Revelesen 13
13
Si dm la ima aut dan al nata ha
1 #
Taniel 7:3;
Rev 17:3,7-12. Kana np'tir arna nun a p'ak nata. Laha, kala si dm iamk ima aut dan al nata, ptn isaru, kuman inal. Manu p'as inal iter arna kuman. Arna ptn udlani aulul a naha iamk isip'len Atua. 2#Taniel 7:4-6.Si dm lera nla ti inep'a lapt lil, avr ti iv'i lepet. Tln inep'a tl si dm iamk, avr ti iv'i pea. Nl navan inep'a nl nava laiun. Laha, alkit lahara itu nut huan ani katu napl p'asan ani kani ti ima kav'i mlin lil iamk. 3Laha, nla ti ptn iamk avrla ti atri a ti ipam'a, v'eti ima kap'as ml. Laha, m'ertu udlani arna nadep' avtah a si dm lera kavsapei. 4Kavpatei alkit la itu nut hua a si dm hara, kavpata si dm kavvr ti a, “?Hin ak inep'a si dm laha? ?Hin ak irndu ti ipan naur m'ei?”
5 #
Taniel 7:8,25; 11:36. Laha, am'ahu a ti ipavr v'nen stu kavr v'nen lilil kasip'len Atua, katu nut hua ani ipaier nal ipanelv'a pln iru (42). 6Laha, iv'ana kasip'len Atua kakasr nahan, kasip'len nmah tamatan m'er m'ertu avlak arna nut eia. 7#Taniel 7:21.Am'ahu ani a ti ipan naur m'er m'ertuan Atua kasiv'r, katu nut hua ani a ti ipav'i mlin na nl nam'el udlani, m'er m'ertu avv'ana arna v'nen udlani, kav'i mlin na v'anu udlani. 8#Npin 69:28.Laha, m'ertu udlani avlak arna nadep' apavpatei, avv'i m'ertu ahaulul a nahar al puk na silv'ien, iv'i nka Net Sivsiv la atrp'n sarei naran nadep' idahei ha.
9Ipavr ti m'ertu kinkin drlnan iak, hin iparni. 10#Seremaia 15:2; 43:11.M'ertu iani ti m'ertu ipap'resin, hin ipap'resin. M'ertu itrp'n m'ertu a tali lil, hin apatrp'ni a tali lil. Arna si lera m'ertuan Atua nlr ikp'arei pr, kavv'ahi.
Si dm la ima aut dan al nadep' ha
11Sarei, nla si dm uraur ima aut dan al nadep'. Hin kuman iru inep'a net sivsiv, v'eti iv'ana inep'a alkit. 12Hin ien sei kaua nut hua udlani iv'i nka si dm itauamu, kani arna nahn, kani ti m'ertu udlani avlak arna nadep' apavpata si dm itauamu la atri a ti ipam'a v'eti ima kap'as ml hara. 13Hin ien pari lilil a ti m'ertu apavtah ani, kani ti nep'v'en iendan eia kadama a nadep' arna nah nelnal. 14Isner m'ertu avlak arna nadep' arna pari lilil lahara, atu nut hua ani a ti ipani arna nah si dm itauamu hara, kavr anr m'ertu avlak arna nadep' kavr ti apavan aitul ipamk ipanep'a m'lk si dm la atri a talei v'eti isilv' uam hara. 15Hin nut huan iak a ti ipani ti aitul iv'i m'lk si dm hara, ipama kasilv' kav'ana, kani ti aparpep'n m'ertu la ahavpata m'lk si dm hara. 16Kani ti m'ertu udlani, avv'i m'ertu papa v'aha m'ertu lilil, m'ertu siar istudau, v'aha m'ertu siar ihei, mlin v'aha m'ertu na m'akarien, apavlev' mak arna m'ldu lm'ar v'aha arna tana nahr. 17Laha, kani ti m'ertu kinkin ikaul sei v'aha ikaulul a sei, v'eti m'ertu uaki iua mak lahara, v'aha naha si dm, v'aha napa na nahan.
18Arna si lera parndu m'ertu irndu sei. M'ertu irndu sei, ip'as a ti hin ipaspan napa na si dm, sena ti iv'i napa na m'ertu uaki. Napa nen iv'i 666.
Currently Selected:
Revelesen 13: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
