Livai 17
17
V'nen Hua ier Si P'sp'as
1Laha, a Mlin Eia iv'ana m'ei a Musis, kavr ani, kavr ti a, 2“Pav'ana m'ei a Erun, m'er a natn, m'er arm'ertu udlani a Isrel, kavr anr, kavr ti a, ‘Si laha iv'i sei a Mlin Eia ittu sarei. Ivr ti a, 3“Ipavr ti m'ertu kinkin arna nl nam'el a Isrel iparpep'n pluk, v'aha net sivsiv, v'aha nani arna nut ahl nmah kanuis, v'aha arna nut av'aran na nut ahl nmah kanuis, 4v'eti iauirv'a a karliu na nmah kanuis na tamatan Atua, a ti ipatu uvrin ipamk an a Mlin Eia a nah nmah kanuis na tamatan a Mlin Eia, ipamamih sena si stuan, inep'a ti iani ti di si slm irarev'. Iten sera di si slm irarev'. Apatrla dui lera, ikalak ml asnr m'ertuan. 5Sena ti, ipavr ti arm'ertu a Isrel avan sakrivais arna m'lden, apavuirv'a sakrivais lera asn a Mlin Eia, a karliu na nmah kanuis na tamatan Atua, asn pris, katau an a Mlin Eia, ipav'i uvrin sena tamat. 6Laha, pris ipavisen di si slm arna tiv' na sakrivais a karliu na nmah kanuis na tamatan Atua, sarei, katu nap' a kris nen, m'in ipap'eset ipav'a asn a Mlin Eia. 7Arm'ertu akavan sakrivais a m'im'iln stu ml, inep'a nut avani itauamu, kavnep'a sera tav'et na navanel. V'nen laha ipav'i v'nen hua ipamk, ipaiarr a natr apavtauatah anr, ikahiris naran.” ’
8Sarei ml, pavr anr, kavr ti a, ‘Ipavr ti m'ertu kinkin arna nl nam'el a Isrel, v'aha v'anudl kinkin la ilak asnm'i ha, ipatu uvrin aali v'aha sakrivais kinkin, 9v'eti iauirv'a a karliu na nmah kanuis na tamatan Atua, a ti ipatau an a Mlin Eia, apatrla dui lera, ikalak ml asnr m'ertuan.
10 #
Ap'u 9:4; Livai 7:26,27; 19:26; TVH 12:16,23; 15:23. Sarei, ipavr ti m'ertu kinkin arna nl nam'el a Isrel, v'aha v'anudl kinkin la ilak asnm'i ha, im'n nadei, p'elep'la m'ertu lera, sarei p'etrlei, ikalak ml asnr m'ertuan. 11#Isrel 9:22.Sena ti sei isilv' arna nadei. Nttu sarei a kam'i arna tiv' na sakrivais, a ti ipani ti pavlak arna tamat m'a Kana. Iv'i nadei iani ti m'im'ilm'i avlak arna tamat m'a Kana.’ 12Iv'i sena si lera nvr anr arm'ertu a Isrel, kavr ti a, ‘M'ertu kinkin asnm'i, v'aha v'anudl kinkin la ilak asnm'i ha, ikam'n nadei.’
13Ipavr ti m'ertu kinkin arna nl nam'el a Isrel, v'aha v'anudl kinkin la ilak asnm'i ha, iraharah sena si dm v'aha m'anh kinkin, karpep'ni a ti apahani, ipahsran din, sarei, katavkari m'a neiev', 14sena ti iv'i silv'iena si udlani. Si udlani isilv' arna nadei. Iv'i sena si lera, nvr anr arm'ertu a Isrel, kavr ti a, ‘M'ertu kinkin asnm'i, v'aha v'anudl kinkin la ilak asnm'i ha, ikam'n nadei kinkin, sena ti si udlani isilv' arna nadei. M'ertu im'ni apatrlei pr.’ 15Sarei, ipavr ti m'ertu kinkin asnm'i, v'aha v'anudl kinkin, ihan sei im'a uaki, v'aha si dm uraur itiapr sera p'akn, sarei, kahani, m'ertu nen ipasila klusan, kavav al nauei, sarei, ipastu arna nahn a Mlin Eia ipaier lihat. Sarei, ipaviviln ml. 16V'eti, ipavr ti iasila klusan, v'aha iavav, mamihien sena si stuan ipater aranan.”
Currently Selected:
Livai 17: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
