Avruh 4
4
A Musis ien pari lil arna nahn a Veru
1Laha, a Musis ivrprani, kavr ti a, “V'eti, parn, akavv'ah kana v'aha akavv'rn a drlk, sena ti apavvr ti a, ‘A Mlin Eia iav'iv'en Hin anh.’ ”
2Laha, a Mlin Eia ivr ani, kavr ti a, “?Kua v'ata al lm'am?” Ivrprani, kavr ti a, “Napilakt.”
3Laha, a Mlin Eia ivr ani, kavr ti a, “Pasrani a nadep'.” Israni a nadep', laha, ima kav'i nmat. Laha, a Musis idedrn ani karuh asnn. 4Sarei, a Mlin Eia ivr an a Musis, kavr ti a, “Pah lm'am kauala dhn.” Laha, iah lm'an kaualei. Laha, ima kav'i napilakt ml al lm'an. 5A Mlin Eia iv'ana ml, kavr ti a, “A ti hir apavrndu ti a Mlin Eia, la iv'i Atuan a tetiar, kav'i Atuan Aisak, kav'i Atuan a Sikup ha, Hin iv'iv'en Hin anh.”
6A Mlin Eia ivr ani ml kavr ti a, “Patu lm'am arna mrm.” Laha, itu lm'an arna mrn. Sarei, naran ilev'lei, parn, lm'an ilini a lep'ersi katva kanep'a sera snu. 7Sarei, ivr ti a, “Patu lm'am ml arna mrm.” Laha, itu lm'an ml arna mrn kalev'lei ml kala ti ip'as ml kanep'a sera p'akn udlani. 8Laha, a Mlin Eia ivr ani, kavr ti a, “Ipavr ti ahavv'ahah kavv'ah sei pav'iv'en anr ipatauamu, apavv'ah sei pav'iv'en anr ipatauatah. 9Laha, ipavr ti ahavv'ah sei iru la pav'iv'en anr ha, ipavr ti ahavv'rn a drlm, nakm palev' nauei ipadan a naui lil a Nail kahsrani arna nadep'. Sarei, nauei klev'lei arna Nail ipama kav'i nadei arna nadep'.”
10Laha, a Musis ivr an a Mlin Eia kavr ti a, “U, Mlinak, kana nav'i dui na v'nen, tituei ier naran kv'ana m'a m'ertu na m'akarienam, v'eti nv'i dui np'np'n kana, nm'k idv.”
11Laha, a Mlin Eia ivrprani, kavr ti a, “?Ak ien pn m'ertu? ?V'aha ak iani ti m'ertu iv'i napt v'aha kani ti ikarn sei, v'aha kan m'ertu iledu sei, v'aha kan m'ertu iv'i m'etapis? ?Kv'ah ti iav'i Kana, la nv'i a Mlin Eia ha? 12Sena si lera, pav'el. Kana p'elak m'ah kav'i pnm, kav'iv'en anh si udlani pavri.”
13V'eti ivr ti a, “U Mlinak, nmiman anh a ti patep'a m'ertu uraur Nakm krn ti patap'ei.”
14Laha, a Mlin Eia nln irer an a Musis kavr ti a, “Hin a Erun ilak arna nl nam'elan a Livai kav'i tv'alm. Kana nrndu ti hin iv'anadau ip'as. Palei, hin ima a ti ipalah. Laha, naran ipalah, iparn ipap'as arna nln. 15Nakm pav'ana m'ei katu v'nenak al navan. Laha, Kana p'elak m'ah katu v'nenak al navam m'ei al navan, kav'iv'en anh si udlani nakm pani. 16Laha, hin ipav'ana kav'i v'nenam asnr m'ertu, inep'a ti hin ipav'i drlm, laha nakm panap'ei Atua asnn. 17Nakm paua napilakt laha al lm'am kav'iv'en sei aranan.”
A Musis iv'a a Itsip
18Dav'a, a Musis ihau kadav'a asn a Sitru, iv'i a einan, kavr ti a, “Nrn p'emiman anh, pam'ahu a ti p'ahau ml asnr tv'alk avlak a Itsip kala ti avsilv' uam, v'aha ihei.” Laha, a Sitru ivr an a Musis kavr ti a, “Pahau arna tamat.”
19Laha, a Mlin Eia ivr an a Musis arna nut a Mitian kavr ti a, “Pam'alet kadav'a arna nut a Itsip, sena ti m'ertu udlani avrn ti apavrph atvram'a sarei.” 20Sarei, a Musis ilev' a naun m'er a natn dui kataur arna tuki iamk, kaua napilaktan Atua al lm'an, kavv'el kavm'alet ml a Itsip.
21Laha, a Mlin Eia ivr an a Musis kavr ti a, “Naran pav'am'alet ml a Itsip, nakm pav'ahur mamh ti pan pari lilil udlani nttu sarei al lm'am arna nahn a Veru. V'eti Kana p'ani ti nln ipahua, a ti ikam'ahu a m'ertu a Isrel a ti apavruh. 22V'eti nakm pavr an a Veru kavr ti a, ‘A Mlin Eia ivri, kavr ti a, “A Isrel iv'i a natk dui titiamu. 23#Avruh 12:29.Kana nvr anh, pam'ahu an a natk dui iparuh a ti ipan pariak. V'eti ipavr ti mkam'ahu a ti iparuh, palei, Kana p'erpep'n a natm dui titiamu.” ’ ”
24Dav'a, arna navanel, asn nmaha v'anudl, a Mlin Eia ima asn a Musis karn ti iparpep'ni. 25Sarei, a Sipura ilev' nav'et haan iamk katr p'akn a natn dui kan p'au ani, kasran pna p'akn asn tln a naun, kavr ti a, “Nvrdaui, nakm kv'i a nauk na ti di natei ipararev'.” 26Laha, a Mlin Eia ilni. Tav'et ivr an a Musis kavr ti a, “Nakm kv'i a nauk na ti di natei ipararev'.” Ivr si lera sena ti a natn ihau.
27Sarei, a Mlin Eia ivr an a Erun, kavr ti a, “Pav'a arna nut kaka kalei a Musis.” Laha, iv'el kalei arna pthan Atua, sarei kasm pla nahn. 28Laha, a Musis iv'ana m'ei a Erun kavrp'ep'a v'nen udlani a Mlin Eia, la itap'ei ha, ivr ani asnn, m'a pari lilil udlani la ittu sera v'nen ani a ti ipani ha. 29Sarei, a Musis m'ei a Erun arani ti arelta udlani asnr arm'ertu a Isrel avp'lt a nut iamk. 30Laha, a Erun iv'ana m'er kavrp'ep'a si udlani a Mlin Eia ivr an a Musis, sarei kan pari lilil lahara arna nah m'ertu udlani. 31Laha, m'ertu a Isrel avv'ahi. Naran avrn v'nen a ti a Mlin Eia itama sarei asnr m'ertu a Isrel kala derar, hir aviaul, kavpatei Atua.
Currently Selected:
Avruh 4: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia