Roma 16
16
Kapakatuno salam
16:1-16
1Naetaa amohatokoomu, bhahitientoomu Febe ini seemie hobhine tiparasaeano, anoamo ini umondofaono umati te Kengkrea. 2Tahima metaaꞌeomu weo neano Ompu, hampano ingka pedamo aitu mantasiꞌano mie marasaeano dopotahi-tahima. Tulumieꞌomu ane nefaraluu katulumi o ae maka dua, kapaꞌamo anoa itu nobhahimo netulumi mie, bhemo dua idi.
3Fosampe kanauꞌomu salam ne Priskila bhe Akwila, posabhangkaꞌaku weo kahadhaa so Kristus Yesus. 4Andoa itu padamo dopotahoꞌao inawando so idi, notumpu sepaliꞌa laloku ne andoa. Bhahamoa suano kaowu idi motumpu lalo ne andoa, tamaka kosasawindo umati suano Yahudi. 5Fosampe kanauꞌomu dua salam ne umati humompuno we lambudo. Fosampe kanauꞌomu dua salam ne Epenetus, bhahitie nemoasiꞌaoku; anoamo itu kabhao-bhaono marasaeano ne Kristus we kadieno Asia. 6Salam dua so Maria, kumahadhaa mobhieno so hintimiu. 7Salam so Andronikus bhe Yunias, miendo Yahudi medano dua idi. Padamo dua dotitohongku poowa bhe idi. Dotilentu rasuluꞌi tiangkano, dopaꞌindulu doparasaea andoa ne Kristus bhe idi.
8Salam so Ampliatus, nemoasiꞌaoku weo Ompu. 9Salam so Urbanus, posabhangkaꞌaku weo kahadhaa so Kristus, bhe dua so Stakis, bhahitie nemoasiaꞌaoku. 10Salam so Apeles, anoa padamo doꞌudhie maka nokobukutiimo kamatangkano kaparasaeano ne Kristus. Salam dua so mie weo polambuno Aristobulus. 11Salam so Herodion, saliwuku miendo Yahudi. Salam dua so mie marasaeano ne Ompu weo polambuno Narkisus.
12Salam so Trifena bhe Trifosa, hobhineꞌi aini dokahadhaa mobhie doꞌondofao Ompu. Salam dua so Persis nemoasiꞌaoku, hobhine aini nokahadhaa mobhie dua noꞌondofao Ompu. 13Salam so Rufus, mie tipudhino weo kahadhaa so Ompu, bhe salam dua so inano, anoa ini akonaemo dua inaku. 14Salam so Asinkritus, Flegon, Hermes, Patrobas, Hermas, bhe kosasawindo bhahitie poowa-owano bhe andoa. 15Salam so Filologus bhe Yulia, Nereus bhe finihobhineno, bhe Olimpas, bhe kosasawindo umati marasaeano poowa-owano bhe andoa. 16Pofea-feabhaomu bhe pomoni-moniniꞌaoꞌomu peda bhahitie pomoa-moasiꞌaono. #16:16 Sakotuꞌuno: Pofea-feabhaomu weo kawono mongkilo. Pedamo dua ne 1Kor 16:20, 2Kor 13:12, 1Tes 5:26 bhe 1Pet 5:14. Kaneando miendo Yahudi bhe Yunani dopowono ne bhagando, katandaino doꞌia bhe dopomoa-moasiꞌao. Kosasawindo umatino Kristus ⸤ ne ini⸥ dopakatuangkoomu dua salam.
Katangahi kapuliaono
16:17-24
17Bhahitieꞌiku, aesalo mpuu posiꞌondoomu ne mie meowano powengkeꞌa weo umati bhe kakodhosaꞌando mie marasaeano. Aitu nopoꞌala bhe kafoinaꞌu toka netahimamiu. Dadiꞌanomo gampiandaomu. 18Kapaꞌamo mie pedando itu miina dameompu ne Kristus, Ompuntoomu, tamaka dofeompu kaowu ne iꞌino handado. Pugaundo nokesa, wambado nomeko, tamaka debhohe-bhoheꞌi kaowu mie kaangka-angkano. 19Sabhaha mie dofetingkeemo bhihitano meangkaomu mpuu ⸤ ne Kristus⸥ , dadiꞌanomo nowulaangkoomu sepaliꞌa laloku. Gaoku mpuu mandeꞌaaneomu metaaꞌano, monggelaomu ne modaiꞌano. 20Lahataꞌala kamaiꞌaoꞌano katohopono dadi, napikifolongko Kafeompuꞌando seetani ne wawono aꞌemiu bhe namobinasae. Sio-siomo kabarakatino Yesus Ompuntoomu sadhia napobhaiangkoomu.
21Salam maiꞌao ne Timotius, posabhangkaꞌaku weo kahadhaa, bhe Lukius, Yason bhe Sosipater, sanea saliwuku miendo Yahudi.
22Salam dua weo neano Ompu maiꞌao ne idi Tertius, buhinomo suha aini. 23Salam dua nomaiꞌao ne Gayus. Anoamo ini motiampe kanau bhe kosasawindo umati. Salam dua nomaiꞌao ne Erastus, mintahano dhoino kota, bhe Kwartus bhahitientoomu.
24[Sio-siomo kabarakatino Yesus Kristus Ompuntoomu sadhia napobhaiangkoomu! Amin.]
Kasongkono suha
16:25-27
25Notifekakalabhia mpuu Lahataꞌala! Anoamo kokuasano namekatangka kaparasaeamiu, naposahataa bhe Bhihita Metaa nefoleleku, bhihitano Yesus Kristus. Bhihita anaꞌa ingka o bhihitano patudhuno Lahataꞌala tifebuniꞌano ntini moꞌo-moꞌonono taꞌu. 26Tamaka ampa aitu, nopoangkafi bhe pahintano Lahataꞌala dumadino suhue dhamani, patudhuno ini dofekantaleaꞌiemo bhe bhihitano padamo dofolelee ne sabhaha bansano liwu, noangka ne nebuhi weo Kitabindo ana-anabii, neanomo kosasawindo damarasaea bhe daeangka ne Lahataꞌala. 27Anoamo Lahataꞌala Kaseemie-mieꞌano, foliuno kakotimbangi. Nopantasi mpuu namangka ne Yesus Kristus sadhia damekakalabhiaꞌe, ampa suhue dhamani! Amin.
© 2022, Wycliffe Bible Translators, Inc. All rights reserved.