Roma 1
1
Kalengkano suha
1:1-7
1Suha aini nomaiꞌao ne idi, Paulus, palima-limano Kristus Yesus. Idi nobhasi kanau Lahataꞌala aembali rasulu bhe nofekopuꞌuni kanau aefolele Bhihita Metaa maiꞌao ne Lahataꞌala. 2Bhihita Metaa aini toka nofodhandiane Lahataꞌala mpini wawono noangka ne suahando ana-anabiino tibuhino weo Kitabi. 3Bhihita Metaa aini nopulaoꞌao Anano Lahataꞌala, Yesus Kristus Ompuntoomu. Peda seemie manusia, nolente maiꞌao ne sampuꞌano omputo Daud. 4Tamaka Rohino Lahataꞌala nofotiwohae putae Anoa Anano Lahataꞌala, nokokuasa hampano nowanu maiꞌao ne mate. 5Noangkamo dua ne Yesus Kristus, insaodi ini taeꞌawa rahamati taembali rasulu so mowano sabhaha bansano liwu suano Yahudi damarasaea bhe daeangka ne Kristus, somo katifekalabhiaꞌano. 6Nepulaoꞌaoku sabhaha bansano liwu, ingka nopesuamo dua hintimiu ⸤ miendo Roma⸥ . Hintimiu nobhasikomoomu Lahataꞌala seꞌiseomu bhe Yesus Kristus. 7Suha aini so hintimiu meateno we Roma, nemoasiꞌaono Lahataꞌala, toka nebhasino membaliomu umatino mongkilono. Sio-siomo sadhia napobhaiangkoomu kabarakati bhe katohopono dadi maiꞌao ne Lahataꞌala Amantoomu bhe Ompu Yesus Kristus.
Patudhuno Paulus nakumala we Roma
1:8-15
8Ametompunaꞌiane amoampe katumpuno laloku ne Lahataꞌala nesombaiku noangka ne Yesus Kristus hampano kosasawimiu itu. Ingka bhihitano kaparasaeamiu ne Yesus Kristus nokolelemo ne kosedhuniaꞌae ini. 9Taenomo asambahea sadhia dua afeꞌulaikoomu. Wutono Lahataꞌala sakusiino pugauku ini. Ingka Anoamo nefeompuniꞌiku sampuu-mpuuno laloku weo foleleꞌano Bhihita Metaano Anano. 10Weo sambaheaku sadhia aesalo mpuu sio-siomo ane napokantibha bhe kapoindalono Lahataꞌala, nasewakutuu asumalawa amai aꞌumondokoomu. 11Nokamba mpuu laloku apoꞌawa bhe hintimiu, neanomo naembali adumawuangkoomu dua kabarakatino Rohino Lahataꞌala so namatangkaꞌao kaparasaeamiu. 12Patudhuku, naembali dapofekatangkaomu: kaparasaeamiu namekatangka kanau, kaparasaeaku namekatangka hintimiu. 13Bhahitieꞌiku! Gaoku mandeꞌaaneomu putae nentuhumo akopatudhu amai aꞌumondokoomu, tamaka taꞌampamo aitu sadhia bhe kapaleiku. Gaoku mpuu kahadhaaku ne olotamiu itu nakohasili dua peda ne bansano liwu suano Yahudi we liwu sigaoꞌano. 14Kapaꞌamo idi ini teteweimo aefolele Bhihita Metaa, tapedamo mie kodosano. Akodosa naetaa ne bansano liwu koꞌadhatino, naetaa ne tapa koꞌadhatino, naetaa ne mie kosikolano, naetaa ne tapa kosikolano. 15Dadiꞌanomo apoindalo mpuu aefolele Bhihita Metaa ne hintimiu dua meateno we kotano Roma itu.
Kuasano Bhihita Metaa
1:16-17
16Miina aoambanoanea Bhihita Metaa, hampano aini o kuasanomo Lahataꞌala mosalamatino sabhaha mie marasaeano, kabhao-bhaono miendo Yahudi maka bansano liwu sigaoꞌano dua. 17Kapaꞌamo weo Bhihita Metaa naꞌa notiwohamo kaangkaꞌando manusia so datitahimaꞌao peda mie banara ne Lahataꞌala. Kaangkaꞌa anaꞌa notanda ne kaparasaea, nopuli ne kaparasaea. Kapaꞌamo nandoo tibuhino weo Kitabi peda ini, “Mie netahimano Lahataꞌala peda mie banara hampano kaparasaeano, anoamo itu so meꞌawano dadi.” #Hab 2:4; Gal 3:11
Kahukumuno Lahataꞌala ne kaꞌalando manusia
1:18-32
18Nomaiꞌao te surugaa Lahataꞌala nofotiwoha amahano ne sabhaha dhosa bhe habu modaindo manusia. Weo podiu modaindo desongkowi kabanara. 19Sabhaha so nepandeꞌaono manusia pokaiꞌano bhe Lahataꞌala ingka nentaleamo sepaliꞌa so andoa, kapaꞌamo padamo nofotiwohaandae wutono Lahataꞌala. 20Mpini pakatifokonandoono dhunia, o manusia dolosangiemo mpuu putae Anoamo kotu-kotuꞌu Lahataꞌala Kaseemie-mieꞌano bhe kuasano miina nakotompaa suhue dhamani. Sifatino Lahataꞌala ini miina natiwohaa, tamaka notipandeꞌaomo ne sabhaha nefokonandoono. Dadiꞌanomo manusia miina dakotingkua damokantibha wutondo. 21Mahingga manusia dopandeꞌao Lahataꞌala, miina damosibhalae peda Lahataꞌala bhe miina dua natumumpua lalondo ne Anoa. Bhahamoa tadofekihi sumia-siaꞌano sampe totono lalondo kumabhohe-bhoheno nohohondomo. 22Doabhi wutondo dopandemo, gahaꞌaitumo dobhohe. 23Nesombaindo suanomo Lahataꞌala kumalabhiano pata mosoosalino, tamaka dololianemo sabhaha patung mekatuino manusia, o kaꞌuhi lumola, o kadadi fatombaliꞌano aꞌe tawa o kadadi sumolano ne wite.
24Kanandooꞌanomo Lahataꞌala nofolapasadamo nokuasaida kapoindalondo daehabu podiu hamesa, sampe tadopokada-kadaelesaꞌaomo mbadhando sapada-pada andoa. 25Kabanarano Lahataꞌala dololianemo kabuangka. Andoa miinamo dasumomba tawa dameompu ne Fofokonandoono, tamaka ne mahaluku kafokonandooꞌano. Gahaꞌaitumo mantasiꞌano mpuu tabeano Fofokonandoono so nefosibhala suhue dhamani. Amin.
26Hampano diundo manusia peda naꞌa, Lahataꞌala nofolapasadamo ne nafusuu timoambanoꞌaono. Hobhineꞌi miinamo dapopoindalo bhe moꞌane peda kaneano tamaka dololiane kanea pata mantasiꞌano sampe dopomoo-moodofi sapada-pada hobhine. 27Pedamo dua aitu o moꞌaneꞌi miinamo dapomoodofi bhe hobhine peda kaneano, tamaka notolaumo kaꞌende-endeno nafusuundo ne moꞌane bhaindo, sampe dehabu timoambanoꞌaono sapada moꞌane. Dadiꞌanomo deꞌawamo kahukumu mantasiꞌano posahataaꞌano bhe habu modaindo maitu.
28Andoa donamisi wutondo miinamo namaruluua damekihi Lahataꞌala, maka tanofolapasadamo ne sabhaha fekihi tapa kofahalaano sampe dohabumo tapa mantasiꞌano. 29Totono lalondo noponoꞌaomo sabhaha modaiꞌano, podiu pata metaaꞌano, o kakadau-dau, pokondu-konduaꞌao lalo, nafusuu dafopongko, pogiha-gihaꞌa, kabhohe-bhoheꞌi bhe feꞌili dadumai-dai mie bhaindo. 30Andoa sadhia dokamuntu-muntuꞌao mie bhaindo, dofekabuhumo neando mie bhaindo, dobansimo Lahataꞌala, miina daepandeꞌao uluꞌa, dembalimo kalangke diu, dosangke-sangke wutondo, dopandemo deꞌondofi akala buꞌou so dahumabu modaiꞌao, bhe miinamo damosibhala kamungkulando. 31Fekihindo notisongkomo, podhandindo miinamo damintahakiea, nopulimo kanini kaasindo, bhe miinamo dua naobhela lalondo ne mie bhaindo. 32Andoa dopandeꞌaane weo pahintano Lahataꞌala, mie humabuno bhahi-bhahiꞌae maitu nopantasimo damongkoe. Tamaka mahinggamo peda anaꞌa, tadohabumo kansuhu, bhahamoa dopoindaloe dua ane dohabue mie bhaindo.
© 2022, Wycliffe Bible Translators, Inc. All rights reserved.