Avruh 5

A Musis m'ei a Erun arv'a asn a Veru

1Itauatah, a Musis m'ei a Erun arv'a asn a Veru karvr ti a, “A Mlin Eia, Atuan a Isrel, ivr ti a, ‘Pam'ahu a ti m'ertuak apavv'el sena ti apavan tim'ah asnk arna nut kaka.’ ”

2Laha, a Veru ivr ti a, “?A Mlin Eia iv'i a Hin ak, a ti p'ev'rn a drln kam'ahu a ti arm'ertu a Isrel apavv'el? Kana narndu a Mlin Eia lera. Narn ti p'em'ahu anr a ti apavruh.”

3Laha, arvr ti a, “Atuar arm'ertu a Isrel itama sarei asnm'em'. Hilaha pam'ahu a kam'em' a ti p'vv'el napn ipatl, kavrav'a arna nut kaka kavtu si slm avali an a Mlin Eia, iv'i Atuam'em', imahei ti Hin iparpep'n kam'em' a m'etien v'aha tali lil.”

4Laha, a mlin a Itsip ivr anr kavr ti a, “?Musis m'ei a Erun, inap'i hin krlev'lar m'ertu asn pariar? Parm'alet asn pariam'i ml.” 5A Veru ivri ml kavr ti a, “Palei, hilaha m'ertu arna nut laha avnelnal, v'et nakm kani ti np'r istu arna pariar.”

6Arna napn nen, a Veru itu v'nen anr mlin na pari huar m'ertu m'er arm'ertu avp'aurr kavr ti a, 7“Kam'i mavtu nina m'lih anr m'ertu ml inep'a tituei, a ti apavan prikis. Hir uaki apavv'el a ti apavtupien nina m'lih. 8V'eti pavtu v'nen hua anr a ti hir apavan prikis apavnelnal uam kavnep'a nut avani inap'ei tituei. Amavani ti ipav'a a nadep', sena ti np'r istu uaki. Sena si lera avv'ara kavvr ti a, ‘P'vrav'a kavan sakrivais asn Atuad.’ 9Kam'i pavani ti pariar ipalil mau, a ti apavm'akar. Imahei a ti apavv'rn a v'nen iv'i hap'ilien uaki.”

10Laha, armlin na pari huar m'er arm'ertu avp'aurr avrav'a asnr kavvr anr arm'ertu a Isrel, kavvr ti a, “Ki laha iv'i v'nenan a Veru. Ivr ti a, ‘Kana nkatu kam'i nina m'lih ml. 11Kam'i pavrav'a kavlev' nina m'lih arna nut pavpaslei, v'eti pariam'i imahv'a a nadep'.’ ” 12Laha, arm'ertu a Isrel avunanut kavamkma arna nut a Itsip udlani a ti apavtupien nina ipaua m'lna nina m'lih lahara. 13Armlin na pari huar avtp'r nakl a ti apavrakn kavvr ti a, “Kam'i pavan parei avvr a kam'i ipel arna napn udlani ipanep'a naran nina m'lih iak.” 14Laha, armlin na pari huan a Veru avrp m'ertu a Isrel, la avtaui ti apavp'aur parei ha, kavmiman anr kavvr ti a, “?Inap'i hin kvan prikis iaier asn nki itauamu nanv' m'a dika?”

15Sarei, arm'ertu a Isrel avp'aur parei avrav'a kavmiman an a Veru kavvr ti a, “?Inap'i hin kutakm a kam'em' nvv'i m'ertu na m'akarienam inap'i lera? 16Ahavtu nina m'lih anr m'ertu na m'akarienam, v'eti kvr a kam'em' ti p'van prikis. Avrp m'ertu na m'akarienam, v'eti iv'i sena pariam'i uaki.”

17V'eti ivr ti a, “Kam'i np'm'i istu, np'm'i istu. Sena si lera kam'i kvvr ti a, ‘P'vrav'a kavan sakrivais asn a Mlin Eia.’ 18Sena si lera, kam'i pavrav'a arna pariam'i. Akatu nina m'lih a kam'i, v'eti pavan udlen prikis ipanep'a tituei uam.” 19Laha, ardu a Isrel avp'aur parei avla ti der ipaiarr, naran a Veru ivr ti a, “Prikis, la atvr sarei a kam'i a ti pavani hara, imahv'a a nadep' arna napn udlani.”

20Naran avln a Veru avlei a Musis m'ei a Erun arp'tir arna navanel. 21Laha, avvr anr arru, kavvr ti a, “Nvrn ti Atua ipap'a kam'i kav'ana hua m'a kam'i, sena ti karani ti a Veru m'er arm'ertuan avla kam'em' avvrla ti nvrapu uaki.”

A Mlin Eia ivrp'ep'a ti ipalev'lar arm'ertu a Isrel arna der

22Laha, a Musis im'alet ml asn a Mlin Eia kavr ti a, “?Mlin Eia, inap'i hin ktu der ima aranar m'ertuam laha? ?Ktep'a kana sena v'ata? 23Sena ti naran nv'a asn a Veru itauamu kav'ana arna naham ier hilaha, hin itu der anr arm'ertu laha, v'eti nakm kaalev'lar arm'ertu laha ki.”

Currently Selected:

Avruh 5: nmb

Highlight

Copy

Compare