Livai 16
16
Napn a ti apalak arna tamat m'ei Atua
1Laha, a Mlin Eia iv'ana m'ei a Musis, itauatah a naran a natn a Erun arru atarm'a sarei, naran artu nap' uraur iv'i uvrin, arna nahn a Mlin Eia, sarei, karm'a sanan. 2#Isrel 6:19.A Mlin Eia ivr an a Musis, kavr ti a, “Pavr an a Erun, la iv'i tv'alm ha, kavr ti imahv'a al nutet la iter a tv'eliel na kalik p'arei p'as ha, arna nah napl na vtmien (la iter arna pukiset ha), naran hin irni uaki, imahei ti ipam'a. Sena ti Kana p'ev'iv'en Kana al p'knaran tva, la iter eia na napl na vtmien ha. 3#Isrel 9:7.A Erun ipav'a al nutet ipanap'i laha: ipaua di net pluk, ipav'i uvrin sena si stu, m'a di pua na sivsiv, ipav'i uvrin aali. 4Ipaua sat na m'la aani a kalik p'as, m'a trasis aani a kalik p'as. Sarei, ipatu sitrav aani a kalik p'as, m'a manau aani a kalik p'as. Klus lera avv'i si p'sp'as nakl. Sena si lera, ipavav al nauei, sarei, kataur arna p'akn.
5Sarei, ipalev' net nani aparru asnr arm'ertu a Isrel, la avp'lt ha, aparv'i uvrin sena si stu. Sarei, ipalev' pua na sivsiv ipamk asnr, ipav'i uvrin aali. 6A Erun ipatu pluk lera, ipav'i uvrin sena si stu, iv'i sanan prki, a ti hin, m'er arm'ertu al nmahan, apavlak arna tamat m'ei Atua. 7Ipalav'r nani iru lahara, kataur a karliu na nmah kanuis na tamatan Atua, arna nahn a Mlin Eia. 8Sarei, a Erun ipan hlhal sanar nani iru lera. Nki ipamk ipav'i sanan a Mlin Eia, tv'aln ipav'i sena nani, ipav'i nani ipaua si stu. 9Sarei, a Erun ipauirv'a nani, la iten sera hlhal sanan a ti ipav'i nkan a Mlin Eia ha, kataui ipav'i uvrin sena si stu. 10V'eti nani, la iten sera hlhal sanan a ti ipav'i nani ipaua si stu ha, ipatau an a Mlin Eia, v'eti ipasilv' uam. Sarei, ipani ti ipalak arna tamat m'ei Atua, sarei, ipataui arna nut kaka, kalni a ti iparuh, ipav'i nani ipaua si stu.
11Sarei, a Erun ipauirv'a pluk, iv'i uvrin sena si stu, la iv'i uvrin sanan ha, ipani ti hin, m'er arm'ertu al nmahan apavlak arna tamat m'ei Atua. Ipatrp'n pluk lera, ipav'i uvrin sena si stu, sena si stuan prki. 12Sarei, ipalev' dis pa ipamk, ipalini a var nap' dan al nap' iv'en arna tiv' na sakrivais arna nahn a Mlin Eia. Sarei, ipaua sida p'as, la atth sarei dav'a isusupa dau ha, ipalini al lm'an, sarei, kauirv'a a tv'eliel na kalik p'arei p'as. 13Sarei, ipatu sida p'as lera al nap', arna nahn a Mlin Eia, a ti ienap' iendan al sida p'as ipatukar napl na vtmien la iter arna pukiset ha, imahei ti ipam'a. 14Sarei, ipalev' pna di pluk, kavisani m'a nirh lm'an arna napl na vtmien, arna tv'eliel iv'a arna Is. Sarei, ipavisen di pluk m'a nirh lm'an arna nah napl na vtmien, ipani ipav'asaru.
15 #
Isrel 9:12. Sarei, ipatrp'n nani, iv'i uvrin sena si stu, la iv'i sanar arm'ertu ha. Ipauirv'a din a tv'eliel na kalik p'arei p'as, sarei, kani inep'a nut iani inap'ei m'a di pluk. Ipavisani arna napl na vtmien, kavisani arna nah napl na vtmien. 16Ipanap'i lera, ipani ti nutet ipalak arna tamat m'ei a Mlin Eia, sena ti arm'ertu a Isrel avstu arna nahn a Mlin Eia, iv'i sena ti avluvn a v'nen huan, kav'i sena si stuar udlani. Ipani ipanap'i lera sena nmah kanuis na tamatan Atua, la ip'tir asnr ha, a p't nut na sei iani ti avstu arna nahn a Mlin Eia. 17Naran a Erun ipav'a eim al nutet, m'ertu kinkin imalak eim al nmah kanuis na tamatan Atua, dav'a ti ipama ml av'aran, a ti ipani ti hin, m'er arm'ertu al nmahan, m'er arm'ertu udlani a Isrel, apavlak arna tamat m'ei Atua. 18Sarei, ipav'a asn tiv' na sakrivais, la iter arna nahn a Mlin Eia ha. Ipani ti ipalak arna tamat m'ei Atua. Ipalev' pna di pluk, m'a pna di nani, kataui arna tiv' na sakrivais, arna kuman, ipamldani m'ei. 19Sarei, ipavisen pna nadei aranan m'a nirh lm'an, ipani ipav'asaru. Ipanap'i lera, ipani ti ipaviviln arna nahn a Mlin Eia, ipamhmah ani, sena ti istu arna nahn a Mlin Eia, sena si stuar arm'ertu a Isrel.
