Ap'u 42

Tv'aln a Susev' avrav'a a Itsip

1Naran a Sikup irndu ti uit iak arna nut a Itsip, a Sikup ivr anr a natn dui kavr ti a, “?Inap'i hin kvp'ep'a kam'i?” 2#Parei 7:12.Kavr ti a, “Pavrni, ntrn sera v'nen a ti uit iak arna nut a Itsip. Pavrav'a eia atlera kavul ki atlera sanad, a ti p'vsilv', imahei ti p'vram'a.”

3Sarei, tv'aln a Susev' arnal avrav'a eia arna nut a Itsip a ti apavul uit. 4V'eti a Sikup iatap'ei a P'ensamin, iv'i titiatah nan a Susev', m'er tv'aln, sena ti ivr ti a, “Imahei ti der lil kinkin ipaiari.” 5Sarei, a natn a Isrel avrav'a a ti apavul uit naran nelnal avrav'a, sena ti m'em'erien iak arna nut a Kenan.

6Hin a Susev' iv'i mlin lil arna nadep' atlera. Hin iulul a sei anr nelnal arna nadep'. Laha, tv'aln a Susev' avrama kaviaul a nadep' arna nahr asnn. 7Laha, a Susev' ilar tv'aln kaledaur, v'eti iani inep'a ti iv'i v'anudl, kav'ana m'er ihua kavr anr kavr ti a, “?Kvaan ip'i?” Avvr ti a, “Nvaan arna nut a Kenan a ti p'vul tim'ah.”

8Laha, a Susev' iledaur tv'aln v'eti hir ahavledaui. 9#Ap'u 37:5-10.Laha, a Susev' iv'ahur sei ilei ivrurr naran im'atr hara kavr anr kavr ti a, “Kam'i kvv'i m'ertu stu. Kvrama a ti pavp'aus nut kavla nut v'anu iahua inap'ei.”

10Laha, avvr ani kavvr ti a, “Ihei, mlinak, v'eti kam'em' nvv'i m'ertu na m'akarienam kavrama a ti p'vul tim'ah. 11Kam'em' udlani nvv'i a natn dui iamk, navv'i dui na hap'ilien. Nvv'i m'ertu na m'akarienam. Navv'i m'ertu na ti p'vp'aus nut.”

12V'eti hin ivr anr kavr ti a, “Ihei, v'eti kvrama a ti pavla nut v'anu iahua inap'ei.”

13Laha, avvr ani kavvr ti a, “Kam'em' nvv'i m'ertu na m'akarienam kavv'i tiamk kavnal lman iru kavv'i a natn dui iamk arna nut a Kenan. Parni, hilaha titiatah nam'em' ilak m'ei a tetiam'em'. Tv'elm'em' uraur itam'a sarei.”

14Hin a Susev' ivr anr kavr ti a, “Inep'a sera nut nvr a kam'i inap'ei. Kvrama a ti pavp'aus nut. 15Kana p'eledina kam'i arna si laha. Arna nahan a Veru, mkavln nut laha ikier naran titiatah nam'i ipama atlaha. 16Pavtep'a kam'i ki ipamk, ipav'el an a titiatah nam'i, v'eti apauada kam'i pavlak al p'resin, arna ti apavledina v'nenam'i, iviviln v'aha iv'i hap'ilien. Ipavr ti ikahei, arna nahan a Veru, kv'i m'ertu pavp'aus nut uaki.” 17Laha, itaur udlani al p'resin napn itl.

18Sarei, arna nitla napn a Susev' ivr anr kavr ti a, “Ipavr ti pavan si lera pavsilv', sena ti kana ndedrn an Atua. 19Ipavr ti kvv'i dui kaavhap'il, apahuda tv'elm'i kinkin ipamk al p'resin kvlak a nln. V'eti kam'i pavuirv'a tim'ah asnr tv'elm'i avrn nam'er. 20Sarei, pavuirma titiatah nam'i, a ti p'eladina v'nenam'i, a ti mkavram'a.” Laha, avani inap'i lera. 21Sarei, avvrvr a hir, kavvr ti a, “Nvrdaui, nvan si stu a tv'ald, sena ti nvla ti irn istu ihuadau naran imimani ihua a nakd a ti p'vrn istu ani, v'eti navv'rn ani. Sena si lera der laha ier nakd.”

