Matiu 23
23
A Iesu iv'ana hua m'er ardu na v'nen hua m'er arvarisi
(Mak 12:38-40; Luk 11:37-52; 20:45-47)
1Arna naran lera, a Iesu iv'ana m'er nelnal m'er m'ertuan, kavr ti a, 2“Ardu na v'nen hua m'er arvarisi avua m'lnen a Musis. 3Sena si lera, si udlani hir avvr ti pavani, pavsapei kavani, v'eti mavandina pariar, sena ti hir avvr sei, v'eti ahavani. 4Sena ti hir avtitah si dv la ihua a ti m'ertu ipauei ha, kavtaui arna va natei, v'eti hir ahavrn ti apavua si dv lera a nirh lm'ar ipamk. 5#Mat 6:1; TVH 6:8; Nut Kaka 15:38.V'eti si udlani avani, iv'i sena ti m'ertu ipalei uaki. Avua pahus lil Paivul kinkin iter a nln, kavan heiar smrn ip'rp'arei. 6Kavlap'as a m'lna m'ertu lil arna tim'ah, m'a napl p'asa m'ertu lil al nmah tamat. 7Kavrn ip'as ani naran m'ertu avvr ip'as anr arna nut aulul a sei kavvr ti a, ‘Tisa, tisa.’ 8V'eti amavr a kam'i kavr ti a, ‘Tisa’, sena ti tisam'i iamk uaki, iv'i a Kristu. Kam'i udlani kvv'i tiamk. 9Kam'i mavv'ara a dui kinkin arna nadep' kavvr ti a, ‘Tatei,’ sena ti a Tetiam'i iamk uaki ilak eia. 10V'aha amav'ara a kam'i kavr ti a, ‘Mlin,’ sena ti a Mlinam'i iamk uaki, iv'i a Kristu. 11#Mat 20:26,27; Mak 9:35; 10:43,44; Luk 22:26.V'eti m'ertu ilil mau aranam'i udlani, hin ipama kav'i m'ertu na m'akarienam'i. 12#Luk 14:11; 18:14.M'ertu iani ti nahan iv'a eia, apani ti nahan ipav'a a nadep', v'aha, m'ertu iani ti nahan iv'a a nadep', hin nahan ipav'a eia.
13Usa, nrn istu a kam'i, kvv'i tisa na v'nen hua m'er Varisi, kam'i kvp'ip'en lamuru. Sena ti kvp'leskar liu na v'anu eia arna nah m'ertu. Sena ti kam'i kaavrav'a eim, v'aha kaavm'ahu anr m'ertu uraur, la avrn ti apavrav'a eim ha. 14Usa, nrn istu a kam'i, kvv'i tisa na v'nen hua m'er Varisi, kam'i kvp'ip'en lamuru. Sena ti kvv'nah si udlani al nmahar tvtanu, kavukl kam'i arna tamat p'arei. Sena si lera, Atua iputakm a kam'i ipalil mau sanan.
15Usa, nrn istu a kam'i, kvv'i tisa na v'nen hua m'er Varisi, kam'i kvp'ip'en lamuru. Sena ti kvunanut arna nauak al nata kavv'el a nadep' a ti pavani m'ertu kinkin ipamk ipasapa kam'i, v'eti naran ima kasapa v'ahienam'i, kvani ti ima kav'i a natn a Sitan, istu isiv' kam'i iv'aru.
16Usa, nrn istu a kam'i la kvv'i m'etapis kavv'ev'a m'ertu uraur ha, kavvr ti a, ‘Ipavr ti m'ertu kinkin ipah lm'an kavr nmah tamat, ki lera iv'i si kaka uaki, v'eti ipavr ti ipah lm'an kavr kul iter al nmah tamat, ki lera iv'i si dau.’ 17Kam'i kvdilin kavv'i m'etapis. ?V'ata ilil mau, kul v'aha nmah tamat la iani ti kul ima kav'i si lil ha? 18Kavvri ml kavvr ti a, ‘Ipavr ti m'ertu kinkin ipah lm'an kavr nev'etet al si slm aranan, ki lera iv'i si kaka uaki, v'eti ipavr ti ipah lm'an kavr sei iter aranan, ki lera iv'i si dau.’ 19Kam'i kvdilin kavv'i m'etapis. ?V'ata ilil mau, sei avtau arna nev'etet al si slm aranan, v'aha nev'etet la iani ti sei avtau aranan ima kav'i si p'as ha?
