Livai 8
8
Arpris
(Avruh 29:1-37)
1Laha, a Mlin Eia iv'ana m'ei a Musis, kavr ti a, 2“Palev' a Erun, m'er a natn, m'er klusar, m'a ueil la avisani a pt m'ertu ien parei ha, m'a pluk sena uvrin sena si stu, m'er pua na sivsiv aparru, m'a naten na p'ret iis nen ihei. 3Sarei, pani ti arm'ertu udlani apavp'lt a karliu na nmah kanuis na tamatan Atua.” 4Laha, a Musis ien sei a Mlin Eia itvr sarei ani ti ipani. Laha, arm'ertu udlani avp'lt a karliu na nmah kanuis na tamatan Atua. 5Sarei, a Musis ivr anr m'ertu udlani, kavr ti a, “Si laha iv'i sei a Mlin Eia iv'ana hua kavr ti apani.”
Avtukarr m'ertu a ti apavv'i nkan Atua
6Sarei, a Musis ilev' a Erun m'er a natn, kasilar m'a nauei. 7Sarei, itu sat aranan a Erun, kahuda lihan m'a nahau p'as iv'i sitrav, katu klus p'arei aranan, katu sat nahan iv'i ivut aranan. Sarei, ihuda sitrav aani a kalik p'as la ip'lt m'a ivut lera. Inap'i lera, ihuda ivut arna p'akn. 8Sarei, itu sat na v'nen hua aranan, katu nav'et papa arru, la nahar arv'i Urim m'a Tamim ha al sat na v'nen hua. 9Sarei, itu manau arna ptn. Sarei, arna manau lera, arna nahn, itu si iamk aani a kul, iv'i manu p'as, inep'a nut a Mlin Eia itvr sarei an a Musis inap'ei.
10Sarei, a Musis ilev' ueil la avisani a pt m'ertu ien parei ha, kavisani arna nmah kanuis na tamatan Atua, m'a si udlani iter a nln. Inap'i lera, imhmah anr. 11Ivisen pnen arna tiv' na sakrivais iv'asaru. Inap'i lera, ivisen ueil arna tiv' na sakrivais, m'a sei auadei kam'akar m'ei, m'a dis lil, m'a tln (la dis lil ip'tir aranan ha), a ti ipamhmah anr. 12Sarei, ivisen pna ueil, la avisani arna pt m'ertu ien parei ha, arna ptn a Erun, a ti ipamhmah ani. 13Sarei, a Musis ilav'r a natn a Erun, katu sat aranar, kahuda lihar m'a nahau p'as iv'i sitrav, katu manau aranar, inep'a nut a Mlin Eia itvr sarei an a Musis a ti ipani ipanap'ei.
14Sarei, iuirv'a pluk a ti ipav'i uvrin sena si stu. Sarei, a Erun m'er a natn avtu lm'ar arna pt pluk, iv'i uvrin sena si stu. 15Sarei, a Musis itrp'ni. Sarei kalev' din, katu pnen arna nirh lm'an, kataui arna tiv' na sakrivais arna kuman. Inap'i lera, imhmah a tiv' na sakrivais. Sarei, ihsran din arna nut auei na tiv' na sakrivais, kamhmah ani, a ti nut ipalak arna tamat m'ei Atua. 16Sarei, ilev'la kris la iter arna enn ha, m'a kris pa iuada rnen, m'er nev'et lip nen arru (m'a kris nar), katu nap' ani arna tiv' na sakrivais. 17V'eti duana pluk, m'a nila p'akn, m'a p'akn, m'a enn, itu nap' ani arna nut av'aran na nut avhl nmah kanuis, inep'a nut a Mlin Eia itvr sarei an a Musis a ti ipani ipanap'ei.
18Sarei, iuirv'a pua na sivsiv, a ti ipav'i uvrin aali. Sarei, a Erun m'er a natn avtu lm'ar arna pt pua na sivsiv. 19Sarei, a Musis itrp'ni. Sarei, ilev' din, kataui arna tiv' na sakrivais. 20Sarei, a Musis itrpapr pua na sivsiv, katu nap' a ptn, m'a pnen nakl, m'a kris nen. 21Sarei, isila enn m'a tln al nauei. Sarei, a Musis itu nap' a p'ak pua na sivsiv udlani arna tiv' na sakrivais. Iv'i sakrivais aali, kav'i sei m'in ip'eset, iv'i uvrin aali asn a Mlin Eia, inep'a nut a Mlin Eia itvr sarei an a Musis inap'ei.
