Avruh 23

Naran apav'ana hua m'er arm'ertu, apani ipap'as

1 # Avruh 20:16; Livai 19:11,12; TVH 5:20. Ipavr ti m'ertu kinkin ihap'il m'ah, matu hap'ilien lera arna m'ertu uraur. Mah lm'am m'er arm'ertu stu a ti pavrp'ep'a sei iaviviln. 2Masapar arm'ertu avnelnal kavp'lt a ti apavan si stu. Mavrp'ep'a sei naran m'ertu avv'lv'al, a ti pasapar m'ertu istudau naran avutakm a v'nen viviln. 3#Livai 19:15.Ipavr ti apav'ana hua, iap'as a ti apav'ah nah m'ertu sian ihei naran iv'lv'al m'a m'ertu uraur.

4 # TVH 22:1-4. Ipavr ti pala ti pluk v'aha tukia m'ertu la ilep'lah ha iln navanel, pav'av'i a ti ipam'alet ml asn m'ertu lera. 5Ipavr ti pala ti pluk v'aha tukia m'ertu la ilep'lah ha irs a nadep' sena ti iua si dv par, aau, mkarn ti pasr lm'an, v'eti pani pr.

6 # Livai 19:15; TVH 16:19. Ipavr ti apav'ana hua, iap'as a ti aputakm a m'ertu sian ihei naran iv'lv'al m'a m'ertu uraur. 7Ipavr ti m'ertu avvrur sei iv'i hap'ilien uaki, nakm mamima asn v'nen lera. Marpep'nr m'ertu ahavan si kinkin istu, v'aha avv'i m'ertu viviln, sena ti Kana nkavr ti m'ertu stu avviviln arna nahk. 8Malev' nav'et a ti pan si stu, sena ti nav'et lera ipani ti m'ertu ptn iak ipama kav'i m'etapis, kani ti v'nena m'ertu viviln ipahapr.

9 # Avruh 22:21; Livai 19:33,34; TVH 24:17,18; 27:19. Mautakm a m'ertu iv'i m'rau, sena ti kam'i kvrndu nl m'ertu iv'i m'rau, sena ti kam'i ktv'i sera m'rau arna v'anu a Itsip.

10 # Livai 25:1-7. Palu sei arna nadep'am kalev' tim'ah arna nadep' lera pai ipalm'sei, 11v'eti arna saru na pai, palni a ti ipalak ms kalak arna tamat, a ti arm'ertu siar ihei apavhan sei. Tim'ah hir avlni, si slm apavhani. Pani ipanap'i lera m'a nadep' alu nahau na krep, m'a nadep' alu uliv aranan. 12#Avruh 20:9-11; 31:15; 34:21; 35:2; Livai 23:3; TVH 5:13,14.Pam'akar napn ipalm'sei kan pariam, v'eti arna saru na napn parnrnh, a ti plukam m'a tukiam apavlak ms, akavan parei. A natn dui na tav'et na m'akarienam m'a m'rau apavlak ms kavrn ipap'as.

13Naran kv'ahur si udlani ntvr sarei anh, pav'ahur mamahi, mavrur nahar atua uraur, m'ertu kinkin akavv'rn a nahar al pnm.

A Mlin Eia ivr ti apavan tim'ah lil itl arna pai iamk nakl

(Avruh 34:18-26; Tv'el V'nen Hua 16:1-17)

14Arna pai iamk, pan tim'ah lil ipav'atl sanak. 15#Avruh 12:14-20; Livai 23:6-8; Nut Kaka 28:17-25.Pan tim'ah lil ipamk ipav'i Tim'ah Lil na P'ret Iis Nen Ihei. Pahan p'ret iis nen ihei napn ipasaru, inep'a nut ntvr sarei anh, arna napn nttu sarei arna nal nahan iv'i Apip, sena ti arna nal lera kruh arna v'anu a Itsip. Arna napn lera, m'ertu kinkin ikahma la iaua si kinkin ha. 16#Livai 23:15-21; Nut Kaka 28:26-31; Livai 23:39-43.Sarei, pan tim'ah ipav'i Tim'ah Lil na Napn Anar Uit. Pauirma sei kalav'i itauamu la ktlu sarei al pitvet ha. Sarei, pan tim'ah ipav'i Tim'ah Lil na Nmah Tvtv. Pani naran pai iamk itv'siau sarei, naran ktlev' sera tim'ah udlani iv'i nava pariam al pitvet.

17Arna pai iamk, ardu udlani a Isrel apavp'tir ipav'atl arna nahn a Mlin Atua.

18Matu di sei kttu asnk m'a p'ret iis nen ihei. Maln kris na sei kttu sarei asnk ipaier m'etav'aran. 19#TVH 26:2; Avruh 34:26; TVH 14:21.Palev' sei khli itauamu al pitvetam arna v'anuam kauirma al nmahan a Mlin Eia iv'i Atuam. Matahpa net nani m'a m'ilikan a unian.

A Mlin Eia itep'a Enselan a ti ipav'av'ar arm'ertu a Isrel

20Palei, Kana ntep'a Ensel asnm a ti ipamhmah anh arna navanel, kauirv'ah arna nut Kana nttu mamh sarei. 21Pav'ahuri, kan sei ivri. Mahani ti nl reran ipama eia asnm, sena ti Hin ikamhmah anh arna si stuam, sena ti nahak iter a nln. 22V'eti ipavr ti kav'rn a v'nenan, kan si udlani nvrp'ep'ei, Kana p'emlanr arm'ertu avmlanh, kutakm anr arm'ertu avutakm anh. 23Sena ti Enselak ipatauamu anh kauirv'ah a ti palak asnr m'ertu Amur, m'er arm'ertu a Het, m'er arm'ertu a Peris, m'er arm'ertu a Kenan, m'er arm'ertu a Hivai, m'er arm'ertu a Sepus. Kana p'etrpep'nr udlani. 24Maiaul asnr atuar, kapatar. Masapa p'klr, v'eti pakasrr udlani, katrpapr aitular udlani.

25Inap'i lera, papatei a Mlin Eia iv'i Atuam, laha Hin ipamhmah a p'retam m'a nauiam. Kana p'elev'la m'etien arna nahm'i. 26Mertu kinkin ikarn istu sena ti iv'i ptm't v'aha ikalev'us a natn arna nadep'am. Kana p'ani ti napnam ipap'arei.

27Kana p'ani ti arm'ertu udlani pav'a asnr apavdedrn ipastudau, itauamu a ti kan si kinkin, p'ani ti v'ahienar ipadedhar. Arm'ertu avmlen kam'i apavvav hir kavruh asnm. 28P'etep'a uinit apavtauamu anh, hir apavtkr anr ardu a Hivai, ardu a Kenan, m'er ardu a Het, akavlak ml arna nahm. 29V'eti nkatrkr anr arna pai ipamk uaki, imahei ti nadep' ipastu, si dm apavrama kavstudau par, ipani ti ipahua asnm. 30Kana p'ev'el papa uaki, a ti akavlak ml. Ipanap'i lera, naran ktvrama sarei kavstudau, palev' nadep' udlani a ti ipav'i nkam. 31P'etu dariam ipatudina hin arna Nata M'iel kadav'a kaier nata ier utar arm'ertu a Vilistia, katudina hin arna nut kaka kadav'a kaier Nauei (iv'i Iuvretis). Kana p'etaur arm'ertu avlak arna nadep' lera al lm'am, patkr anr dav'a ti akavlak ml asnm. 32Mahan turanien m'er arm'ertu lera. Mahan turanien m'er atuar. 33Hir akavlak arna v'anuam, imahei ti apavani ti pan si stu kamlen Kana. Ipavr ti papatar atuar, ipav'i nam'et ipamk asnm.”

Currently Selected:

Avruh 23: nmb

Highlight

Copy

Compare