20Sena si lera, m'ertu ipah lm'an kavr nev'etet al si slm aranan, inep'a ti hin iah lm'an kavr nev'etet m'a si udlani iter aranan. 21V'aha m'ertu ipah lm'an kavr nmah tamat, inep'a ti iah lm'an kavr nmah tamat m'ei Atua la ilak a nln ha. 22#Aisaia 66:1; Mat 5:34.V'aha m'ertu ipah lm'an kavr nut eia, inep'a ti hin iah lm'an kavr napl p'as m'ei Atua la ilak aranan ha.
23 #
Livai 27:30. Usa, nrn istu a kam'i kvv'i tisa na v'nen hua m'er Varisi, kam'i kvp'ip'en lamuru. Sena ti kvlev'la tait arna sei ataui al tim'ah, iv'i ru nina kinkin, nahan iv'i min, m'a m'et na si kinkin, nahan iv'i til m'a kamin, v'eti kvln si lil arna v'nen huan Atua, iv'i ti m'ertu ipan sei ipaviviln karn istu a m'ertu uraur kav'ah Atua. Iaviviln a ti pavln si papa lahara, v'eti mkvsapa si lil lera pr. 24Kam'i kvv'i m'etapis kavv'ev'a m'ertu. Kvlev'la namah iter al naui m'am'am'i, v'eti kvdrlm' kam'el.
25Usa, nrn istu a kam'i kvv'i tisa na v'nen hua m'er Varisi, kam'i kvp'ip'en lamuru. Sena ti kvsila tah panikin m'a tah p'let, v'eti nln ilini a v'nv'nahien m'a p'kl la iaviviln ha. 26Nakm Varisi kv'i m'etapis. Pasila nl panikin m'a p'let ipatauamu, sarei tahn ipap'as.
27 #
Parei 23:3. Usa, nrn istu a kam'i kvv'i tisa na v'nen hua m'er Varisi, kam'i kvp'ip'en lamuru. Sena ti kvnep'a nut atin m'ertu a nln, katu laim aranan itva, ala ti ip'as istudau av'aran, v'eti a nln ilini a su m'ertu im'a m'a si nelnal ipu. 28Kam'i kvnap'i lera. Naran m'ertu avla p'akm'i, avla ti kvp'as, v'eti arna nlm'i kvukl kam'i istudau, kavlini a si stu.
29Usa, nrn istu a kam'i, kvv'i tisa na v'nen hua m'er Varisi, kam'i kvp'ip'en lamuru, sena ti kvhl nut kvtin pruvet a nln, kavmhmah a nut atin m'ertu p'as, 30kavvr ti a, ‘Advr ti kam'em' m'dvlak naran a tetiam'em' advsilv' uam, m'davp'lt m'er naran avani ti dir pruvet irarev'.’
31Arna si lera, kvv'iv'en a ti kvv'i a natr m'ertu atvrpep'n sera pruvet. 32Kam'i pavhiris a pari stu la a tetiam'i atvan sarei tituei ha. 33#Mat 3:7; 12:34; Luk 3:7.!Kam'i kvv'i nmat! !Kam'i kvv'i net nmat! ?Inap'i hin pavruh asn nl reran a Mlin Eia kavv'ah ti imasran kam'i al nep'v'en? 34Sena si lera, Kana p'etap'er pruvet, dui avrndu sei, m'er tisa na v'nen hua asnm'i. Hir kinkin pavtaur arna su lamu, kavrpep'nr, hir kinkin pavrpr a nahau al nmah tamatam'i kavtp'av'r a ti apavruh arna v'anu iamk kavrav'a arna v'anu uraur. 35#Ap'u 4:8; 2 Krun 24:20,21.Sena si lera, Atua iputakm a kam'i sena di m'ertu p'as udlani la kvani ti irarev' arna nadep' ha. Itudina hin naran din a Ep'el, iv'i dui p'as, irarev' dav'a ier naran din a Sekaraia, iv'i a natn a Perekaia, la kvrpi a p't nut na nmah tamat m'a nev'etet al si slm aranan ha. 36Nvrdaui, nvr a kam'i. Atua iputakm a m'ertu avsilv' hilaha sena si udlani lera.
A Iesu itakal sanar arm'ertu a Serusalem
(Luk 13:34,35)
37U Serusalem, Serusalem, kam'i kvrpep'nr pruvet, kavmhrp'nr m'ertu Atua itap'er avrama asnm'i. Iel iel nrn ti p'etup'lten a netm'i inep'a nut ntu iuav'kar natn a nv' nil heian inap'ei, v'eti kaavrni. 38#Seremaia 22:5.Pavlei, Atua itln sera nmaham'i, iter vn. 39#Npin 118:26.Sena ti Kana nvr a kam'i, mkavla Kana ml, dav'a ipaier naran kam'i pavvr ti a, ‘P'vpata Dui la ima arna nahan a Mlin Eia ha.’ ”
Currently Selected:
Matiu 23: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia