Avruh 7

1Sarei, a Mlin Eia ivr an a Musis kavr ti a, “Palei, kana nten sarah ti knap'ei Atua arna nahn a Veru, titiamu nam, iv'i a Erun, ipav'i dui na v'nenam. 2Nakm pavr si udlani p'evr anh. Tv'alm, iv'i a Erun, ipavrp'ep'ei an a Veru a ti ipam'ahu a m'ertu udlani a Isrel apavruh arna v'anuan. 3#Parei 7:36.Laha, Kana p'ani ti nln a Veru ipahua. P'en m'akarien lilak ipav'iv'en sei, m'a pari lilak apavstudau m'ertu apavtah ani, arna nut a Itsip, 4V'eti a Veru ikav'rn a kam'i, a ti kana p'etu lm'ak arna nut a Itsip, kutakm anr ipastudau, kalev'la arm'rnurak avv'i m'ertuak a Isrel, arna nut a Itsip. 5Sarei, ardu a Itsip apavrndu ti kana nv'i a Mlin Eia, naran p'ah lm'ak kamlen nut a Itsip kalev'la arm'ertu a Isrel apavruh asnr.”

6Laha, a Musis m'ei a Erun arani iviviln a nut a Mlin Eia ivr anr inap'ei. 7A Musis paian inelsatl (80), a Erun paian inelsatl pln itl, (83) naran arv'ana m'ei a Veru.

Napilaktan a Erun

(Avruh 4:1-5)

8Laha, a Mlin Eia ivr anr a Musis m'ei a Erun kavr ti a, 9“Naran a Veru ipavr a kam'i kavr ti a, ‘Paran pari lilam'i kinkin,’ nakm pavr an a Erun a ti ipalev' napilaktan kasrani arna nadep' arna nahn a Veru, laha, ipama kav'i nmat.” 10Laha, a Musis m'ei a Erun arv'a asn a Veru karani iviviln a nut a Mlin Eia ivr anr inap'ei. Hin a Erun isran napilaktan arna nahn a Veru m'er arm'ertu lililan, laha ima kav'i nmat.

11V'eti a Veru iv'ara anr m'ertu avlela sei m'er tietan, laha artietar ardu a Itsip avani inap'i lera ml arna p'kl tutuahar. 12Sena ti hir udlani avsran napilaktar arna nadep' avrama kav'i nmat, v'eti napilaktan a Erun idrlm' udlen napilaktar. 13V'eti a Veru nln ima kahua, iarn ti ipav'rn anr, inep'a nut a Mlin Eia ivri inap'ei.

Der lil itauamu iv'i ti nauei im'a kav'i nadei

14Laha, a Mlin Eia ivr an a Musis kavr ti a, “A Veru nln ihua ihuadau, hin iarn ti ipam'ahu a m'ertu udlani a Isrel apavrav'a. 15Pav'a asn a Veru m'etav'aran naran ipav'a a p'ak nauei. Nakm pap'tir asn nauei a ti palei. Napilaktam, nki ima kav'i nmat, pauei al lm'am. 16Kavr ani, kavr ti a, ‘A Mlin Eia, iv'i Atuar m'ertu a Isrel ha, itep'a kana, kavr ti p'evr anh, kavr ti a, “Pam'ahu a m'ertuak udlani apavrav'a, sena ti apavpata Kana arna nut kaka.” V'eti nakm kaav'rn ani ier hilaha. 17#Rev 16:4.Si lera iv'i v'nenan a Mlin Eia, “Arna si lera nakm parndu ti kana nv'i a Mlin Eia. P'elev' napilakt al lm'ak karp naui lil, a ti ipama kavav hin kav'i nadei. 18Laha, tilau al nauei apavram'a, dav'a nauei ipama kadapu. M'ertu udlani a Itsip akavrn ti apavm'ni ml.” ’ ”

19Sarei, a Mlin Eia ivr an a Musis kavr ti a, “Pavr an a Erun, kavr ti a, ‘Palev' napilaktam kah lm'am ipaluvn a nauei udlani a Itsip, arna m'ihual papa, arna nauei ahli, arna nauei im'etr m't, m'a nauei udlani la avtukari a ti ipama kalil mau ha, a ti nauei udlani lera ipama kav'i nadei. Nadei lera ipater arna nut udlani arna nut a Itsip, kadater al plku nai atri kadater al plku nav'et atri.’ ” 20A Musis m'ei a Erun aran si udlani inep'a nut a Mlin Eia ivr anr inap'ei. A Musis iuala napilaktan eia arna nahn a Veru m'er arm'ertu lililan karp naui lil. Laha, nauei udlani ima kav'i nadei. 21Tilau udlani avlak al nauei avram'a, nauei udlani ima kadapu, m'ertu udlani a Itsip akavm'ni ml. Nadei iter arna nut udlani arna nut a Itsip.

22V'eti artiet arna nut a Itsip avandida si udlani lera, arna p'klr tutuah. Laha, nln a Veru ima kahua. Iarn ti ipav'rn anr, inep'a nut a Mlin Eia ivri inap'ei. 23Laha, a Veru ivavp'la hin kadahum'alet al nmahan, iav'ahur si udlani lera. 24Laha, m'ertu udlani arna nut a Itsip avhl tah a p'ak naui lil a ti apavpasla nauei apavm'ni, sena ti akavm'n nauei ml al naui lil. 25Sarei, naran a Mlin Eia irp naui lil, itrah ti napn ipasaru ipav'siau.

Currently Selected:

Avruh 7: nmb

Highlight

Copy

Compare