Abharuumi 10
10
1Abhayiri bhaani, eneenda kwa omwoyo gwani gwone ati Abhayisirayeeri bhachungurwe. Ogwo nigwo enibhasabhirwa muno ku‑Nyamuwanga. 2Enibhabhwira ati, abhaanu abho abheekomeesya muno okuyenja Nyamuwanga, noorwo kutyo bhatakusombookerwa kutyo Nyamuwanga keenda bhamuyenje. 3Abheene ꞉bhataaruubhire injira inu Nyamuwanga kaabhara abhaanu okubha abharengeresi, kwa okubha ꞉bhataayisombookeeywe, ka wone ꞉bhaayenjere abheene injira ya okwibhonera obhurengeresi. 4Kirisito ꞉aakuumisiisye ebhiraagiro bhyone bhya Muusa, korereki abhaanu bhoone bhanu abhamwikirisya, bhabharwe okubha abharengeresi imbere ya Nyamuwanga.
Abhaanu bhoone abhatura okuchunguka
5Muusa ꞉aakaamire inguru ya okubha omurengeresi imbere ya Nyamuwanga ku‑njira ya okuruubha ebhiraagiro ati, “Omuunu unu ariruubha joone jinu jiragiriiywe mu‑bhiraagiro, ariikaraga kwa okuruubha ebhyo.”#10:5 Ringira Abharaawi 18:5. 6Nawe inguru ya okubharwa okubha omurengeresi imbere ya Nyamuwanga ku‑njira ya okwikirisya, Muusa ꞉aayikire ati, “Mwasiga okwibhuusya mu‑myoyo jeemwe ati, ‘Niga unu kaatura okuriinya inguru okukinga mu‑rwire?’” Okwayika kutyo kuri rwa okugenda okusabhwa Kirisito aaje ku‑chaaro anu. 7Rindi Muusa aayikire ati, “Ka wone mwasiga okwayika ati, ‘Niga unu kaatura okwika emwaro okukinga nyombe?’”#10:7 Nyombe. Ku‑meeresyo amaafu, ringira mu‑Meeresyo inguru ya Emisango Emikomeeye. Okwayika kutyo kuri rwa okugenda okureeta Kirisito okusooka nyombe. 8Nawe chinu echaayikwa mu‑Bhikaame Ebhyeru ni ati, “Omusango gwa Nyamuwanga guri yeeyi na awe, guri mu‑kanwa kaawo na guri mu‑mwoyo gwawo.”#10:6‑8 Ringira Orwichuko rwa Ebhiraagiro 9:4, 30:12‑14. Woori, omusango ogwo nigwo gunu echiraasya inguru ya okwikirisya Yeesu Kirisito. 9Omusango ogwo ni ati, ukatogora mu‑kanwa kaawo omwene ati, “Yeesu ni Raatabhugenyi,” na okwikirisya mu‑mwoyo gwawo ati Nyamuwanga ꞉aamusuuruuye okusooka mu‑bhafuuwe, urichungurwa na Nyamuwanga. 10Omuunu akeekirisya Yeesu Kirisito kwa omwoyo gwaye, kaabharwa okubha omurengeresi imbere ya Nyamuwanga. Aakatogora eriikirisya ryaye kwa omunwa gwaye, kaachungurwa. 11Ebhikaame Ebhyeru ebhyayika ati, “Bhuri muunu unu kaamwikirisya, atariiswasibhwa wuri.”#10:11 Ringira Iisaya 28:16. 12Emisango ejo ejeeresya ati itari‑wo isoroore agati ya Abhayawudi amwi bhanu bhatari Bhayawudi. Ari‑wo Raatabhugenyi umwi era ku‑bhaanu bhoone. Omwene ni wa kisi muno ku‑bhaanu bhoone bhanu abhamusabhwa. 13Rwa kutyo Ebhikaame Ebhyeru ebhyayika ati, “Bhuri muunu unu kaasabhwa kwa okwiyikanya risiina rya Raatabhugenyi, arichungurwa.”#10:13 Ringira Yoweeri 2:32.
14Woori, abhaanu abhatura kutiki okumusabhwa araabha bhachaariga okumwikirisya? Ka wone, abhatura okumwikirisya kutiki araabha bhachaariga okuungwa emisango jaaye? Abhatura kutiki okuungwa emisango jaaye araabha omuunu achaariga okubharaasisya? 15Ka wone, abhaanu abhatura kutiki okuja okuraasya emisango ejo araabha bhachaariga okutumwa? Rwa kutyo Ebhikaame Ebhyeru ebhyayika ati, “Okukinga kwa omuunu unu kaareeta Emisango ja Ekisi, kurikondisyaga abhaanu bhanu bharimutegeresya!”#10:15 Ringira Iisaya 52:7.
16Noorwo kutyo, jitari ati Abhayisirayeeri bhoone ꞉bhaagayukire Emisango ja Ekisi ejo kwa okwikirisya Kirisito, abhaafu bhajiremere. Omuragi Iisaya ꞉aayikire ati, “Raatabhugenyi, niga unu eekirisya emisango jeeswe?”#10:16 Ringira Iisaya 53:1. 17Kurwa ejo, abhaanu abhatura okwikirisya Kirisito araabha bhaakoongwa emisango inguru yaaye. Nawe abhatura okuungwa era emisango ejo araabha jikaraasibhwa.
18Mbe, araabha ni kutyo, siga nibhuusye ribhuusyo. Angu, Abhayisirayeeri bhachaariga okuungwa emisango ejo? Ni chimari ati ꞉bhaajuunguuwe, kwa okubha Ebhikaame Ebhyeru ebhyayika ati,
“Jinu ꞉bhaayikire, ꞉jeetabhirisiibhwe mu‑chaaro choone,
na emisango jeebhwe ꞉jaakingire mbaara joone ja echaaro.”#10:18 Ringira Ijabhuri 19:4.
19Nibhuusye ribhuusyo erindi. Angu, omwanya gunu Abhayisirayeeri ꞉bhoonguuwe emisango ejo, ꞉bhataajisombookeeywe? Ni chimari ati ꞉bhaajisombookeeywe, kwa okubha omwanya gwa Muusa, Nyamuwanga ꞉aabhwiriiye Abhayisirayeeri ati,
“Niribhakora murorere orwiso
abhaanu bhanu bhatari bhaanu bhaani.
Niribhakora mubhega nimubhiyirirwa muno
bhanu bhatakumenya gwonegwone.”#10:19 Ringira Orwichuko rwa Ebhiraagiro 32:21.
20Ka wone, omuragi Iisaya ꞉aayikire kwa ribhaasi emisango ja Nyamuwanga ati,
“Abhaanu bhanu bhatakunyenja,
nibho bhaandora.
Abhaanu bhanu bhatakubhuusirisya emisango jaani,
nibho neeswerura ku‑bheene.”#10:20 Ringira Iisaya 65:1.
21Nawe inguru ya Abhayisirayeeri, Nyamuwanga ꞉aayikire ati,
“Jisiku joone naariga ninsabhwa abhaanu bhaani bhasubhe bhabhe na obhumwi naanye,
nawe ni bhaanu bhanu bhatakungayuka,
ka wone ni bhaanu bhanu abhankayira.”#10:21 Ringira Iisaya 65:2.
Currently Selected:
Abharuumi 10: jit
Highlight
Copy
Compare
Share
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
