Roma 9
9
Umatino Israel nepilino Lahataꞌala
9:1-18
1So nepugauꞌaoku ini nokotuꞌu; ingka aseꞌise bhe Kristus, miina akopahaa. Totono laloku neatono Rohino Lahataꞌala netanga-tangaꞌaomo dua kakotuꞌuno pugauku. 2⸤ Patudhuku peda aini.⸥ Nokompeaha sepaliꞌa laloku, totono laloku sadhia noguguhu. 3Ahelasimo nakumangkanai kanau balaano narakaa sampe apogaati bhe Kristus so kaetaaꞌano bhahitieꞌi saliwuku ⸤ miendo Yahudi⸥ sesampuꞌano bhe idi. 4Andoa ini umatino Israel, padamo nosangkeda Lahataꞌala mbali anaꞌino, nofotiwohaanda kakalabhiano, padamo nehabu podhandiꞌa bhe andoa, nowaꞌanda tubhono agama, padamo nofohatoda nada amai dasumambahea bhe nowaꞌanda dua sabhaha dhandino. 5Andoa maitu sampuꞌando awuaꞌintoomu, maka weo kamanusiano Kristus nomaiꞌao ne siwulundo. Anoamo Lahataꞌala te wawono bhahi-bhahiꞌae, mantasiꞌano damosibhalae ampa suhue dhamani. Amin. #9:5 Aeati aini nembali dua domaꞌanakie: Anoamo te wawono bhahi-bhahiꞌae. Nopantasi damosibhala Lahataꞌala ampa suhue dhamani. Amin.
6Suano patudhukua kao-kaomo dhandino Lahataꞌala miinamo nakoꞌulaa, ampamo kaowu suano kosasawindo miendo Israel saneamo umati nepilino Lahataꞌala. 7Pedamo dua suano kosasawindo anano Abraham, kotu-kotuꞌu notilentu sampuꞌano Abraham. ⸤ Kapaꞌamo weo Kitabi notibuhi peda aini,⸥ “Ampamo anaꞌino Ishak tilentuno sampuꞌamu.” #Kej 21:12 8Aini nokomaꞌana sampuꞌano Abraham tilentuno anaꞌino Lahataꞌala mpahinomo sampuꞌano maiꞌao ne anaꞌi nepodhandiꞌao, suano anaꞌino lumenteno peda anaꞌi sigaoꞌano. 9Kapaꞌamo dhandino Lahataꞌala peda aini, “Nahumato tempono asumuli toha, maka Sara nakoanaꞌaomo seemie moꞌane.” #Kej 18:10
10Suano kaowu taꞌo anaꞌa. Anaꞌi nefolenteno Ribka doseama, ingka Ishak awuantoomu. 11-12Miinaꞌo dalumentea anaꞌi hoduano maitu, miinaꞌo dua daehabu metaaꞌano bhe modaiꞌano, Lahataꞌala padamo nokobhoasao ne Ribka,
“Titiisa nameompu ne aino.” #Kej 25:23
Katibhoasaoꞌano peda anaꞌa, so nentaleaꞌao putae kapilino Lahataꞌala miina naengkoha ne habundo manusia, tamaka nengkoha ne kapoindalono wutono Lahataꞌala fobhasino. 13Aini noposahataa bhe tibuhino weo Kitabi peda aini,
“Yakub aoasiane, tamaka Esau abansie.” #Mal 1:2-3
14Ane peda anaꞌa, damugauꞌomu dua nada amai? Bhahaa nokomaꞌana Lahataꞌala miina naꞌumadhilia? Ingka miina sepaliꞌa! 15Kapaꞌamo bhoasaono Lahataꞌala ne anabii Musa peda aini,
“Amosampu rahamatiku ne laꞌae maka nepoindaloku,
amotiwoha kabhelano laloku ne laꞌae maka nepiliku.” #Kel 33:19
16Dadiꞌanomo kapilino Lahataꞌala maitu miina naengkoha ne kapoindalo tawa kaꞌuleindo manusia, tamaka taneatemo ne rahamatino wutono Lahataꞌala. 17Weo Kitabi notibuhi bhoasaono Lahataꞌala ne omputo Firaun, “Patudhunomo asangkeko membali omputo neanomo namangka ne hintu amotiwoha kuasaku, bhe neaku natiende-ende ne kosekaꞌewaꞌae dhunia ini.” #Kel 9:16 18Dadiꞌanomo Lahataꞌala nofotiwohamo kabhelano lalono ne laꞌae maka nepoindalono, mie sigaoꞌano nohabuda dekatuꞌa fotu, laꞌae maka nepoindalono.
Amahano bhe kataano lalono Lahataꞌala
9:19-29
19Bheanea nandoo bhe so mugauno ne idi, “Ane peda anaꞌa noafa Lahataꞌala nofoꞌalaꞌao dua manusia? Ingka bhe naseemie miina bhe mondoiꞌe dapoewangi bhe kapoindalono Lahataꞌala.” 20Hintu itu manusia, laꞌae bhahaa hintu itu sampe mokado pobhalo bhe Lahataꞌala? Naembali bhahaa o nuꞌua napugau ne humabue, ambano, “Noafa gahaꞌa habu kanau peda aini?” #Yes 29:16, 45:9 21Bhahaa o pandeno nuꞌua maitu miina nakokuasa naehabu nahaa wua kaenteiꞌa maiꞌao ne sekakumbu wite mopulu? Naseewua nahumabue so kafaraluu ne kahame, seewuano so kafaraluu nepake maꞌoleo hangkowine. 22Pedamo dua aitu Lahataꞌala, nokopatudhu namotiwoha amahano bhe namotipandeꞌao kuasano. Ampamo kaowu nokosabaha mpuu ne mie so nekangkanaino amahano, mentaa-ntaano kabinasa. 23Kahabuꞌano peda anaꞌa Lahataꞌala, neanomo namotipandeꞌao kakalabhiano pontalabhi-labhino ne mie nemobhelaꞌaono lalono, mie toka nefontaa-ntaano wawo so tumahimano kakalabhiano. 24Ingka intaodimoomu ini, mie nebhasino suano kaowu maiꞌao ne miendo Yahudi, tamaka maiꞌao ne bansano liwu sigaoꞌano dua. 25Aini noposahataa bhe tibuhino weo Kitabino anabii Hosea peda aini,
“Mie tapa tilentuno umatiku, akumonadamo dua umatiku;
mie tapa nemoasiꞌaoku akumonae kamoasiꞌaoku. #Hos 2:23
26Ane endefiꞌini mieno seꞌonu liwu dofohatoda, ‘Hintimiu itu suano umatiku’,
mada kaowu mie andoa maitu dakumonada anaꞌino Lahataꞌala dumadino.” #Hos 1:10
27Anabii Yesaya nokowamba nofekabhala-bhalaꞌie nopulaoꞌao miendo Israel, “Mahinggamo miendo Israel tapedamo bhone we wiwino teꞌi kabhahindo, naseendai kaowu so sumalamatino. 28Kapaꞌamo Lahataꞌala namondawumo kabhotusino te dhunia ini, napikihatomo bhe namopuli-puliemo.” #Yes 10:22-23 29Anabii Yesaya tokamo nokowambaane dua peda aini,
“Ibahano Lahataꞌala Foliuno Kuasa pae nafomehunsaꞌao sampuꞌa,
teteweimo intaodi ini ⸤ dabinasamo⸥ nadamo dua kotano Sodom bhe Gomora.” #9:29 Yes 1:9; Sodom bhe Gomora, ondo Kej 19
Kasalamatindo bansano liwu sigaoꞌano bhe kakolilinoꞌando miendo Israel
9:30—10:4
30Ane peda anaꞌa, damugauꞌomu dua nada amai? Ingka nada aini: bansano liwu suano Yahudi miina daꞌumulei lalondo so datitahimaꞌao peda mie banara ne Lahataꞌala, gahaꞌaitu notahimadamo Lahataꞌala peda mie banara. Katitahimaꞌando ini nengkoha ne kaparasaeando. 31Nopobhansule bhe miendo Yahudi, mahingga sadhia doꞌulei lalondo doangkafi tubhono agama so datitahimaꞌao peda mie banara ne Lahataꞌala, gahaꞌaitu miina natosampe patudhundo. 32Noafa bhahaa pata katosampeꞌano? Ingka mbaꞌinomo dohabu bhahi-bhahiꞌae maitu miina dasumahunaꞌao kaparasaeando, tamaka dotangkaꞌao kaꞌosando doꞌulei sampe dotilole dotituno ne kontu, ⸤ maꞌanano wutono Kristus⸥ . 33Weo Kitabi notibuhi nopulaoꞌao kontu anaꞌa peda aini,
⸤ Ambano Lahataꞌala⸥ “Te kabhawono Sion padamo aeteiane sepoi kontu so katitunoꞌando mie,
somo dua mefotiloleno mie.
Tamaka laꞌae marasaeano ne Anoa pae nandidiki lalondoa.” #Yes 28:16
Currently Selected:
Roma 9: mnbSD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.