Esta 2
2
A Esta ima kav'i a hau lil
1Itauatah a si lera, naran nl reran a mlin Ahasueras itav'a sarei a nadep', iv'ahur a Vasti, m'a sei iten sarei, m'a v'nen hua ittu sarei, la iari ha. 2Laha, arm'ertu na m'akarien, la avmhmah an a mlin ha, avvr ti a, “Nsarei p'vtala vitar kinkin, nahr apavp'as, apavv'i uarav'aran, sarei, p'vuirv'ar asn a mlin. 3A mlin ipataur kavman kinkin arna pruvins udlani arna v'anu, a ti apavlav'r vitar, la avp'eset kavv'i uarav'aran ha, sarei, apavuirv'ar arna v'anu hua lil, iv'i a Susan. Sarei, apavlak al m'lna m'ertu na tav'et. Laha, a Hekai, la iv'i tamav ip'aurr tav'et nakl ha, ipap'aurr. Sarei, apavvav kavandedp' hir. 4Sarei, naran a mlin iparn ip'as a vitar ipamk, vitar lera ipama kav'i a hau lil, ipaua m'lnen a Vasti.” Laha, si lera iani ti a mlin irn ip'as. Sarei, iani inap'i lera.
5Laha, m'ertu a Suta iamk nahan iv'i a Mutekai ilak al v'anu hua lil iv'i a Susan. A Mutakai lera iv'i a natn a Sair, a natn a Simei, a natn a Kis, la iv'i dui a P'ensamin ha. 6#2 Armlin 24:10-16; 2 Krun 36:10.Naran a Nepukatnesa, la iv'i mlin a Papilun ha, itlev'la sarei a Sekunia, la iv'i a mlin a Suta ha, m'er arm'ertu uraur, arna nut a Serusalem, a Kis lera iv'i m'ertu iamk isapar. 7Laha, a Mutekai ip'aur a Hatasa (tv'el nahan iv'i a Esta) naran isusupa. A Esta lera iv'i a natn a p'nian. Ip'auri sena ti a tetian m'ei a unian atarm'a sarei. Laha, vitar lera nahn ip'eset, p'akn ip'eset. Inap'i lera, naran a tetian m'ei a unian atarm'a sarei, a Mutekai ilav'i kap'auri, inep'a ti iv'i a natn tav'et.
8Sarei, naran arm'ertu avrn v'nen huan a mlin, avlav'r vitar istudau, sarei, kavuirv'ar arna v'anu hua lil a Susan. Sarei, a Hekai lahara ip'aurr. Inap'i lera, avlev' a Esta, kavuirv'a al nmahan a mlin. Laha, a Hekai ip'auri, sena ti hin ip'aurr tav'et nakl. 9Sarei, a Hekai irn ip'as a vitar lera (iv'i a Esta), aau, iv'ahuri nakl. Sarei, itu nav'et ani, inep'a nut itu nav'et anr arvitar uraur inap'ei, v'eti itu si uraur ml an a Esta, kani ilahml uaki nakl, a ti ipandedp' hin. Sarei, ilav'r tav'et na m'akarien isaru dan al nmah lilan a mlin, katau ani, a ti apavv'i tav'et na m'akarienan. Sarei, ilev'lei a Esta m'er tav'et na m'akarienan, kataur arna nut p'as na nmahar tav'et. 10V'eti a Esta idavrp'ep'a ti iv'i m'ertu v'ata v'aha nl nam'el v'ata, sena ti a Mutekai itvr sarei ani, a ti ikavrp'ep'a si lera nakl. 11Laha, arna napn udlani, a Mutekai iv'el kadav'a arna nut av'aran na nmahar artav'et, a ti iparndu ti a Esta ilak ip'as, v'aha ihei, sena ti irn ti iparndu ti ien v'ata nakl.
12Laha, avandedp'r vitar udlani p'sev'. Avani pai iamk, kavani inep'a nut avandedp' tav'et nakl. Avtaui ti apavandedp' hir ipanap'i laha: nal ipalm'sei apavtu ueil m'in ip'as, iv'i mir, arna p'akr. Sarei, apavtu pumat aranar, kavan si uraur a ti apavani ti tav'et apavp'as. 13Avani inap'i lera, sarei, vitar udlani p'sev' avrav'a asn a mlin. Sarei, naran nki iamk iv'a asn a mlin, ipavr ti iparn ti ipalev' si kinkin al nmahar artav'et, irndu ti ipauei kadav'a al nmah p'asan a mlin. 14Inap'i lera, tav'et iamk iv'a knarev', sarei, arna m'ih nen, im'alet, v'eti iv'a al tv'el nmahar artav'et, asn a Saskas, iv'i tamavan a mlin iamk, ip'aurr a hau papan a mlin. Inap'i lera, tav'et lera ikahv'a eim asn a mlin ml. V'eti, ipavr ti a mlin irn ip'as ani, kav'ara ani ml, kavrp'ep'a nahan, irndu ti ipam'alet ml.
15Laha, ima kav'i napn a ti a Esta, iv'i a natn Apihail, la iv'i a p'nian a Mutekai, la itlev' sarei a ti ipav'i a natn ha, ipav'a eim asn a mlin. Laha, iamiman si kinkin a ti ipalav'i kauirv'a eim. V'eti iuirv'a sei hin a Hekai, la iv'i tamav ip'aurr tav'et nakl ha, ivr ti ipauei uaki. Inap'i lera, arm'ertu udlani, la avlei a Esta ha, avrn ip'as a ti apavmhmah ani nakl. 16Laha, arna snal na nal, nahan iv'i Tepet, arna saru na pai na ti Ahasueras iv'i mlin, avlev' a Esta. Laha, iv'a eim asn a mlin, al nmah p'asan. 17Laha, a mlin ilap'as an a Esta, isiv'r tav'et uraur udlani. Laha, irn ti ipatu sei ani kamhmah ani, isiv'r uarav'aran udlani. Sena si lera, itu manu na hau lil arna ptn, kani ti ima kav'i a hau lil, iua m'lnen a Vasti. 18Sarei, a mlin ien tim'ah lil iamk, ivr ti iv'i Tim'ah Lilan a Esta. Iani sanar arkavmanan, m'er arm'ertu na m'akarienan. Laha, ivr ti arm'ertu udlani arna pruvins udlani akavan parei arna napn lera. Sarei, itu sei anr arm'ertu nakl, a ti ipav'iv'en ti hin iv'i mlin, kaiak a sei istudau.
A Mutekai ipasla ti arm'ertu kinkin arrn ti aparutakm an a mlin
19Dav'a, aruarav'aran avp'lt a nut iamk ml, iv'i v'aru nen. Naran lera, a Mutekai ilak asn pn liuan a mlin. 20V'eti a Esta idavrp'ep'a ti iv'i m'ertu v'ata v'aha nl nam'el v'ata, inep'a nut a Mutekai itvr sarei ani. A Esta ien si udlani a Mutekai ivr ti ipani, inep'a nut iani naran iv'i mardel inap'ei.
21Arna naran lera, naran a Mutekai ilak asn pn liuan a mlin, a Piktan m'ei a Teres, la arv'i tamavan a mlin karp'aur liu nakl ha, nlr irer istudau. Sarei, ariak a v'ahien iamk a ti aparrp a mlin Ahasueras. 22Laha, a Mutekai irn si lera, sarei, kavrp'ep'ei an a Esta. Sarei, a Esta ivrp'ep'ei an a mlin, v'eti ivri, kavr ti a Mutekai ivri. 23Sarei, naran avmiman anr arm'ertu a ti si lera iv'i si dau, v'aha ihei, avpasla ti a Mutekai ivrdaui uaki. Sarei, avsrp'nr ardu arru lera arna nai iamk. Sarei, avulul ani arna puk iamk ivrur sei itu hin nakl, arna nahn a mlin.
Currently Selected:
Esta 2: nmb
Highlight
Copy
Compare
Share
Want to have your highlights saved across all your devices? Sign up or sign in
© 2023 Presbyterian Reformed Church of Australia