20Sarei, naran ithiris sarei a ti ipani ti nutet, m'a nmah kanuis na tamatan Atua, m'a tiv' na sakrivais, apavlak arna tamat m'ei Atua, ipalev' nani la isilv' uam ha. 21A Erun ipatu lm'an aparru arna pt nani la isilv' ha, kavrp'ep'a si stuar arm'ertu udlani aranan, kavrp'ep'a nut avluvn a v'nen huan a Mlin Eia, ipaier si stuar udlani. Inap'i lera, ipataur arna pt nani, sarei, ipatap'ei ipav'a arna nut kaka, m'ertu irndu mamh ti ipan pari lera ipav'av'ei kav'el. 22Nani lera iparman si stuar udlani arna p'akn, kadav'a arna nut m'ertu kinkin ialak. Sarei, m'ertu iv'ev'a nani lera ipalni arna nut kaka. 23#Esikiel 44:19.Sarei, a Erun ipav'a al nmah kanuis na tamatan Atua, kalev'la klus aani a kalik p'as, la iuei itauamu naran iv'a al nutet ha. Ipalnr atlera. 24Sarei, ipavav al nauei al nutet, katum'alet a klusan, sarei kadama av'aran. Ipatu uvrin aali, la iv'i nkan ha, m'a uvrin aali sanar arm'ertu. Ipani ti hin m'er arm'ertu apavlak arna tamat m'ei Atua. 25Ipatu nap' a kris na uvrin sena si stu arna tiv' na sakrivais.
26Laha, m'ertu itln sera nani, la iv'i nani iua si stu hara, arna nut kaka, hin ipasila klusan, kavav al nauei. Sarei, ipam'alet ml arna nut avhl nmah kanuis. 27#Isrel 13:11.Sarei, apavlev' pluk, la iv'i uvrin sena si stu ha, m'a nani, la iv'i uvrin sena si stu ha (la a Erun itlev'la sera dir katuirv'a sarei al nutet, a ti ipani ti apavlak arna tamat m'ei Atua ha). Sarei, apavuirv'a p'akr av'aran na nut avhl nmah kanuis. Sarei, apavtu nap' a nila p'akr, m'a p'akr udlani, m'a nsr. 28Sarei, m'ertu ittu nap' sarei anr ipasila klusan, kavav al nauei, sarei, ipam'alet ml arna nut avhl nmah kanuis.
29 #
Livai 23:26-32; Nut Kaka 29:7-11. V'nen laha ipav'i v'nen hua ipamk asnm'i: Arna snal na napn, arna saru na nal, kam'i pavani ti m'im'ilm'i ipalak a nadep'. Mkavan parei kinkin. Si laha ipaier m'ertu iv'i m'ertu na v'anuam'i, sarei kaiarr v'anudl udlani avlak asnm'i. 30Sena ti arna napn lera, pris ipani ti pavlak arna tamat m'ei Atua. Ipani ti pavviviln arna nahn a Mlin Eia, sena si stu udlani kvani arna nahn a Mlin Eia. 31Ipav'i napnet ipamk asnm'i, a ti pavv'ahur mamh sei, kavlak ms uaki. Pavlak a nadep' arna m'im'ilm'i. Ipav'i v'nen hua ipamk ipater ikahiris naran. 32Sarei, pris, la atvisen sera ueil aranan, katmhmah sarei ani a ti ipan parian Atua, kav'i pris, kaua m'lnen a tetian ha, hin ipani ti pavlak arna tamat. Ipaua klus aani a kalik p'as, kaua klus p'sp'as nakl. 33Sarei, ipani ti Nutet na Nutet ipalak arna tamat, kani ti nmah kanuis na tamatan Atua, m'a tiv' na sakrivais aparlak arna tamat, sarei kani ti arpris, m'er arm'ertu udlani, la avp'lt ha, apavlak arna tamat. 34V'nen laha ipav'i v'nen hua ipamk asnm'i, a ti apani ti m'ertu udlani a Isrel apavlak arna tamat, sena si stuar udlani, arna napn ipamk arna pai udlani.” Laha, a Erun iani inep'a nut a Mlin Eia itvr sarei an a Musis a ti ipani ipanap'ei.
Currently Selected:
Livai 16: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
