Livai 7
7
1Sarei ml, v'nen hua laha iv'i v'nen hua ier uvrin sena si stu ier m'ertu uraur. Iv'i si p'as iamk. 2Arna nut atrpep'n uvrin aali, apatrpep'n uvrin sena si stu ier m'ertu uraur. Sarei, apavvisen din arna nut udlani arna tiv' na sakrivais. 3Pris ipalev'la kris nen, m'a kris na vlin udlani, m'a kris la itukar enn ha, kataui ipav'i uvrin. 4Sarei, ipalev'lar nev'et lip nen arru, m'a kris iter arna si lera arna tv'eliel nar, m'a kris pa iter eia na rnen (la iter eia nar nev'et lip nen ha). 5Sarei, pris ipatu nap' anr si lera nakl arna tiv' na sakrivais, ipav'i uvrin aali asn a Mlin Eia. Ipav'i uvrin sena si stu ier m'ertu uraur. 6Ardu udlani asnr arpris apavhani. Apavhani arna nut p'as ipamk. Ipav'i si p'as ipamk. 7Uvrin sena si stu ier m'ertu uraur inep'a sera uvrin sena si stu. V'nen hua iamk iarr arru. A pris, la itaui a ti m'ertu ipalak arna tamat m'ei Atua ha, ipahani.
8Laha, pris la ilev' uvrin aali asn m'ertu kinkin, kataui iv'i uvrin, hin ipalev' nila p'ak uvrin aali lera, la ittu sarei iv'i uvrin ha, a ti ipav'i nkan. 9Sarei, uvrin iv'i uit udlani, la attahpa sarei al nap' ha, m'a nki attahpa sarei al ssv'en m'a lit nen, v'aha ssv'en uraur, tim'ah lera ipav'i nka pris la ittu sarei iv'i uvrin ha. 10V'eti uvrin iv'i uit, naran auhei m'a ueil, v'aha im'am'a uaki, nki lera ipav'i suadar a natn a Erun udlani, nki iamk irndu ti ipalev' suadan, sarei nki uraur irndu ti ipalev' nkan.
Uvrin sena Tamat
11V'nen hua laha ier uvrin sena tamat, iv'i uvrin apatau an a Mlin Eia. 12Ipavr ti m'ertu itaui iv'i uvrin, a ti ipavr si p'as an a Mlin Eia, ipataui naran ien sakrivais a ti ipavr ip'as. Ipatu p'ret papa, auhei m'a ueil, iis nen ihei, v'aha p'ret m'em'hv'rev' avisen ueil aranar, v'eti iis nen ihei, v'aha p'ret auhei m'a vlaua m'a ueil. 13Asnr p'ret lera nakl, ipatu uvrin ipav'i p'ret iis nen iak. Ipatu uvrin sena tamat lera m'a sakrivais iani, a ti ipavr si p'as an a Mlin Eia. 14Sarei, ipalev'la p'ret ki ipamk arna uvrin udlani p'sev' ittu sarei, ipav'i uvrin armani asn a Mlin Eia. Nki lera ipav'i nka pris la ivisen di si slm iv'i uvrin sena tamat ha. 15Laha, apahan p'ak si slm la attu sarei iv'i sakrivais a ti apavr si p'as, kav'i uvrin sena tamat ha, arna napn ipamk uaki, la m'ertu ittu sera uvrin ha. M'ertu ikaln tim'ah lera ipaier m'etav'aran.
16V'eti, ipavr ti sakrivais iv'i sena ti itturan sera si iamk, v'aha iv'i sei irn ti ipataui iv'i uvrin uaki, apahani arna napn itaui ti ipav'i sakrivais, v'eti arndu ti apahan duanan uam. 17V'eti, ipavr ti duana p'ak si slm iv'i sakrivais iter uam arna nitla napn, apatu nap' ani pr. 18Ipavr ti m'ertu ihan p'ak si slm iv'i sakrivais, kav'i uvrin sena tamat, arna nitla napn, akalav'i iv'i uvrin, aau, akaspani asnn. Laha, ipav'i sei apalep'lei asn m'ertu ithan sarei. Mamihien na si stu ipater arna m'ertu ihani.
19Ipavr ti p'ak si slm kinkin ier si iamk istu arna nahn a Mlin Eia, akahani pr. Apatu nap' ani. V'eti, ipavr ti p'ak si slm ip'as uaki, arm'ertu udlani la avp'as ha apavhani. 20V'eti, ipavr ti m'ertu ihan p'ak si slm iv'i sakrivais, kav'i uvrin sena tamat, la iv'i nkan a Mlin Eia ha, v'eti m'ertu nen istu arna nahn a Mlin Eia, apatrla m'ertu lera asnr arm'ertuan. 21Sarei ml, ipavr ti m'ertu ier si kinkin la istu arna nahn a Mlin Eia ha, inep'a ti iv'i sia m'ertu istu arna nahn a Mlin Eia, v'aha si dm istu arna nahn a Mlin Eia, v'aha sei alep'lei iv'i si iamk istu arna nahn a Mlin Eia, sarei, ihan p'ak si slm iv'i sakrivais, kav'i uvrin sena tamat, la iv'i nkan a Mlin Eia ha, apatrla m'ertu lera asnr arm'ertuan.’ ”
22Laha, a Mlin Eia iv'ana m'ei a Musis, kavr ti a, 23“Pav'ana m'er arm'ertu a Isrel, kavr anr, kavr ti a, ‘Mavhan kris na pluk, v'aha sivsiv, v'aha nani. 24Ipavr ti si slm iamk im'a uaki, v'aha si dm iapr p'akn, apalev' kris nen, kan sei m'ei nakl, v'eti mavhani pr. 25Sena ti m'ertu ihan kris na si slm la m'ertu itaui ipav'i uvrin aali asn a Mlin Eia ha, apatrla m'ertu lera asnr arm'ertuan pr. 26#Ap'u 9:4; Livai 17:10-14; 19:26; TVH 12:16,23; 15:23.Sarei ml, mavm'n di si kinkin al nmaham'i, mavm'n di m'anh v'aha di si slm kinkin. 27M'ertu im'n di si kinkin, m'ertu nen apatrlei asnr arm'ertuan pr.’ ”
28Laha, a Mlin Eia iv'ana m'ei a Musis, kavr ti a, 29“Pav'ana m'er arm'ertu a Isrel, kavr anr, kavr ti a, ‘M'ertu iuirv'a sakrivais, la iv'i uvrin sena tamat ha, asn a Mlin Eia, m'ertu nen ipauirv'a uvrin lera asn a Mlin Eia, ipav'i sakrivais kav'i uvrin sena tamat. 30Ipaua uvrin aali al lm'an pr, ipauirv'a asn a Mlin Eia. Ipauirv'a kris nen m'a mrn, a ti iparman mrn lera eia, sena ti iv'i uvrin la asran lm'a natei eia m'ei ha, arna nahn a Mlin Eia. 31Sarei, pris ipatu nap' a kris arna tiv' na sakrivais, v'eti mrn ipav'i nkan a Erun m'er a natn. 32Sarei patu m'ldu lihan a pris, ipav'i uvrin armani. Palav'i asnr sakrivais avv'i uvrin sena tamat. 33Hin ak asnr a natn a Erun itu di si slm iv'i uvrin sena tamat, m'a kris nen, hin ipalev' m'ldu lihan, ipav'i nkan. 34Sena ti mr si slm iv'i uvrin, la asran lm'a natei eia m'ei ha, m'a liha si slm iv'i uvrin armani, Kana nlav'i asnr arm'ertu a Isrel, nlav'i asnr sakrivais avv'i uvrin sena tamat. Aau, ntlev' sarar asnr arm'ertu a Isrel, kattu sarei an a Erun m'er a natn, ipav'i v'nen hua ipamk, ipater ikahiris naran.’ ”
35Si lera iv'i pna si slm, attudedp' sarei kavr ti ip'eset, iv'i nkan a Erun m'er a natn. Avlav'i nakl asnr uvrin aali asn a Mlin Eia, arna napn a Musis itaur a ti apavan parian a Mlin Eia, kav'i pris. 36A Mlin Eia itu v'nen hua laha anr arm'ertu a Isrel, a ti apavtu parei lera anr, arna napn ivisen ueil aranar. Laha, ipav'i v'nen hua ipamk, ipaiarr a natr apavtauatah anr, dav'a ikahiris naran.
37V'nen hua laha iv'i v'nen hua ier uvrin aali, m'a uvrin iv'i uit, m'a uvrin sena si stu, m'a uvrin sena si stu ier m'ertu uraur, m'a sei itukar m'ertu a ti ipav'i nkan Atua, m'a sakrivais iv'i uvrin sena tamat. 38Iv'i v'nen hua a Mlin Eia itau an a Musis arna ptha lil nahan iv'i Sainai, arna napn itu v'nen hua anr arm'ertu a Isrel, a ti apavtu uvrinar an a Mlin Eia arna nut kaka a Sainai.
Currently Selected:
Livai 7: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
