Matiu 28
28
A Iesu ithal ml arna m'ienen
(Mak 16:1-8; Luk 24:1-12; Sun 20:1-10)
1Naran Sapat ithiris sarei, naran neiel itv'i ti ipatpeia arna napn itauamu a uik, a Meri a Maktala m'ei a Meri uraur lahara arma a ti aparla navap atin a Iesu a nln. 2Laha, pavrni, nami lil imi, sena ti enselan a Mlin Eia idan a nut eia kadama a nadep' kushla nav'et itukar karliu iv'a au kalak aranan. 3Nahn inep'a naran nu ilev' m'aten, klusan itva istudau, kanep'a sera snu. 4Laha, m'rnur avp'aus navap avdedrn ani kavvrdedrn kavrama kavnep'a sera m'ertu im'a.
5V'eti ensel ivr anr artav'et lahara kavr ti a, “Mardedrn, sena ti kana nrndu ti krtala an a Iesu la aluei arna su lamu ha. 6Hin ialak atlaha, sena ti itthal ml, inep'a nut itvr sarei inap'ei. Parma karla nut atu p'akn a Mlin Lil. 7Parv'el ipalahml karvr anr arm'ertuan a ti Hin itthal ml arna m'ien. Parrni, Hin itauamu a kam'i a Kalili. Kam'i pavlei atlera. Parrni, ntvr sarei a kam'i.”
8Laha, hir arln navap karv'el ilahml kardedrn karrn ip'as istudau karvrvr a ti aparvrp'ep'a v'nen lera anr arm'ertuan a Iesu.
Tav'et arru arpatei a Iesu
9V'eti naran arv'a a ti aparvrp'ep'a v'nen lera anr arm'ertuan, pavrni, a Iesu ima asnr, kavr ti a, “Ip'as.” Laha, hir arv'a asnn karsisihpu karuada tln karpatei. 10Laha, a Iesu ivr anr kavr ti a, “Mardedrn. Parv'a karvr anr artv'alk a ti apavrav'a a Kalili kavla Kana atlera.”
Avtu nav'et anr m'rnur a ti apavhap'il
11Sarei, naran arv'el, pavrni, m'rnur kinkin avp'aus navap avrav'a ml arna v'anu kavvrp'ep'a si udlani itu hin asnr arpris lil. 12Hir avp'lt m'er elta udlani kavvruri, sarei kavtu nav'et istudau anr arm'rnur kavvr anr kavvr ti a, 13“Kam'i pavvr ti a, ‘Arm'ertuan avrama lihat kavv'nah p'akn naran nvm'atr.’ 14V'eti ipavr ti kavman iparn v'nen lera, kam'em' uaki p'vv'ana mamh m'ei kavani ti der imaier kam'i.” 15Laha, arm'rnur avlev' nav'et kavani inep'a nut atvvr sarei anr inap'ei. V'eti ardu a Isrel avvr v'nen lera uam nakl ier dika.
A Iesu itep'a m'ertuan a ti apavrav'a arna nut udlani kavvrp'ep'a v'nen p'asan
(Mak 16:14-18; Luk 24:36-39; Sun 20:19-23; Parei 1:6-8)
16 #
Mat 26:32; Mak 14:28. Laha, arm'ertuan arnal lman iamk avrav'a a Kalili arna ptha la a Iesu itvr sarei anr ha. 17Naran avlei, avpatei, v'eti hir kinkin ahavv'ahi ipahua.
18Laha, a Iesu iv'a asnr kav'ana m'er kavr ti a, “Atua itu nut hua udlani a Kana arna nut eia m'a nut a nadep'. 19#Parei 1:8.Sena si lera, pavrav'a arna v'anu udlani kavani ti apavv'i m'ertuak, kavan paptais anr arna nahan a Tatei, a Natn m'a M'im'iln P'as. 20Kavv'iv'en anr a ti apavsapa v'nen udlani nttu sarei a kam'i. Laha, pavrni, Kana nlak asnm'i nakl dav'a ipaier naran nadep' ipahiris.” Amen.
Currently Selected:
Matiu 28: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia