Roma 12
12
Dembali kapopanga dumadino
12:1-8
1Dadiꞌanomo bhahitieꞌiku, hampano kataano lalono Lahataꞌala, aesalo mpuu ne hintimiu, owaomu mbadhamiu peda kapopanga dumadino, mongkilono bhe mekaꞌiano lalono Lahataꞌala. Nadamo aini tabeano kofeompumiu sakotuꞌuno ne Lahataꞌala. 2Koemo mesandahaomu ne sabhaha podiu bhe kaneano dhunia ini, tamaka hunsaꞌanomo Lahataꞌala namahabuꞌouni fekihimiu sampe natibhalii dadimiu. Ane nadamo anaꞌa mandeꞌaaneomu medano ae kapoindalono Lahataꞌala: sabhaha podiu metaaꞌano, mekaꞌiano lalono bhe sumangkaꞌano.
3Hampano kadawu neꞌawaku ne Lahataꞌala, amohatokoomu kosasawimiu itu: weo fekihimiu koise abhi wutomiu nalumiuꞌe bhe mantasiꞌano, tamaka fekihiomu saetaaꞌano, noposahataa bhe kabhalano kaparasaea nedawuꞌaono Lahataꞌala ne hintimiu seemie-seemie. 4Mbadhantoomu seemie-seemie nobhahi katokano, maka sehonda-sehonda katoka bhe takano, miina napototo-totoa. 5Pedamo dua intaodiomu, mahinggamo dobhahiomu, weo kaseꞌise bhe Kristus mbadhantoomu seꞌise kaowu. Intaodiomu ini seemie-seemie dopokai-kai dembali katokano mbadha seꞌiseno naꞌa. 6Intaodiomu detahimamoomu kapooli seemie-seemie poꞌala-alano noposahataa bhe kadawu newaꞌaono Lahataꞌala. Dadiꞌanomo ane deꞌawa kapooli dakosuaha peda seemie anabii, tabeano dadhumalangie naposahataa bhe kaparasaeando. 7Meꞌawano kapooli naꞌumondofao mie bhaindo, naetaa nafoꞌondofao. Meꞌawano kapooli nafofoguhu, naetaa nafofoguhu. 8Meꞌawano kapooli nafotangahi, naetaa nafotangahi. Meꞌawano kapooli so nadumawu-dawuꞌao kanandoono ne mie bhaino, naetaa nahumabue weo kahelasino lalo. Meꞌawano kapooli naembali neangka, naetaa naꞌumulei lalono nadhumalangie. Meꞌawano kapooli so metulumino mie weo kasabha, naetaa nadhumalangie weo kawulano lalo.
Katangahi so dadumadiꞌao weo kanini kaasi
12:9-21
9Kamoasiꞌaomiu ne mie bhaimiu tabeano nahelasi. Fekakodoꞌo wutomiu ne modaiꞌano, fintaha ne metaaꞌano. 10Mpuu-mpuunieꞌomu pomoni-pominiꞌao peda mie sibhahi-bhahitieno; fosibhalaomu mie bhaimiu nalumiuꞌe kafosibhala ne wutomiu. 11Fekakokosoomu kahadhaaꞌomu, koise mantawaomua! Naetaa nakamai-mai totono lalomiu ondofaoꞌomu Ompu. 12Fowula lalomiu hampano bhe neposahunaꞌaomiu, kosabaha potaamiomu weo kasabha, mpuu-mpuunieꞌomu sambaheamiu! 13Tulumidaomu bhahitie marasaeano mokaeno! Fotiampedaomu mie bhaimu mengkalalono! 14Ane bhe mie modee-deekoomu, mesaloandaomu kabarakatino Lahataꞌala; barakatidaomu, koise bhatataꞌiandaomua. 15Fowula lalomiu bhe mie mowulano lalo, moꞌaeꞌomu bhe mie moꞌaeno. 16Pometa-metaaꞌomu, koise nelangke diumiu tamaka posabhangkaomu bhe mie mepandano kaengkohaꞌa, koise abhi wutomiu mie mande! 17Kadai koise bhoosiane kadai. Sabhaha habu metaaꞌano ne pomatando mie, habueꞌomu. 18Uleiꞌe lalomiu ampa nepoo-poolimiu dadi pometaaꞌomu bhe kosasawindo mie.
19Bhahitieꞌiku timoasiꞌaono! Koe sepaliꞌa bhoosiomu kaleano lalomiu, hunsaꞌanomo Lahataꞌala so fohukumuno. Kapaꞌamo notibuhi weo Kitabi, “Inodimo so bhoosiangko. Inodimo so fohukumuno, bhoasaono Ompu.” #Ul 32:35 20Ane kaewamu noꞌaho, waꞌane nohumaa! Ane nokekele wuꞌuno, waꞌane nofohoꞌu! Kapaꞌamo ane humabuomu peda naꞌa ingka tanaoambanoꞌaomo wutono. #12:20 Ams 25:21-22. Tanaoambanoꞌaomo wutono, sakotuꞌuno: ane humabuomu peda naꞌa mekabumbuanemoomu wea te fotuno. 21Koise katahoomu wutomiu natumalokoomu modaiꞌano, tamaka modaiꞌano taloaneomu metaaꞌano!
© 2022, Wycliffe Bible Translators, Inc. All rights reserved.