Avruh 1
1
Arm'ertu a Isrel avlak arna der arna v'anu a Itsip
1 #
Ap'u 46:8-27. Ki laha avv'i nahar a natn a Isrel la avrav'a asn nut a Itsip ha. Hir udlani m'er nl nam'elar avrama m'ei a Sikup. 2A Rup'en, a Simiun, a Livai, a Suta, 3a Isakar, a Sepulun, a P'ensamin, 4a Tan, a Navtali, a Kat, m'ei Aser. 5Hir udlani avv'i nl nam'elan a Sikup kavier inelsaru (70). A Susev' hin itlak sarei a Itsip. 6Dav'a, a Susev' im'a m'er tv'aln udlani m'er arm'ertu udlani avlak arna naran nen. 7#Parei 7:17.V'eti a natn a Isrel avstudau, dav'a ti a natr avrama kavnelnal istudau kavrama kavhua kavlinkar v'anu nen.
8 #
Parei 7:18. Dav'a, mlin iamk uraur ip'tir kav'i a mlin a Itsip. Hin iarndau a Susev'. 9Laha, hin ivr anr m'ertuan kavr ti a, “Pavlei, arm'ertu a Isrel avstudau kavhua kavsiv' nakd. 10#Parei 7:19.Pavrama, p'vtu navanel nvrndaui, a ti p'vsiv'r aranan, imahei ti apavstudau kavp'lt m'er arm'ertu avlep'la nakd arna naran na naur, kavan naur m'a nakd kavruh arna v'anuad.” 11Sarei, avtu m'ertu kinkin a ti apavv'i mlin na m'ertu na m'akarien a ti apavutakm anr arna parei hua. Laha, avhl v'anu lil na su nauran a Veru, nahar avv'i a Pitum m'ei a Ramsis. 12V'eti naran avani ihua mau m'er, avrama kavlil kavnelnal mau. Laha, avdedrn anr arm'ertu a Isrel. 13Laha, arm'ertu a Itsip avtp' m'ertu a Isrel a ti apavm'akar ipahuadau. 14Kavani ti avrn istu arna silv'ienar sena pari hua, kavtp'r a ti apavan simen, m'a prikis m'a pari ururaur ml nakl al pitvet. Pari udlani avtp'r a ti apavani, avani ti avm'akar ani ihua ihuadau.
15Laha, a mlin a Itsip ivr anr tav'et a Isrel la avp'aurr mardel nakl naran aviak ha, naha tv'aln iv'i a Sivra, tv'aln iv'i a Puah, kavr ti a, 16“Naran pavan pariam'i asnr tav'et a Isrel kavla ti apavlev' sei ipav'i dui, pavkap'ni, v'eti ipavr ti ipav'i tav'et, ipasilv'.” 17V'eti artav'et avp'aurr mardel nakl naran aviak avdedrn an Atua, ahavsapa v'nenan a mlin a Itsip la ivr anr ha, v'eti avlev' mardel dui avsilv'. 18Laha, a mlin a Itsip iv'ara anr tav'et nen kavr anr kavr ti a, “?Inap'i hin ktvan sera si laha kavm'ahu a ti armardel dui apavsilv'?”
19Tav'et lahara avvrpren a Veru kavvr ti a, “Sena ti tav'et a Isrel ahavnep'a sarar tav'et a Itsip, sena ti hir avlev' sei ilahml, itauamu a ti kam'em' nrma asnr.”
20Sena si lera, Atua imhmah anr tav'et arp'aurr mardel nakl naran iak, kani ti m'ertu a Isrel avrama kavstudau kavhua ihuadau. 21Dav'a, sena ti tav'et avp'aur mardel naran iak avv'ah Atua, Hin iani ti nl nam'elar aviak.
22 #
Parei 7:19. Sarei, a Veru ivr anr m'ertuan udlani, kavr ti a, “Pavsranr armardel a Isrel, la aviak ser kavv'i dui ha, al nauei, v'eti pavm'ahu a ti tav'et apavsilv'.”
Currently Selected:
Avruh 1: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia
