :
Maga à kiɗn le kiɗgi mono, ga :
Ɓi leege maga à bay go de tobge ɓe wa mono.
Currently Selected:
ESAY 62: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
