Matiu 3
3
Parian a Sun Paptais
(Mak 1:1-8; Luk 3:1-9,15-17; Sun 1:19-28)
1Arna naran lera, a Sun Paptais ima kavrp'ep'a v'nen p'as arna nut kaka iter a Sutia, kavr ti a, 2#Mat 4:17; Mak 1:15.“Pavvav nlm'i, sena ti v'anu eia itmima sarei.” 3#Aisaia 40:3.Aulera iv'i dui la Aisaia iv'i pruvet Atua, itvrur sarei ha, kavr ti a, “Dui iamk iv'ana eia arna nut kaka kavr ti a, ‘Pavandedp' a navanelan a Mlin Eia kavan mamh alan ipaviviln.’ ”
4 #
2 Armlin 1:8. A Sun lera iua nil kam'el iv'i klusan, kav'u sitrav avani arna nila p'ak pluk, suadan iv'i tapat m'a ns sukapak iter al lili. 5Laha, m'ertu avlak a Serusalem m'a nut a Sutia udlani m'a nut udlani iter a p'ak naui a Surtan, avrav'a asnn, 6Kavvrp'ep'a si stuar, laha, hin ien paptais anr al naui a Surtan.
7 #
Mat 12:34; 23:33. V'eti naran ila ti Varisi m'a Satiusi avstudau avrama asnn a ti ipan paptais anr, ivr anr kavr ti a, “Kam'i kvv'i net nmat. Hin ak ivr a kam'i a ti pavruh asn nl reran Atua la ipama ha? 8Pavv'iv'en navan a ti ktvvav sera nlm'i. 9#Sun 8:33.V'eti mavvri arna nlm'i kavvr ti a, ‘A Epraham iv'i a tetiam'em'.’ Sena ti kana nvr a kam'i, Atua irndu ti ipalev' nav'et laha kani ti apavv'i a natn a Epraham. 10#Mat 7:19.V'eti hilaha tamiuk itater sarei asn uar nai a ti apatrusus nai udlani navan p'as ihei, kasrani al nep'v'en. 11Aau, kana nen paptais a kam'i a nauei arna ti pavvav v'ahienam'i, v'eti Dui ipatauatah a kana hin nut huan ilil isiv' kana, kana naviviln a ti p'eua susan. Hin ipan paptais a kam'i a M'im'iln P'as m'a nep'v'en. 12Hin iua savel na uit aan p'ret ani al lm'an, sena ti ipasran uit nen eia, a ti nalen ipatvla heia m'at nen, sarei, kanen m'at nen kataui al nmah nen, kal heian udlani al nep'v'en ikahiris naran.”
A Sun ien paptais an a Iesu
(Mak 1:9-11; Luk 3:21,22)
13Arna naran lera, a Iesu idan a Kalili kadama a naui a Surtan asn a Sun a ti ipan paptais ani. 14V'eti a Sun irn ti ipavrkari kavr ti a, “Iviviln a ti Nakm pan paptais a kana. ?Kma asnk sena v'ata?”
15A Iesu ivrprani, kavr ti a, “Pam'ahu a ti ipanap'i lera hilaha sena ti iviviln a ti p'van si udlani Atua itaui.” Sarei, a Sun im'ahu ani.
16Naran a Iesu itpaptais sarei, kadama aut, pavrni, iv'amk m'a ti nut eia iela hin asnn, laha ila M'im'iln Atua ima a nadep' inep'a navimar, kadap's aranan. 17#Ap'u 22:2; Npin 2:7; Aisaia 42:1; Mat 12:18; 17:5; Mak 1:11; Luk 9:35.Laha, pavrni, nadl iamk iendan eia kavr ti a, “Aulera iv'i a Natk, nlap'as ani, nrn ip'as ani istudau.”
Currently Selected:
Matiu 3: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia