Avruh 29
29
A Musis itukar a Erun m'er a natn a ti apavv'i nkan Atua
(Livai 8:1-36)
1Laha, pan si laha, a ti patukarr a ti apavv'i nkan Atua, a ti apavpata Kana arna parei na pris. Palev' lvna pluk ipamk, m'a pua na sivsiv aparru, terp'as nar, m'nh nut kinkin imahei aranar, 2m'a p'ret iis nen ihei, m'a p'ret papa iis nar ihei la kvisen ueil aranar ha, m'a p'ret avsusupa dau iis nar ihei la kvisen ueil aranar ha. Panr m'a vlaua na uit uaki. 3Sarei, pataur al naten ipamk, kauirma al naten, m'a pluk m'er pua na sivsiv hara.
4Sarei, pauirma a Erun m'er a natn a karliu na nmah kanuis na tamatan Atua iv'i nkar arm'ertu udlani, kasilar m'a nauei. 5Palev' klus lahara, katu klus p'arei aranan a Erun, m'a sat na m'la, m'a sat iv'i ivut, m'a sat na v'nen hua, m'a nahau p'as iv'i sitrav iamk la iuada ivut lahara. 6Sarei, patu manau lahara arna ptn, katu manu p'as arna manau lera. 7Sarei, palev' ueil la iviviln a ti apavisani arna pt m'ertu ha, kavisani arna ptn. 8Sarei, pauirmar a natn, katu klus p'arei aranar. 9Sarei, pataur nahau p'as avv'i sitrav aranar a Erun m'er a natn, katu manau aranar, a ti apavan parei na pris, ipav'i v'nen hua ipamk ikahiris naran. Inap'i lera, patukarr a Erun m'er a natn, a ti apavv'i nkan Atua.
10Sarei, pauirma pluk ipamk asn nmah kanuis na tamatan Atua, asnr arm'ertu udlani la avp'lt atlera ha. Sarei, a Erun m'er a natn apavtu lm'ar arna pt pluk lera. 11Sarei, patrp'n pluk arna nahn a Mlin Eia, a karliu na nmah kanuis na tamatan Atua asnr arm'ertu udlani. 12Sarei, palev' pna di pluk, kataui m'a nirh lm'am arna sei ktvtu sarei arna tiv' na sakrivais, arna kuman. Sarei, duana di pluk, pahsrani asn nut auei na tiv' lera. 13Sarei, palev' kris la itukar enn ha, m'a kris pa iter eia na rnen, m'er nev'et lip nen arru, m'a kris itukarr, kali arna tiv' na sakrivais. 14V'eti p'ak pluk, m'a nila p'akn, m'a nsn, patu nap' anr av'aran na nut kvhl nmah kanuisam'i. Si lera ipav'i uvrin sena si stu.
15Sarei, palev' pua na sivsiv ipamk. A Erun m'er a natn apavtu lm'ar arna pt pua na sivsiv lera. 16Sarei, patrp'n pua na sivsiv, kalev' din, kavisani arna nut udlani arna tiv' na sakrivais. 17Sarei, patrpapr pua na sivsiv lera, kasila enn, m'a tln, kataur m'a nki kttrpapr sarei, m'a ptn. 18#Evases 5:2; Vilipai 4:18.Sarei, patu pua na sivsiv lera arna tiv'. Maln nut kinkin ipater ml. Iv'i si slm aali katau an a Mlin Eia, kav'i sei m'in ip'eset, kav'i si slm atu nap' ani katau an a Mlin Eia.
19Sarei, palev' tv'el pua na sivsiv. A Erun m'er a natn apavtu lm'ar arna pt pua na sivsiv lera. 20Sarei, patrp'n pua na sivsiv, kalev' pna din kinkin, kataui arna nut eia na m'ldu drlnan a Erun, kataui arna nut eia na m'ldu drlnar a natn a Erun, kataui arna prh lil na lm'ar arna m'ldaun, kataui arna prh lil na tlr arna m'ldaun, sarei kvisen din arna tiv' na sakrivais. 21Sarei, palev' pna di pua na sivsiv la iter arna tiv' na sakrivais ha, kalev' ueil iviviln a ti apavisani arna m'ertu, kavisani aranan a Erun, m'a klusan, kavisani aranan a natn, m'a klusar a natn la avlak m'ei ha. Ipanap'i lera, patukar a Erun a ti ipav'i nkan Atua, hin m'a klusan, m'er a natn, m'a klusar.
22Sarei ml, palev' kris na pua na sivsiv, m'a vlin, kalev' kris la itukar enn ha, m'a kris pa iter eia na rnen, m'a nev'et lip nen arru, m'a kris itukarr, m'a m'ldu lihan, sena ti iv'i pua na sivsiv ipatukar m'ertu a ti ipav'i nkan Atua. 23Sarei ml, palev' p'ret ipamk, m'a p'ret pa ipamk, nki la ktvisen sera ueil aranan ha, m'a p'ret la isusupadau ha, asnr p'ret iis nen ihei lahara kattu sarei al naten hara. P'ret lera iter arna nahn a Mlin Eia. 24Sarei, patu si udlani lera al lm'an a Erun, m'er al lm'ar a natn. Sarei, pauadei eia, kasran lm'am eia m'ei, a ti ipav'i uvrin auei eia kasran lm'a natei m'ei, arna nahn a Mlin Eia. 25Sarei, palev'm'alet a si udlani lera, kali arna tiv' na sakrivais. Ipanap'i lera, ipav'i si slm aali katau an Atua, kav'i sei m'in ip'eset, kav'i si slm atu nap' ani katau an a Mlin Eia.
26Sarei, palev' nih mrna pua na sivsiv la iv'i nki kattu sarei a ti patukar a Erun a ti ipav'i nkan Atua ha, karmani eia, inep'a ti kasran lm'am. Inap'i lera ipav'i uvrin la asran lm'a natei eia m'ei ha katau an Atua. Laha, nih mrn lera ipav'i nkam, a ti pahani. 27Palev' nih mrna pua na sivsiv la kttukar sarei ha, katukari ml, karmani eia kasran lm'am. Sarei, palev' p'ak pua na sivsiv lera a nv' lihan, ipav'i sei armani katau an Atua. Palav'r a ti aparv'i suadan a Erun m'er a natn. 28Ipanap'i lera, ipav'i v'nen hua iamk iendan asnr arm'ertu a Isrel kadav'a asn a Erun m'er a natn, ikahiris naran, sena ti iv'i sei armani katau an Atua. Ipav'i sei armani katau an Atua la arm'ertu a Isrel avlav'i arna si udlani atvtu mamh sarei a ti apavan uvrin kavtau an Atua ha, a ti apavv'i si slm apavali kavtau an Atua sena tamat. Sei armani katau an a Mlin Eia ipanap'i lera.
29Naran a Erun itam'a sarei, klus p'sp'as lera apavv'i nkar a natn. Apavuei naran apavisen ueil aranar, m'a naran apavtukarr a ti apavv'i nkan a Mlin Eia. 30A natn, la ipaua m'lnen arna parei na pris ha, ipaua klus lera napn ipasaru, naran iv'a eim al nmah kanuis na tamatan Atua a ti ipapatei Atua al nutet. 31Sarei, palev' pua na sivsiv la kttukar sarei ha, kavtahpa p'akn al nutet. 32Sarei, a Erun m'er a natn apavhan p'ak pua na sivsiv, m'a p'ret iter al naten, la iter a karliu na nmah kanuis na tamatan Atua ha. 33Apavhan sei iani ti avlak arna tamat m'ei Atua. Ipanap'i lera, apavtukar si lera, kamhmah anr, v'eti v'anudl kinkin ikahan si lera, sena ti avv'i si p'sp'asan Atua. 34Laha, ipavr ti p'ak si slm avali kavtau an Atua v'aha p'ret kinkin la iv'i m'ales ha, patu nap' a duanan lera. M'ertu kinkin imahani, sena ti iv'i si p'asan Atua.
35Pani ipanap'i lera m'ei a Erun m'er a natn, inep'a nut ntvr sarei anh inap'ei. Patukarr a ti apavv'i nkan Atuan napn ipasaru. 36Palev' pluk ipamk arna napn udlani kali sena si stu, a ti pavlak arna tamat m'ei Atua. Pasila mamh tiv' na si slm avali kavtau an Atua, naran kten sarei ti iv'i sei iter arna tamat m'ei Atua. Pavisen ueil aranan, kamhmah ani. 37Napn ipasaru, pani ti tiv' lera ipater arna tamat m'ei Atua. Ipav'i tiv' na sakrivais p'as ipamk. Si udlani ipaier tiv' lera ipav'i si p'as arna nahn Atua.
Si slm avali kavtau an Atua arna napn udlani
(Nut Kaka 28:1-8)
38Si laha nakl apavv'i sei apavrpi kavtau an Atua arna tiv' na sakrivais: net sivsiv iparu, paiar idahmk. Pavrpi kavtau an Atua arna napn udlani, ikahiris naran. 39Net sivsiv ipamk pavrpi kavtau an Atua m'etav'aran. Tv'el net sivsiv pavrpi kavtau an Atua knarev' dau. 40Naran ktvrp sera net sivsiv kavtau an Atua, palev' vlaua ipav'i kilu iparu, m'a ueil p'as ipav'i lita ipamk m'a pnen, m'a naui m'iel ipav'i lita ipamk m'a pnen. Laha, ipav'i uvrin iv'i nauei. 41Tv'el net sivsiv parpi katau an Atua knarev' dau. Patau an Atua m'a vlaua ktlev' sarei a ti patau an Atua, m'a sei kvisani a ti patau an Atua. M'i si lera nakl ipav'i m'i p'as ipamk, ipav'i si ipamk pavali kavtau an a Mlin Eia.
42Si lera ipav'i sei aali katau an Atua, ikahiris naran. A netm'i apavani ipanep'a nut kam'i kvani inap'ei, a karliu na nmah kanuis na tamatan Atua, arna nut arm'ertu avp'lt nakl, arna nahn a Mlin Eia. Kana p'ama asnm kav'ana m'ah atlera nakl. 43Kana p'ama kalak m'er arm'ertu a Isrel atlera. Nmah kanuis na tamatan Atua ipama kap'as sena ti si p'sp'asak iani ti ip'as. 44Ipanap'i lera, p'etukar nmah kanuis na tamatan Atua, nut arm'ertu avp'lt nakl, m'a tiv' na sakrivais, a ti apavv'i nkak. P'etukar a Erun m'er a natn, a ti apavv'i nkak, kavpata Kana arna parei na pris. 45Kana p'elak asnr arm'ertu a Isrel, kav'i Atuar. 46Laha, apavrndu ti Kana nv'i a Mlin Atuar, la ilev'lar arna v'anu a Itsip, a ti p'elak asnr nakl. Kana nv'i a Mlin Atuar.
Currently Selected:
Avruh 29: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
