Matiu 16
16
Arvarisi m'er arsatiusi avmiman pari lil kinkin
(Mak 8:11-13; Luk 12:54-56)
1 #
Mat 12:38; Luk 11:16. Laha, arvarisi m'er arsatiusi avrama kavandinei a Iesu kavrn ti ipan pari lil kinkin ipadan eia kav'iv'en nut huan. 2Ivrpranr kavr ti a, “Naran itv'i sera knarev' dau, kvvr ti a, ‘Nut ipap'as, sena ti p'knaran im'iel.’ 3V'aha arna m'etav'aran kvvr ti a, ‘Dika nut ipastu, sena ti p'knaran im'ielm't kamima a nadep'.’ U, kam'i kvp'ip'en lamuru, sena ti kvrndu mamh sei p'knaran iv'iv'ani, v'eti kaavrndu sei naran laha iv'iv'ani. 4#Mat 12:39; Luk 11:29.Kam'i kvsilv' hilaha kvstu kavv'nah tav'et v'aha dui, kavtala pari lil ipav'iv'en nut huak, v'eti nkav'iv'en pari lil kinkin a kam'i, v'eti pari lilan a Suna uaki, iv'i pruvet.” Sarei, ilnr karuh.
Si stuar Varisi m'er Satiusi inep'a p'kl iis
(Mak 8:14-21)
5Naran arm'ertuan avrav'a a tv'eliel atvvnapn sarei a ti apavua p'ret. 6#Luk 12:1.Laha, a Iesu ivr anr kavr ti a, “Pavv'ahur kam'i sena iisar Varisi m'er Satiusi.”
7V'eti avvrvr a hir kavvr ti a, “Iv'i sena ti navua p'ret kinkin.”
8V'eti a Iesu irndaui kavr anr kavr ti a, “U, kam'i v'ahien p'asam'i isusupadau. ?Inap'i hin kvvrvr a kam'i a ti kaavua p'ret? 9#Mat 14:17-21.?Inap'i hin kdavrndu sei? ?Kaavv'ahur p'ret ilm' lahara ntau anr dui avv'i tausen ilm' (5,000)? ?Kvnen naten iv'a ilini a tk p'ret? 10#Mat 15:34-38.?V'aha p'ret isaru ntau anr dui avv'i tausen iv'a (4,000)? ?Kvnen naten iv'a ilini a tk p'ret? 11?Inap'i hin kaavrndu ti navrur p'ret a kam'i, naran nvr ti pavv'ahur kam'i sena iisar Varisi m'er Satiusi?” 12Laha, avrndu ti iavr ti apavv'ah hir sena iis na p'ret, v'eti sena v'iv'enienar Varisi m'er Satiusi.
A P'ita ivrp'ep'a ti a Iesu iv'i Kristu
(Mak 8:27-30)
13Naran a Iesu ier pna v'anu a Sisaria Vilipai imiman anr m'ertuan kavr ti a, “?M'ertu avvr ti Kana, nv'i Net M'ertu, nv'i ak?”
14 #
Mat 14:1,2; Mak 6:14,15; Luk 9:7,8. Avvr ti a, “Hir kinkin avvr ti kv'i a Sun Paptais, hir kinkin ml avvr ti kv'i a Ilaitsa, hir kinkin uraur a Seremaia, v'aha pruvet iamk.”
15Hin ivr anr kavr ti a, “?V'eti kam'i kvvr ti nv'i ak?”
16 #
Sun 6:68,69. Laha, a Saimun P'ita ivrprani, kavr ti a, “Nakm kv'i a Kristu, a Natn Atua la isilv' ha.”
17A Iesu ivrprani, kavr ti a, “Nakm parn ipap'as, Saimun, kv'i a natn a Suna, sena ti iav'i m'ertu, p'akn m'a din iak, iv'iv'en si lera anh, v'eti a Tetiak ilak eia. 18Nvr anh ml, nakm kv'i a P'ita, laha, arna nav'et lera Kana p'ehl sasak, laha, nut hua na nep'v'en ikasiv' sas lera. 19#Mat 18:18; Sun 20:23.Laha, Kana p'etu kii na v'anu eia anh. Si udlani nakm pavrkari arna nadep' apavrkari arna nut eia, v'aha si udlani nakm pam'ahu ani arna nadep', apam'ahu ani arna nut eia.”
20Sarei, itu v'nen anr arm'ertuan a ti amavvr anr m'ertu kinkin a ti hin a Iesu iv'i a Kristu.
A Iesu ivr ti ipam'a kathal ml
(Mak 8:31-33; Luk 9:22)
21Arna naran lera, a Iesu ivrp'ep'adinei anr m'ertuan a ti ikav'a pr a Serusalem a ti arelta, m'er pris lilil, m'er tisa na v'nen hua, apavutakm ani ipastudau, kavrpep'ni, sarei ti arna nitla napn ipathal ml arna m'ien.
22Laha, a P'ita ilev'lei asnr kav'ana hua dinei m'ei kavr ti a, “Mlin, ikahei, si lera imaiarh.”
23V'eti a Iesu ivav Hin kavr an a P'ita kavr ti a, “Paruh asnk, Sitan, nakm ktukar alak. Sena ti kaav'ahur sian Atua, v'eti kv'ahur sia m'ertu uaki.”
Paua su lamu nam kasapei a Iesu
(Mak 8:34-38; Luk 9:23-27)
24 #
Mat 10:38; Luk 14:27. Sarei, a Iesu ivr anr arm'ertuan kavr ti a, “Ipavr ti m'ertu kinkin irn ti ipasapa Kana, ikav'ahur hin. Ikua su lamu nen pr kasapa Kana. 25#Mat 10:39; Luk 17:33; Sun 12:25.Sena ti m'ertu irn ti ipauada silv'ienan, hin silv'ienan ipamln, v'eti m'ertu silv'ienan ipamln sanak, hin ipapaslei. 26?Sena ti m'ertu ipalev' v'ata, ipavr ti ipalev' nadep' udlani v'eti silv'ienan ipamln? V'aha m'ertu ipul silv'ienan arna v'ata? 27#Mat 25:31; Npin 62:12; Rum 2:6.Sena ti Kana, nv'i Net M'ertu, p'ama arna si p'sp'asan a Tetiak m'er enselak. Arna naran lera p'ul m'ertu udlani ipaviviln a pariar.
28Nvrdaui, nvr a kam'i, m'ertu kinkin avp'tir atlaha hilaha akavram'a ipaier naran apavla ti Kana, nv'i Net M'ertu p'ama arna v'anuak.”
Currently Selected:
Matiu 16: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia