Matiu 2
2
Ardu avrndu p'kl msi avandan arna Is
1A Iesu iak arna nut a P'etliem iter a Sutia, naran a Erut iv'i mlin lil, laha, pavrni, dui kinkin avrndu p'kl msi avandan arna Is kavier a Serusalem. 2Kavmimani kavvr ti a, “?Mardel iak a ti ipav'i mlin lilar m'ertu a Isrel ilak ip'i? Sena ti nvla msi nen arna Is kavrama a ti p'vpatei.”
3Naran a mlin a Erut m'er m'ertu udlani a Serusalem avrn v'nen lera, avrn istu sanan. 4Sarei, a Erut itep'a v'nen a ti pris lilil udlani m'er artisa na v'nen hua apavrama kavp'lt asnn, laha, imiman anr kavr ti a, “?A Kristu ipaiak ip'i?”
5Avvrprani kavvr ti a, “Ipaiak a P'etliem a Sutia, sena ti pruvet itulul sarei ani, kavr ti a, 6#Maika 5:2.‘Nakm, P'etliem, arna nut a Sutia, nakm kaasusupa aranar mlin lilil a Sutia, sena ti Mlin Lil ipamk ipandan asnm, kap'aur m'ertuak a Isrel.’ ”
7Laha, a Erut iv'ara anr ardu lahara avrndu p'kl msi, a ti hin uaki ipav'ana m'er, kamiman mamh anr naran msi lera imadinei itauamu. 8Sarei, itap'er a ti apavrav'a a P'etliem kavr ti a, “Pavrav'a kavtala mamh nut mardel pa ilak. Naran pavpaslei, pavtep'a v'nen ipama asnk a ti kana p'av'a kapatei ml.”
9Naran avrn v'nen a mlin lil, avv'el. Laha, pavrni, msi atvla sarei arna Is iv'el katauamu anr dav'a dav'a kaier nut mardel pa ilak, kap'tir eia nen. 10Naran avla msi lera, avrn ip'as istudau. 11Avrav'a eim al nmah lera, laha, kavla mardel pa m'ei a Meri, iv'i a unian, kavsisihpu asnn kavpatei, sarei aviela natenar kavtuvn a sei ani, iv'i kul, m'a sida p'as avali al nmah tamat nakl, iv'i vrankinsens, m'a ueil m'in ip'as, iv'i mir.
12Naran avm'atr, avla ti Atua iv'iv'en anr a ti amavm'alet ml asn a Erut, sarei, avsapa navanel uraur kavrahau a utar.
A Susev' m'ei a Meri arruh karv'a a Itsip
13Naran atvruh sarei, pavrni, a Susev' im'atr kala ti enselan a Mlin Eia ima asnn kavr ti a, “Pathal kalev' mardel pa m'ei a unian kavruh kavrav'a a Itsip kavlak atlera ipaier naran p'etep'a v'nen asnm sena ti a Erut ipatala ani a ti iparpep'ni.”
14Laha, ithal kalev' mardel pa m'ei a unian lihat nen, kavruh kavrav'a a Itsip. 15#Usia 11:1.Kavlak atlera dav'a ier naran a Erut im'a. Laha, v'nen a Mlin Eia itvrp'ep'a sarei arna pn dui na v'nenan, ima katu hin, ivr ti a, “Kana nv'ara an a Natk dan a Itsip.”
Arpep'n mardel papa
16Naran a Erut ila ti ardu na msi avhap'il m'ei, nln irer istudau, katep'a m'rnur a ti apavrp udlen mardel dui a P'etliem m'a nut udlani itertalu ani, paiar iru v'aha idahei, sena ti itmiman mamh sera naran nen asnr dui avrndu p'kl msi lahara. 17Arna naran lera, v'nen la a Seramaia, iv'i pruvet, itvr sarei ha, ima katu hin, ivr ti a, 18#Seremaia 31:15.“Arn drl m'ertu a Rama avrn istu kavvalau kavtakal istudau. A Retsel itakal sanar a natn. Iarn ti m'ertu kinkin ipav'ana mamh m'ei, sena ti a natn ihei ml.”
A Susev' m'ei a Meri arln nut a Itsip karv'a a Nasaret
19V'eti naran a Erut itam'a sarei, pavrni, arna nut a Itsip, a Susev' im'atr kala ti enselan a Mlin Eia ima asnn kavr ti a, 20“Pathal kalev' Mardel pa m'ei a unian, kavrav'a ml arna nut a Isrel, sena ti m'ertu udlani la avrn ti apavrp Mardel pa ra atvram'a sarei.” 21Sarei, ithal kalev' mardel pa m'ei a unian kavrahau arna nut a Isrel.
22V'eti naran irn ti Akileias iv'i mlin lil a Sutia kaua m'lnen a tetian, iv'i a Erut, a Susev' idedrn a ti ipav'a atlera. Naran im'atr, ila ti Atua iv'ana m'ei, laha, iruh kadav'a arna nut a Kalili. 23#Mak 1:24; Luk 2:39; Sun 1:45.Kadav'a kalak arna v'anu iamk iv'i Nasaret, a ti sei pruvet atvvrp'ep'a sarei, ipama katu hin, ivr ti a, “Apavr ti iv'i dui a Nasaret.”
Currently Selected:
Matiu 2: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia