Ap'u 38

A Suta m'ei a Tamar

1Dav'a, arna naran lera a Suta ilnr tv'aln kalak m'a dui Atalam, nahan iv'i a Haira. 2Arna nut lera a Suta ila tav'et iamk, iv'i net dui iamk a Kenan, nahan iv'i a Sua, kaualei kam'atr m'ei. 3Laha, itkar kalev' dui pa iamk. Laha, a Suta itu nahan iv'i a Er. 4Itkar ml aranan kalev' dui pa katu nahan iv'i a Unan. 5Katkar ml aranan kalev' dui pa ml, katu nahan iv'i a Sela. Ilav'i naran avlak arna nut a Hesip.

6Dav'a, a Suta ilev' tav'et iamk ipav'i nkan a Er, iv'i a natn titiamu. Naha tav'et nen iv'i a Tamar. 7V'eti a Er, a natn a Suta titiamu, iv'i dui stu arna nahn a Mlin Eia, laha a Mlin Eia irpep'ni. 8Sarei, a Suta ivr an a Unan, kavr ti a, “Pav'a kaua tav'etan a titiamu nam, katu mardel ani ipav'i nka titiamu nam.” 9V'eti a Unan irndu ti mardel nen ikav'i nkan. Dav'a, naran im'atr m'a tav'etan a titiamu nan, ihsran uin a nadep' uaki, a ti imatu mardel ani ipav'i nkan a titiamu nan. 10V'eti sei iani istu arna nahn a Mlin Eia. Sena si lera a Mlin Eia irpep'ni ml.

11Sarei, a Suta ivr an a v'lian, iv'i a Tamar, kavr ti a, “Nakm palak a utan a tetiam kav'i tvtanu dav'a ti a natk, a Sela, ipalil.” Sena ti ivri arna v'ahienan, kavr ti a, “Imahei ti ipam'a, kanep'a sera tv'aln. Laha, a Tamar iv'a kalak al nmahan a tetian.”

12Dav'a dav'a, a naun a Suta, iv'i a natn a Sua, irhap'ni. Sarei, naran a Suta irn ip'as ml, hir m'ei a Haira, iv'i dui Atalam, arv'a arna nut a Timna, asnr m'ertuan avkas nil sivsiv. 13Laha, avr an a Tamar kavr ti a, “Parn, a einam iv'a arna nut a Timna a ti ipakas nil sivsivan.” 14Laha, ihsla klus na tvtanu kaua klus uraur katnahkar nahn a kalik kadav'a kalak arna nut m'auar, arna navanel iv'a arna nut a Timna, sena ti ila ti a Sela itama katlil, v'eti ahatau ani ipav'i tav'etan. 15Naran a Suta ilei, iv'ah ti iv'i tav'et na navanel uaki, sena ti itnahkar nahn a kalik.

16Sarei, a Suta isapa navanel kavav hin kadav'a asnn arna navanel kavr ti a, “Pam'ahu a ti p'em'atr m'ah” (sena ti iarndu ti iv'i a v'lian). Laha, ivr ti a, “?Patu kana v'ata a ti pam'atr m'a kana?”

17Laha, ivr ti a, “P'etu net nani ipamk anh.” Laha, ivr ti a, “?Parndu ti patu kana si kinkin lei ipav'i turanien, dav'a ti pap'htap'ei?”

18Laha, ivr ti a, “?P'etu v'ata anh ipav'i turanien?” Laha, ivr ti a, “Patu kana rinam m'a neiau nen m'a napilakt kauei al lm'am.” Sarei, itau ani kam'atr m'ei. Laha, hin itkar asnn. 19Sarei, ip'tir kadahau, iatnahkar hin a kalik ml, kadav'a kaua klus na tvtanu ml.

20Sarei, a Suta itep'a m'ertuan iv'i dui Atalam kavr ti ipauirv'a net nani asnn, kalev'm'alet a sei iv'i turanien asn tav'et nen, v'eti iapaslei. 21Sarei, imiman anr ardu arna nut lera kavr ti a, “?Tav'et na navanel la ilak arna nut m'auar arna tv'eliel na navanel ha hini?” V'eti avvr ti a, “Tav'et na navanel ihei arna nut lera.”

22Sarei, ihum'alet asn a Suta kavr ani, kavr ti a, “Napaslei. Ardu arna v'anu avvr ti tav'et na navanel ihei atlera.”

23Sarei, a Suta ivr ti a, “Hin ipaua si lahara uaki ipav'i nkan. Imahei ti p'vmamih. Sena ti parn, ntep'a sera net nani laha, v'eti kaapaslei.”

24Dav'a, naran ihih nal itl iv'siau a si lera, avvr an a Suta kavvr ti a, “A Tamar, iv'i a v'liam, iten sera paria tav'et na navanel katkar sanan.” Laha, a Suta ivr ti a, “Pauirma av'aran, apatu nap' ani ipahapu.”

25Naran atvuirv'a sarei av'aran, itep'a v'nen asn a einan, kavr ti a, “Kana ntkar asn dui la si udlani lera iv'i nkan ha.” Kavri ml kavr ti a, “?Parndu mamahi, rin laha, m'a neiau nen, m'a napilakt, avv'i nkan ak?”

26Laha, a Suta im'ahu a ti avv'i nkan, kavr ti a, “Hin iviviln kasiv' kana. Sena ti natau an a natk iv'i a Sela ani.” Laha, iam'atr m'ei ml.

27Dav'a, naran itv'i ti ipalev' a natn, parni, m'elev'ru arlak al v'atn. 28Laha, naran ilav'r, mardel iamk iah lm'an. Laha, tav'et ip'aur mardel naran iak ilev' tret m'iel kahudei arna lm'an, kavr ti a, “Ki laha iak itauamu.” 29V'eti naran irv'm'alet a lm'an, parni, tv'aln iak. Tav'et nen ivr ti a, “Nakm kvrvr ilahml. Sena si lera apatu naham ipanap'i lera.” Sena si lera atu nahan iv'i a Peres. 30Itauatah tv'aln iak, la iua tret m'iel arna lm'an hara. Laha, atu nahan iv'i a Sera.

Currently Selected:

Ap'u 38: nmb

Highlight

Copy