22Sarei, iuirv'a tv'el pua na sivsiv, a ti ipav'i sei itukarr m'ertu a ti apavv'i nkan Atua. Sarei, a Erun m'er a natn avtu lm'ar arna pt pua na sivsiv lera. 23Sarei, a Musis itrp'ni. Sarei, ilev' pna din kinkin, kataui arna nut eia na m'ldu drlnan a Erun, kataui arna prh lil na lm'an arna m'ldaun, kataui arna prh lil na tln arna m'ldaun. 24Sarei ml, ilav'r a natn a Erun. Sarei, a Musis ilev' pna di si slm kinkin, kataui arna nut eia na m'ldu drlnar a Erun, kataui arna prh lil na lm'ar arna m'ldaur, kataui arna prh lil na tlr arna m'ldaur. 25Sarei, ilev'la kris nen, m'a kris na vlin udlani, m'a kris la itukar enn ha, m'a kris pa iter eia na rnen, m'er nev'et lip nen arru, m'a kris nar, m'a m'ldu lihan. 26Sarei, ilev'la p'ret iamk aani m'a vlaua iis nen ihei, m'a p'ret iamk avisen ueil aranan, m'a p'ret m'em'hv'rev' iamk, al naten na p'ret iis nen ihei. Sarei itaur arna kris na si slm, m'a m'ldu lihan. 27Itu si udlani lera al lm'ar a Erun m'er a natn. Naran iani, iuadar kasran lm'an eia, a ti ipav'i uvrin la asran lm'a natei eia m'ei ha.
28Sarei, a Musis ilev'la si lera al lm'ar, katu nap' anr arna tiv' na sakrivais, arna sakrivais aali. Avv'i uvrin avtukarr m'ertu a ti apavv'i nkan Atua. Iv'i uvrin aali katau an a Mlin Eia. 29Laha, a Musis ilev' mr si slm, kauadei kasran lm'an eia, a ti ipav'i uvrin la asran lm'a natei eia m'ei ha, arna nahn a Mlin Eia. Iv'i pna pua na sivsiv la itukar m'ertu a ti ipav'i nkan Atua ha, kav'i nkan a Musis. Iani inep'a nut a Mlin Eia itvr sarei a ti ipani ipanap'ei. 30Sarei, a Musis ilev' pna ueil la avisani arna pt m'ertu ien parei ha, m'a pna di si slm iter arna tiv' na sakrivais, kavisani aranan a Erun, kavisani arna klusan. Sarei, ivisani aranar a natn, kavisani arna klusar. Inap'i lera, itukar a Erun, m'a klusan, m'er a natn, m'er klusar, a ti apavv'i nkan a Mlin Eia.
31Sarei, a Musis iv'ana m'ei a Erun, m'er a natn, kavr ti a, “Pavtahpa p'ak si slm a karliu na nmah kanuis na tamatan Atua, sarei pavhani atlera m'a p'ret la iter al naten na uvrin itukarr m'ertu a ti apavv'i nkan Atua ha, inep'a nut ntvr sarei, kavr ti a, ‘A Erun m'er a natn apavhani.’ 32Duana p'ak si slm m'a p'ret, pavtu nap' ani. 33Laha, kam'i mkavrav'a av'aran na nmah kanuis na tamatan Atua napn ipasaru, dav'a ti napn a ti ktvv'i nkan Atua ipav'siau. Sena ti Hin ipatukar kam'i napn ipasaru. 34Inep'a nut iani dika, a Mlin Eia itv'ana hua sarei kavr ti pavani, a ti pavlak arna tamat m'ei. 35Sena si lera, pavlak a karliu na nmah kanuis na tamatan Atua, ren m'a lihat, dav'a ti napn isaru ipahiris. Pavp'tir kavan parian a Mlin Eia, a ti kam'i mkavram'a, sena ti a Mlin Eia itv'ana hua sarei m'a kana, ktvr sarei inap'i lera.” 36Laha, a Erun m'er a natn avan si udlani a Mlin Eia itvr sarei, kattu sarei al lm'an a Musis a ti ipani.
Currently Selected:
Livai 8: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
