Ap'u 37

Tv'aln a Susev' avulul ani iv'a asnr ardu a Ismail

1A Sikup ilak arna nadep' la a tetian iv'i v'anudl aranan ha, arna nut a Kenan.

2Ki laha iv'i pla nl nam'elan a Sikup. A Susev', naran paian inal lman isaru, imsnen sivsiv udlani m'er tv'aln. Malakal lera avlak m'er a natn a Pilha, m'er a natn a Silpa, arv'i a hau pan a tetian. Laha, a Susev' ivrp'ep'a si stuar an a tetian.

3Hin a Isrel ilap'as an a Susev' isiv' a natn udlani, sena ti iak naran ittrtarep' dau. Sena si lera ien klusan iamk ip'arei kaklkalan. 4V'eti naran tv'aln avla ti a tetiar ilap'as ani isiv' tv'aln udlani, avlep'lei. Laha, ahavv'ana mamh m'ei ml.

5Laha, a Susev' im'atr kala si kinkin kavr anr tv'aln, kani ti avlep'lei isiv' itauamu. 6Kavr anr kavr ti a, “Pavv'rn a m'etrienak la kana nm'atr kalei ra. 7Pavrni, nakd nvhuda uit al pitvet. Laha, pavrni, nkak ithal kap'tir viln. Sarei, pavrni, nkam'i avp'tirtalu ani kavhphapr asn nkak.”

8Laha, artv'aln avvr ani kavvr ti a, “?Nakm pav'i mlin lil, kav'i mlinam'em'?” Laha, avlep'lei istudau isiv' itauamu, sena sei ilei arna m'etrienan m'a sena v'nenan.

9Sarei, im'atr kala si uraur ml kavr anr tv'aln kavr ti a, “Pavrni, hin laha nm'atr kala si uraur ml. Pavrni, neiel m'a nal m'a msi arnal lman iamk aviaul a nadep' asnk.”

10Ivr anr a tetian m'er tv'aln. Laha, a tetian iv'ana hua m'ei, kavr ti a, “?V'ata la hin km'atr kalei ra? ?Kam'em' m'er a uniam m'er tv'alm kv'ah ti p'vrama kaviaul a nadep' asnm?” 11#Parei 7:9.Laha, tv'aln nlr ipri, v'eti a tetian iv'ahur v'nenan arna v'ahienan.

12Sarei, tv'aln avrav'a a Sekem sena ti apavmsnen sivsivan a tetiar. 13Laha, a Isrel ivr an a Susev' kavr ti a, “?Nsarei tv'alm avmsnen sivsiv arna nut a Sekem, v'aha? Pama, p'etap'ah pav'a asnr.” Laha, hin ivr ani, kavr ti a, “Aau, p'av'a.”

14Sarei, ivr ani, kavr ti a, “Pav'el kap'ep'ar tv'alm, kala ti avlak ip'as, m'er sivsiv avlak ip'as, v'aha ihei, kauirma v'nen asnk ml.” Laha, itap'ei idan a m'ihual a Eprun kadav'a a Sekem.

15Dav'a, naran iv'el mamln arna m'lden, pavrni, dui iamk ipaslei kamiman ani, kavr ti a, “?Nakm ktala v'ata?”

16Laha, ivr ti a, “Kana ntala anr tv'alk. Pavr a kana nut avmsnen sivsiv.”

17Dui nen ivr ti a, “Atvln sera nut laha, sena ti nrn ti avvr ti a, ‘Nakd p'vrav'a arna nut a Tutan.’ ” Laha, a Susev' isapar tv'aln kapaslar arna nut a Tutan.

18Laha, naran hir avlei au, naran idamima asnr, avvrvr a hir kavvr ti apavrpep'ni. 19Sarei, avvrvr a hir kavvr ti a, “Pavlei, dui la im'atr kala sei nakl hara, iv'el kadama. 20Hilaha pavrama, p'vrpep'ni kavsrani al tah p'arei kinkin kavvr ti a, ‘Si dm stu ki iamk ihani.’ Laha, p'vla ti sei ilei naran im'atr ipatu hin, v'aha ikahei.”

21V'eti a Rup'en irn v'nen lera kalev'lei al lm'ar kavr anr kavr ti a, “Imahei a ti p'vrpep'ni.” 22A Rup'en ivr anr kavr ti a, “Iap'as a ti p'vani ti din ipararev', v'eti p'vsrani al tah p'arei lera iter arna nut kaka, imahei ti p'vutakm ani a lm'ad.” Ivr si lera sena ti ipalev'lei arna nut huar kauirv'a asn a tetian ml.

23Dav'a, naran a Susev' itama sarei asnr tv'aln, avhsla klusan ip'arei kaklkalan la iuei hara. 24Sarei, kavuadei kavsrani al tah p'arei. Tah nen itatap sarei, nauei ihei a nln.

25Sarei, avlak a ti apavhan p'ret, kavklau kavlar ardu a Ismail kinkin avrama kavandan a Kiliat. Kam'elar avua ui nai m'in ip'eset, kavua pumat, kavua ueil m'in ip'as, iv'i mir, sena ti apavuirv'a eia arna nut a Itsip. 26Laha, a Suta ivr anr tv'aln kavr ti a, “?P'vlev' v'ata aranan ipavr ti p'vrpep'n tv'ald kavani din ipararev' kavtutuani? 27Pavrama, p'vulul ani ipav'a asnr ardu a Ismail. Imahei ti p'vah lm'ad kavrpi, sena ti iv'i tv'ald kav'i p'akd.” Laha, tv'aln avv'rn a v'nenan. 28#Parei 7:9.Sarei, ardu a Mitian, la avulul a sei nakl hara, atvmima. Laha, tv'aln avrv'lei a Susev' al tah p'arei, kavulul ani iv'a asnr ardu a Ismail. Ulienan iv'i nav'et inelru (20). Sarei, kavuirv'a a Susev' arna nut a Itsip.

29Dav'a, a Rup'en im'alet ml asn tah p'arei. Laha, pavrni, ila ti a Susev' ihei ml al tah p'arei, hin iapr klusan, 30kam'alet ml asnr tv'aln kavr ti a, “Malakal lahara ihei ml. ?V'eti kana p'av'a ip'i hilaha?”

31Laha, avlev' klus p'arian a Susev' kavrp net nani iamk kavhs klusan al din. 32Sarei, kavtep'a klus p'arian iklkalan lahara iv'a asn a tetiar kavvr ti a, “Nvpasla si lera. ?Nsarei iv'i klusan a natm, v'aha?”

33V'eti hin iledaui kavr ti a, “Iv'i nkan a natk. Si dm stu ki iamk ithan sarei. Nvrdaui, ithapapr sarei a Susev'.” 34Sarei, a Sikup iapr klusan kalev' selpak kav'aui arna lihan katakal sanan a natn arna napn inelnal. 35Laha, a natn dui udlani, a natn tav'et udlani, avilaph a ti apavmhmah ani, v'eti hin iarn ti apavmhmah ani, kavr ti a, “P'etakal sanan a natk dav'a karhap'ni apatin kana.” A tetian itakal sanan inap'i lera.

36V'eti ardu a Mitian avulul ani arna nut a Itsip iv'a asn a Putiva, iv'i m'ertuan a Veru kav'i mlinar m'rnuran a Veru.

Currently Selected:

Ap'u 37: nmb

Highlight

Copy