Avruh 8

Tv'el der lil iv'i ti pruk apavstudau

1Laha, a Mlin Eia ivr an a Musis kavr ti a, “Pav'a asn a Veru kavr ani, kavr ti a, ‘A Mlin Eia ivr ti a, “Pam'ahu a ti m'ertuak apavruh a ti apavpata kana. 2V'eti ipavr ti mkam'ahu ti akvruh, laha, p'utakm a v'anuam ipav'i ulul pruk. 3Laha, nauei ipav'i ulul pruk, apavrama al nmaham m'a nut km'atr m'ei arna pasam, al nmahar ardu na pariam, arna m'ertuam, m'ei al navap na p'ret, m'a dis auha p'ret a nln. 4Laha, pruk apavrama aranam m'er m'ertuam m'er arm'ertu na m'akarienam udlani.” ’ ”

5Sarei, a Mlin Eia ivr an a Musis, kavr ti a, “Pavr an a Erun, a ti ipah lm'an kah napilaktan ipalu nauei, m'a nauei la avmhmah ani ha, m'a nauei im'etr m't, katep'a pruk ipama arna v'anu a Itsip.” 6Laha, a Erun iah lm'an ilu nauei a Itsip, laha, pruk avrama kavlinkar nut a Itsip. 7Laha, artiet avan sei inap'i lera arna p'kl tutuahar, kavani ti pruk avrama arna nut a Itsip.

8Sarei, a Veru iv'ara an a Musis m'ei a Erun kavr ti a, “Parmimani ipahua an a Mlin Eia a ti ipalev'la pruk asnk m'er m'ertuak, laha p'em'ahu a m'ertuam a ti apavrav'a kavtu si slm apali asn a Mlin Eia.”

9Laha, a Musis ivr an a Veru, “Nakm uaki pavr naran na ti p'etu tamat sanam m'er arm'ertu na m'akarienam m'er m'ertuam, a ti a Mlin Eia iputakm a pruk asnm m'a nmaham a ti apavlak al nauei uaki.”

10Laha, ivr ti a, “M'ih.” A Musis ivr ti a, “Ipanep'a nut kvri inap'ei, a ti nakm parndu ti m'ertu kinkin ianap'ei a Mlin Eia iv'i Atuam'em'. 11Laha, pruk apavruh asnm, asn nmaham, asn m'ertu na m'akarienam, m'er m'ertuam. Apavlak al nauei uaki.”

12Sarei, a Musis m'ei a Erun arruh asn a Veru. Laha, a Musis iv'ara an a Mlin Eia sena pruk la itap'er avmlen a Veru ha. 13Laha, a Mlin Eia ien sei a Musis ivri. Sarei, pruk udlani avram'a al nmahar, al naml na nmahar m'ei arna v'anu udlani. 14Avtupianr dav'a ti m'in istudau arna v'anu. 15V'eti naran a Veru ila ti der ihiris, hin iani ti nln ima kahua mau, iav'rn a v'nenan a Musis m'ei a Erun, inep'a nut a Mlin Eia itvr sarei inap'ei.

Nitla der lil iv'i ti naht apavstudau arna v'anu

16Laha, a Mlin Eia ivr an a Musis, “Pavr an a Erun, kavr ti a, ‘Pah lm'am kah napilaktam karp neiev' arna nadep', ipama kav'i naht arna nut udlani a Itsip.’ ” 17Laha, arani inap'i lera. Naran a Erun iah lm'an kah napilaktan karp neiev' arna nadep', ima kav'i naht arna p'ak m'ertu m'a si slm udlani. Neiev' udlani ima kav'i naht arna nut udlani a Itsip.

18V'eti naran artiet avandinei arna p'kl tutuahar, sena ti apavan naht, ahavrndu ti apavani. Laha, naht istudau aviak aranar m'ertu m'a si slm udlani. 19#Luk 11:20.Sarei, artiet avvr an a Veru, kavvr ti a, “Si lera iv'i nirh lm'an Atua.” V'eti a Veru nln ima kahua mau, iav'rn anr, inep'a nut a Mlin Eia itvr sarei inap'ei.

Niv'a der lil iv'i ti nalen apavstudau arna v'anu

20Laha, a Mlin Eia ivr an a Musis, “Pathal m'etav'aran nrnren kap'tir arna nahn a Veru, naran ipav'a al nauei kavr ani, kavr ti a, ‘A Mlin Eia ivr si laha, “Pam'ahu a ti arm'ertuak apavrav'a a ti apavpata kana. 21V'eti ipavr ti mkam'ahu a ti m'ertuak apavrav'a, parn, p'etep'a nalen ipanelnal ipastudau ipama aranam m'er arm'ertu na m'akarienam m'er m'ertuam, kavlak al nmaham'i udlani. Nmah udlani a Itsip apavlini a nalen, m'a nadep' la avp'tir aranan ha, ipalini a nalen. 22Arna napn lera p'etukar nut a Kusen, iv'i nut m'ertuak avlak, a ti nalen ikahei atlera, a ti parndu ti kana nv'i Mlin Eia arna p't nut na nadep'. 23Laha, p'etupr m'ertuak m'a m'ertuam. M'ih si lera ipatu hin.” ’ ” 24Laha, a Mlin Eia iani inap'i lera. Nalen istudau iv'a al nmahan a Veru, m'ei al nmahar m'ertu na m'akarienan, m'ei arna nut udlani a Itsip. Nalen udlani lera iutakm a nadep' istudau.

25Sarei, a Veru iv'ara an a Musis m'ei a Erun kavr ti a, “Pavrav'a kavtu si slm apali asn Atuam arna v'anu laha uaki.”

26V'eti a Musis ivr ti a, “Iaviviln a ti kam'em' p'van si lera. Istu a ti p'vtu sei arm'ertu a Itsip avlep'lei an a Mlin Eia, iv'i Atuam'em'. Ipavr ti apavla ti nvtu sei arm'ertu a Itsip avlep'lei an a Mlin Eia, nsarei apavmhrp'n kam'em'. 27Kam'em' p'vrav'a arna nut kaka kavv'el napn ipatl, sena ti p'vtu si slm an a Mlin Eia iv'i Atuam'em', inep'a nut ipavr a kam'em' ipanap'ei.”

28Laha, a Veru ivr ti a, “P'em'ahu a ti kam'i pavrav'a kavtu si slm an a Mlin Eia, iv'i Atuam'i, arna nut kaka, v'eti mkavv'el ikp'arei. Hilaha pavtu tamat sanak.”

29Sarei, a Musis ivr ti a, “Aau, kana p'eruh asnm katu tamat asn a Mlin Eia, a ti m'ih nalen udlani apavln a Veru m'er arm'ertu na m'akarienan m'er arm'ertuan. V'eti a Veru ipav'ah ti imahap'il ml m'a kam'em' kavrkar m'ertuam'em' a ti akavuirv'a si slm asn a Mlin Eia.”

30Laha, a Musis iln a Veru katu tamat m'ei a Mlin Eia. 31Laha, a Mlin Eia ien sei a Musis imiman ani kani ti nalen udlani avln a Veru m'er arm'ertu na m'akarienan m'er arm'ertuan. Nalen iamk ihei ml. 32V'eti arna naran nen a Veru iani ti nln ihua ml. Iam'ahu a ti arm'ertu a Isrel apavruh.

Currently Selected:

Avruh 8: nmb

Highlight

Copy

Compare