Matiu 22
22
A Iesu isran v'nen ivrur tim'ah na lheien
(Luk 14:15-24)
1A Iesu isran v'nen asnr ml, kavr ti a, 2“V'anu eia inep'a sera mlin lil iamk ien tim'ah na lheienan a natn dui. 3Katap'er dui na m'akarienan a ti apavtu v'nen anr m'ertu udlani itmiman sarar, a ti apavrama arna tim'ah, v'eti ahavrn ti apavrama. 4Sarei, itap'er dui na m'akarienan uraur ml, kavr anr kavr ti a, ‘Pavvr anr m'ertu ntmiman sarar, kavvr ti a, “Pavrni, ntendedp' sera tim'ahak. Atrp sera plukak, m'a lvn nen. Atmhmah sarei a si udlani. Pavrama arna tim'ah na lheien.” ’ 5V'eti hir ahavrn ti apavv'ah v'nenan, kavruh. Nki iamk italu, nki uraur im'akar al stuan. 6Duanar avuadar dui na m'akarien lahara, kavanp'ilanr kavrpep'nr. 7Naran mlin lil irn si lera, nln irer anr, katep'a m'rnuran. Laha, avrp ardu avrpep'n m'ertuan lahara, kavtu nap' a v'anu lilar. 8Sarei, ivr anr dui na m'akarienan, kavr ti a, ‘Atmhmah sarei a tim'ah na lheien, v'eti m'ertu la ntmiman sarei ha, ahavviviln a ti apavrama. 9Sena si lera, pavrav'a arna nut navanel lil m'a navanel papa avp'lt, kavmiman m'ertu kam'i pavpaslar a ti apavrama arna tim'ah.’ 10Laha, arm'ertu na m'akarienan lahara avrav'a arna navanel, kavtup'lten m'ertu udlani avpaslar atlera, m'ertu stu m'er m'ertu p'as. Dav'a dav'a nmah na tim'ah ima kalini a m'ertu.
11V'eti naran mlin lil ima eim a ti ipala m'ertu udlani avp'lt arna tim'ah, ila m'ertu iamk iaua kalik p'as na lheien. 12A mlin ivr ani, kavr ti a, ‘?Tv'alk, kma eim inap'i, hin kaaua kalik p'as na lheien?’ V'eti aulera iklu mau, iavr si kinkin. 13#Mat 8:12; 25:30; Luk 13:28.Laha, mlin lil ivr anr dui na m'akarienan kavr ti a, ‘Pavhuda lm'an m'a tln, kavlav'i kavsrani av'aran al m'alk. Arna nut lera m'ertu apavtakal kavhaha lur.’
14Sena ti Atua iv'ara a m'ertu istudau, v'eti iv'lair m'ertu uaki avdakr.”
?Iviviln a ti apul takis kavtau an a Mlin Lil a Rum?
(Mak 12:13-17; Luk 20:20-26)
15Laha, arvarisi avrav'a kavp'lt a ti apavpasla navanel a ti apavsrm'alet ani arna v'nenan. 16Kavtep'a m'ertuar m'er m'ertuan a Erut avrav'a asnn kavvr ti a, “Tisa, nvrndu ti Nakm kv'i dui p'as kav'iv'en navanelan Atua arna v'nen dau. Nakm kaadedrn a m'ertu, sena ti kaav'ahur nah m'ertu. 17Sena si lera, pavr a kam'em', ?Nakm kv'ah v'ata? ?Iviviln a ti p'vul takis kavtau an a mlin lil a Rum, v'aha ihei?”
18V'eti a Iesu itrndu sera v'ahien stuar kavr ti a, “Kam'i kvp'ip'en lamuru. ?Inap'i hin kvandina Kana? 19Pavv'iv'en nav'et na takis a Kana.” Laha, avuirma nav'et iamk asnn.
20A Iesu ivr anr kavr ti a, “?M'lkn laha iv'i nkan a hin ak? ?Nahan aulul ani iv'i nahan ak?”
21Avvr ani kavvr ti a, “Iv'i nkan a Mlin lil a Rum.” Sarei, ivr anr kavr ti a, “Sena si lera, sei iv'i nkan a Mlin lil a Rum, pavtau an a Mlin lil a Rum, v'eti sei iv'i nkan Atua, pavtau an Atua.” 22Laha, naran hir avrn v'nen lera, avtah ani, kavlni kavrahau.
Arsatiusi avrur ti m'ertu ipathal ml arna m'ien v'aha ihei
(Mak 12:18-27; Luk 12:27-40)
23 #
Parei 23:8. Arna napn lera uam, arsatiusi la avvr ti m'ertu ikathal ml arna m'ien ha, avrama asnn kavmiman ani kavvr ti a, 24#TVH 25:5.“Tisa, a Musis ivr ti a, ‘Ipavr ti dui kinkin ipam'a, v'eti a natn ihei, tv'aln ipauei a naun pr, a ti a net tv'aln lahara ipaiak.’ 25Asnm'em, artiamk avsaru, titiamu iul tav'etan, sarei, kadam'a, v'eti a natn ihei, dav'a, tv'aln iuei. 26Dav'a itu hin inap'i lera ml asn tv'aln, sarei, tv'aln ml, dav'a ier asn titiatah dau. 27Sarei, tav'et lera im'a. 28?Sena si lera, naran apavthal ml arna m'ien, tav'et lera ipav'i a naun ak, la dui avsaru avuei hara?”
29A Iesu ivrpranr kavr ti a, “Kam'i v'ahienam'i iaviviln, sena ti kaavrndu Paivul, v'aha nut huan Atua. 30Sena ti naran m'ertu apavthal arna m'ien, akavul tav'et v'aha akavtlen tav'et ml, sena ti apavnap'ar enselan Atua arna nut eia. 31?V'eti arna p'kl ti m'ertu ipathal ml arna m'ien, kam'i kaavv'ana arna Paivul a nut Atua ivr a kam'i kavr ti a, 32#Avruh 3:6.‘Kana nv'i Atuan a Epraham, Atuan Aisak, kav'i Atuan a Sikup’? Atua iav'i Atuar m'ertu avram'a, v'eti iv'i Atuar m'ertu avsilv'.” 33Naran nelnal avrn v'nen lera, avtah a sei iv'iv'en anr istudau.
?V'nen hua v'ata ilil kasiv' v'nen hua udlani?
(Mak 12:28-34; Luk 10:25-28)
34V'eti naran arvarisi avrn ti a Iesu iani ti arsatiusi ahavvr si kinkin ml, hir avp'lt a nut iamk. 35Sarei, nki iamk asnr, iv'i dui na v'nen hua, imiman v'nen hapr iamk ani sena ti ipandinei, kavr ti a, 36“?Tisa, v'nen hua v'ata ilil kasiv' v'nen hua udlani?”
37 #
TVH 6:5. A Iesu ivr ani, kavr ti a, “‘Palap'as an a Mlin Eia, iv'i Atuam, arna nlm udlani, silv'ienam udlani, m'a v'ahienam udlani.’ 38V'nen hua lera itauamu kalil arna v'nen hua udlani. 39#Livai 19:18.Tv'aln ilil kanap'ei, kavr ti a, ‘Palap'as a tv'alm inep'a ti iv'ih.’ 40#Luk 10:25-28.V'nen hua lera iru ra arv'i pla v'nen hua udlani karv'i pla v'nenar pruvet udlani.”
?A Kristu iv'i a Natn ak?
(Mak 12:35-37; Luk 20:41-44)
41A Iesu imiman v'nen hapr anr arvarisi la avp'lt ha, kavr ti a, 42“?Kam'i kvv'ah ti a Kristu iv'i a Natn ak?” Avvrprani kavvr ti a, “Iv'i a Natn a Divt.” 43A Iesu ivr anr ml kavr ti a, “?V'eti inap'i hin M'im'iln P'as iani ti a Divt ivr ti a Kristu iv'i Mlin, kavr ti a, 44#Npin 110:1.‘A Mlin Eia ivr an a Mlinak, kavr ti a, “Nakm palak arna m'ldauk dav'a Kana p'ani ti m'ertu avlep'lah apavlak a nv'm, inep'a ti avv'i napl na tlm.” ’?
45V'eti ipavr ti a Divt ivr ti iv'i Mlinan, iv'i a Natn inap'i?” 46Laha, m'ertu kinkin ihei irndu ti ipavrpren si kinkin ani. Itudina hin arna napn lera m'ertu udlani avmamih a ti apavmiman si kinkin ani ml.
Currently Selected:
Matiu 22: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia