Livai 15
15
V'nen Hua ier p'ak m'ertu
1Laha, a Mlin Eia iv'ana m'ei a Musis m'ei a Erun, kavr anr, kavr ti a, 2“Pav'ana m'er arm'ertu a Isrel, kavr anr, kavr ti a, ‘Ipavr ti dui kinkin vrh irarev' dan al p'akn, ipastu arna nahn a Mlin Eia. 3Laha, naran vrh irarev' dan al p'akn, ipastu arna nahn a Mlin Eia ipanap'i laha: ipavr ti vrh irarev' dan al p'akn, v'aha iarndu ti ipamhei sena si lera, istu arna nahn a Mlin Eia uam. 4Laha, ipavr ti m'ertu la si lera iani ha ilak arna napl v'aha pias, napl v'aha pias lera ipastu arna nahn a Mlin Eia. 5Ipavr ti m'ertu uraur ier piasan, ipasila klusan, kavav al nauei, sarei ipastu arna nahn a Mlin Eia ipaier lihat.
6Ipavr ti m'ertu ilak arna si kinkin m'ertu la vrh irarev' dan al p'akn ha itlak sarei aranan, m'ertu nen ipasila klusan, kavav al nauei, sarei ipastu arna nahn a Mlin Eia ipaier lihat. 7Ipavr ti m'ertu ier p'ak m'ertu la vrh irarev' dan al p'akn ha, m'ertu nen ipasila klusan, kavav al nauei, sarei ipastu arna nahn a Mlin Eia ipaier lihat. 8Ipavr ti m'ertu la vrh irarev' dan al p'akn ha itup'i arna p'ak m'ertu iviviln arna nahn a Mlin Eia, m'ertu lera ipasila klusan, kavav al nauei, sarei ipastu arna nahn a Mlin Eia ipaier lihat. 9Ipavr ti m'ertu la vrh irarev' dan al p'akn ha ilak arna satel (iv'i napl aani a nila p'ak si slm) arna hus iamk, satel lera ipastu arna nahn a Mlin Eia. 10Ipavr ti m'ertu ier si kinkin itater sarei a nv' p'ak m'ertu la si lera iani ha, m'ertu nen ipastu arna nahn a Mlin Eia ipaier lihat. M'ertu irman si lera kinkin ipasila klusan, kavav al nauei, sarei ipastu arna nahn a Mlin Eia ipaier lihat.
11Ipavr ti m'ertu la vrh irarev' dan al p'akn ha ier p'ak m'ertu uraur, v'eti idasila lm'an al nauei, m'ertu lera ipasila klusan, kavav al nauei, sarei ipastu arna nahn a Mlin Eia ipaier lihat. 12Dis m'a putel aani a vdrei, la iv'i nka m'ertu vrh irarev' dan al p'akn ha, apakapapri pr. Dis m'a putel aani a nai, apasilei al nauei pr. 13Sarei, naran m'ertu la vrh irarev' dan al p'akn ha itp'as ml, ipaspan napn ipasaru, a ti ipaviviln ml. Ipasila klusan, kavav al naui rarev', sarei ipaviviln ml. 14Arna satl na napn, ipalev' navimar aparru, v'aha vntau pa aparru, kadav'a kap'tir arna nahn a Mlin Eia. Ipav'a a karliu na nmah kanuis na tamatan Atua, kataur a pris. 15Sarei, pris ipataur aparv'i uvrin. Nki ipamk ipav'i uvrin sena si stu, tv'aln ipav'i uvrin aali. Ipanap'i lera, pris ipani ti ipalak arna tamat m'ei Atua, arna nahn a Mlin Eia, sena m'etien lera iari. 16Ipavr ti dui ihsran uin, sarei, ipavav kasila p'akn udlani al nauei, ipastu arna nahn a Mlin Eia ipaier lihat. 17Laha, ipavr ti uin lera ier klus kinkin, v'aha nila p'ak si slm kinkin, apasilei m'a nauei, ipastu arna nahn a Mlin Eia ipaier lihat.
18Sarei ml, ipavr ti tav'et im'atr m'a dui, laha, dui ihsran uin, aparvav al nauei, sarei, karstu arna nahn a Mlin Eia ipaier lihat.
19Ipavr ti m'etiena tav'et ien tav'et, laha iv'i nadei, ipalak mamk napn ipasaru. M'ertu ier p'akn ipastu arna nahn a Mlin Eia ipaier lihat. 20Ipavr ti im'atr arna si kinkin naran m'etiena tav'et iani, si lera ipastu arna nahn a Mlin Eia. Sarei, ipavr ti ilak arna si kinkin, si lera ipastu arna nahn a Mlin Eia. 21Ipavr ti m'ertu ier piasan, ipasila klusan, kavav al nauei, sarei, ipastu arna nahn a Mlin Eia ipaier lihat. 22Sarei, ipavr ti m'ertu ier si kinkin ilak aranan, ipasila klusan, kavav al nauei, sarei, ipastu arna nahn a Mlin Eia ipaier lihat.
23Ipavr ti m'ertu ier si kinkin itater sarei arna piasan v'aha arna si kinkin itlak sarei aranan, ipastu arna nahn a Mlin Eia ipaier lihat. 24Ipavr ti dui im'atr asnn, arna navanel kinkin, laha, din iari, dui nen ipastu arna nahn a Mlin Eia napn ipasaru. Pias udlani im'atr aranan ipastu arna nahn a Mlin Eia. 25Ipavr ti m'etiena tav'et ien tav'et napn istudau, naran idav'i napn nen, v'aha, ipavr ti napn iani isiv'r napn iani nakl, napn lera nakl apavnep'a sera naran m'etiena tav'et iani nakl. Ipastu arna nahn a Mlin Eia. 26Ipavr ti im'atr arna pias kinkin naran si lera iani, pias lera ipastu arna nahn a Mlin Eia. Sarei, ipavr ti ilak arna si kinkin, si lera ipastu arna nahn a Mlin Eia, inep'a nut inap'ei naran m'etiena tav'et iani nakl. 27Ipavr ti m'ertu ier si kinkin lera, ipastu arna nahn a Mlin Eia. Ipasila klusan, kavav al nauei, sarei, ipastu arna nahn a Mlin Eia ipaier lihat.
28V'eti, ipavr ti m'etiena tav'et ithiris, ipaspan napn ipasaru. Sarei, ipaviviln ml. 29Arna satl na napn, ipalev' navimar aparru, v'aha vntau pa aparru, kataur a pris, a karliu na nmah kanuis na tamatan Atua. 30Sarei, pris ipataur, aparv'i uvrin. Nki ipamk ipav'i uvrin sena si stu, tv'aln ipav'i uvrin aali. Inap'i lera, pris ipani ti ipalak arna tamat m'ei Atua, arna nahn a Mlin Eia, sena m'etiena tav'et iani. 31Inap'i lera, pani ti arm'ertu a Isrel apavlak au a hir naran avstu arna nahn a Mlin Eia, imahei ti apavram'a sena ti avstu arna nahn a Mlin Eia naran avutakm a nmah kanuis na tamatak la iter asnr ha. 32V'nen lera iv'i v'nen hua ier m'ertu vrh irarev' dan al p'akn, v'aha ihsran uin, sarei, istu arna nahn a Mlin Eia sanan. 33Iv'i v'nen hua ier tav'et ilak uaki, sena ti m'etiena tav'et iani, v'aha vrh irarev' dan al p'akn. Ipavr ti ier dui v'aha tav'et, sena ti dui im'atr m'ei istu arna nahn a Mlin Eia.’ ”
Currently Selected:
Livai 15: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