22 # Ap'u 37:21,22. Laha, a Rup'en ivrpranr kavr ti a, “Ntvr sarei a kam'i arna naran lera, kavr ti a, ‘Mavan si stu a malakal lera,’ v'eti kavv'rn a kana. Sena si lera, pavrn, der ier nakd sena din.” 23V'eti ahavrndu ti a Susev' irndu sei avvri, sena ti naran iv'ana m'er dui uraur ivav v'nenan. 24Laha, ivav hin kavalau. Sarei, kam'alet ml asnr kav'ana m'er, kalev'lei a Simiun kahudei arna nahr.

25Sarei, a Susev' itu v'nen a ti apavnen natenar ipalini a uit, kavr ti apavtum'alet nav'etar ml al natenar kavtu tim'ah na navanel anr. Laha, avani inap'i lera. 26Laha, avtu uit nen arna tukiar kavv'el dan atlera. 27V'eti naran hir kinkin iamk iela natenan a ti ipamsnen tukian arna nmaha v'anudl, ila nav'etan arna pn natenan. 28Laha, kavr a tv'aln kavr ti a, “Nav'etak im'alet ml. Pavlei, iter al natenak.” Laha, avrdus nlr ani kavdedrn kavvrvr a hir, kavvr ti a, “?Atua ien v'ata a nakd?”

29Sarei, avrav'a asn a tetiar, iv'i a Sikup arna nut a Kenan, kavvrp'ep'a si udlani itu hin asnr, kavvr ti a, 30“Mlin na v'anu lera iv'ana hua m'a kam'em' kavvr ti nvrama ti p'vp'aus nut arna v'anu lahara. 31V'eti nvvr ani kavvr ti a, ‘Kam'em' nvv'i m'ertu navhap'il. Navv'i m'ertu na ti p'vp'aus nut. 32Nvv'i tiamk nvnal lman iru asn a tetiam'em'. Nki iamk isel, titiatah dauam'em' ml ilak m'ei a tetiam'em' arna nut a Kenan.’ 33Sarei, dui la iv'i mlin lil na nadep' hara ivr a kam'em', kavr ti a, ‘Arna si laha p'erndu ti kam'i kvv'i dui kaavhap'il. Pavln tv'elm'i kinkin ipamk asnk, kavlev' tim'ah sena m'ertu avrn nam'er a utam'i kavuei kavrahau. 34Kavuirmam'alet a titiatah dauam'i asnk. Ipanap'i lera p'erndu ti kaavv'i m'ertu pavp'aus nut kavv'i dui kaavhap'il. Sarei, p'etum'alet a tv'elm'i ml a kam'i, laha ti pavulul ml etka.’ ”

35Laha, naran na ti avhsran si udlani al natenar, pavrni, avla nhap't na nav'etar udlani al natenar p'sev'. Laha, naran hir m'ei a tetiar avla nhap't na nav'et, avdedrn. 36Sarei, a Sikup, iv'i a tetiar ivr anr kavr ti a, “Ktvlev'la sarei a natk asnk. Hin a Susev' ihei ml, hin a Simiun ihei ml, hilaha kvrn ti pavlev'lei a P'ensamin ml. Si lera udlani imlen kana.”

37Sarei, a Rup'en iv'ana m'ei a tetian kavr ti a, “Nakm parpep'n a natk dui arru, ipavr ti nkauirmam'alet a natm ml. Pataui arna lm'ak, laha p'euirhau ml asnm.”

38V'eti ivr ti a, “A natk ikahv'a eia m'ah, sena ti tv'aln itam'a sarei. Hin iamk uaki ilak uam. Imahei der ipaiari arna navanel pavsapei, laha pavani ti kana la nilk ituvuvar sarei ha, p'ern istu kadam'a, laha ti pavtin kana.”

Currently Selected:

Ap'u 42: nmb

Highlight

Copy

Compare